Ibrani 9:15 - Perjanjian Baru Bahasa Melayu Maluku Utara

¹⁵ Kong deng samua yang Yesus Kristus biking itu, Dia jadi sama deng jambatan untuk biking janji yang baru antara Tuhan Allah deng manusia. Deng Yesus Kristus mati untuk kase slamat itu, samua orang yang Tuhan Allah pangge iko pa Dia mo tarima apa yang Dia janji. Janji itu hidup deng Tuhan Allah slama-lamanya. Barang, Yesus Kristus mati untuk tebus manusia pe dosa-dosa yang dong biking waktu masi iko janji yang lama.

Ibrani 9:15 ပူးပေါင်းရင်းမြစ်များ

Matius 19:29

Kong tiap orang yang iko pa Kita sampe dia so kase tinggal dia pe ruma, dia pe sudara laki-laki atau sudara parampuang, dia pe papa atau dia pe mama, dia pe ana-ana atau dia pe kobong, orang itu akan tarima ulang saratus kali lipa samua itu, deng dia me akan dapa hidup deng Tuhan Allah slama-lamanya.

Matius 22:3

Bagitu samua so siap, dia suru dia pe orang-orang karja pigi pangge pa orang-orang yang dia so undang la datang suda di pesta kawing itu, tapi orang-orang itu tara mau datang.

Matius 25:34

Waktu itu, Anak Manusia yang so jadi Raja itu mo bilang pa orang-orang yang ada pa Dia pe sabla kanan, ‘Datang kamari suda ngoni yang Kita pe Bapa berkati! Datang suda di tampa yang Kita Berkuasa sebagai Raja, Kita so kase sadia tampa untuk ngoni di situ dari pertama waktu dunia ini jadi.

Matius 25:36

Waktu Kita tarada baju, ngoni kase baju pa Kita. Waktu Kita saki, ngoni urus pa Kita. Waktu Kita di penjara, ngoni datang lia pa Kita.’

Markus 10:17

Waktu Yesus so mo bajalang lagi, ada satu orang lari-lari datang pa Yesus. Orang itu berlutut pa Yesus pe muka kong dia tanya, “Guru yang bae, kita musti biking apa supaya kita bole dapa hidup deng Tuhan Allah slama-lamanya?”

Lukas 18:18

Ada satu pemimpin agama Yahudi, dia tanya pa Yesus, “Guru yang bae, kita musti biking apa supaya kita bole dapa hidup deng Tuhan Allah slama-lamanya?”

Lukas 22:20

Bagitu lagi abis makang, Yesus kase cawan yang ada isi anggur pa Dia pe murit-murit. Dia bilang, “Anggur dalam cawan ini, Kita pe dara yang tatumpa untuk kase sah Tuhan Allah pe janji yang baru. Kong Kita pe dara yang tatumpa itu jadi bukti, Tuhan Allah pe janji yang baru untuk manusia so jadi.

Yohanes 10:28

Kong Kita mo biking dorang hidup deng Tuhan Allah slama-lamanya deng dong pasti tara akan mati sampe slama-lamanya. Deng tarada satu orang yang bisa rampas pa dorang dari Kita pe tangan.

Kisah Para Rasul 20:32

Jadi skarang, kita minta Tuhan Allah jaga pa ngoni deng bantu ngoni inga turus Dia pe firman tentang Dia pe bae pa ngoni. Firman itu yang bisa kase kuat ngoni pe percaya, deng yang nanti mo kase pa ngoni samua yang Dia so janji mo kase pa orang-orang yang Dia so biking jadi Dia pe umat sandiri.

Roma 5:10

Karna dulu, waktu torang masi pangmalawang pa Tuhan Allah, Tuhan Allah sandiri yang kase bae-bae ulang torang pe hubungan deng Dia, deng cara Dia kase Dia pe Anak supaya mati untuk torang. Kong karna torang deng Dia pe hubungan so bae-bae ulang skarang, torang tau, torang pasti akan dapa slamat dari dosa-dosa karna Dia pe Anak so hidup ulang.

Roma 5:6

Tuhan Allah pe sayang pa torang itu bagini: waktu torang tara bisa biking apa-apa la bebas dari dosa-dosa, Yesus Kristus mati untuk torang yang hidup tara iko Tuhan Allah pe mau. Yesus Kristus mati, pas di waktu yang Tuhan Allah so tentukan.

Roma 5:8

Tapi Tuhan Allah pe sayang pa torang itu tara bagitu. Waktu torang masi berdosa, Yesus Kristus mati untuk torang. Itu yang kase tunju Tuhan Allah pe sayang yang basar pa torang.

Roma 6:23

Karna orang yang jaga biking dosa, dia pe akibat dia mo mati kong tapisa deng Tuhan Allah slama-lamanya. Tapi Tuhan Allah kase deng cuma-cuma hidup deng Dia slama-lamanya karna torang so satu hati deng Kristus Yesus, torang pe Tuhan.

Roma 8:28

Torang tau ini: sapa saja yang sayang pa Tuhan Allah deng so dapa pangge la iko Dia pe mau, apa saja yang jadi pa dorang, mo bae ka, tara bae ka, torang tau, Tuhan Allah mo biking samua itu untuk dorang pe bae.

Roma 8:30

Kong dorang yang Tuhan Allah so pili dari dulu itu, Dia pangge pa dorang jadi Dia pe umat. Dorang itu, Tuhan Allah biking jadi orang yang tara sala pa Dia pe muka. Kong nanti dorang itu mo dapa puji deng hormat sama-sama deng Dia.

Roma 9:24

Kong orang-orang itu bukang cuma torang orang Yahudi saja tapi orang yang bukang Yahudi lagi.

2 Korintus 3:6

Dia itu yang so biking torang mampo biking apa yang Dia suru, untuk kase tau Tuhan Allah pe janji yang baru pa orang-orang, janji antara Tuhan Allah deng manusia. Janji yang baru itu bukang bagantong dari apa yang so tatulis dalam aturan-aturan di lima kitab Musa, karna aturan-aturan itu kalu torang tara bisa iko samua, nanti waktu torang mati, torang tapisa deng Tuhan Allah slama-lamanya. Tapi janji yang baru itu bagantong dari Roh Kudus. Tuhan Allah kase Dia pe Roh pa torang, la torang ada kuasa iko Tuhan Allah pe mau, deng torang bole hidup deng Tuhan Allah slama-lamanya.

Galatia 3:20

Tapi, waktu Tuhan Allah biking janji deng Abraham, Dia tara pake orang untuk jadi sama deng jambatan untuk kase sampe janji itu pa orang-orang Yahudi, tapi Dia sandiri yang bicara langsung pa Abraham.

Efesus 1:7

Barang, deng Yesus Kristus mati kong Dia pe dara tatumpa untuk tebus pa torang, torang bole dapa ampun dari torang pe dosa-dosa. Samua itu torang dapa, karna Tuhan Allah pe bae yang basar skali pa torang.

2 Tesalonika 2:14

Tuhan Allah memang mau bagitu, jadi Dia pangge pa ngoni supaya dapa slamat waktu torang kase tau pa ngoni Kabar Bae tentang Yesus Kristus. Deng bagitu, ngoni bole rasa Yesus Kristus pe bae deng nanti dapa puji deng hormat sama-sama deng Dia, torang pe Tuhan.

1 Timotius 2:5

Barang, Tuhan Allah itu cuma satu. Deng cuma ada satu saja yang bisa kase bae-bae ulang Tuhan Allah deng manusia pe hubungan. Dia itu Kristus Yesus yang jadi manusia.

2 Timotius 2:10

Karna itu, kita sabar tanggung siksa itu samua deng tetap kase tau Kabar Bae tentang Yesus Kristus, supaya orang yang Tuhan Allah so pili mo jadi Dia pe umat bole percaya pa Kristus Yesus. Deng bagitu, dong bole dapa slamat deng dapa puji deng hormat sama-sama deng Tuhan Allah slama-lamanya.

Titus 1:2

Kita ajar pa orang-orang yang percaya itu, supaya dorang bole baharap deng yakin, dorang bole dapa hidup deng Tuhan Allah slama-lamanya, sama deng Tuhan Allah so janji. Karna waktu Tuhan Allah bolong biking dunia ini, Dia so janji kamuka, Dia mo kase hidup slama-lamanya pa orang-orang yang percaya pa Dia. Dia pe janji itu pasti jadi, karna Tuhan Allah tara perna bafoya.

Titus 3:7

Tuhan Allah kase Dia pe bae pa torang, itu yang biking torang jadi orang yang tara sala pa Dia pe muka, kong deng bagitu, torang ada hak tarima Tuhan Allah pe janji untuk hidup deng Dia slama-lamanya, sama deng yang torang so harap.

Ibrani 10:34

Ngoni memang rasa kasiang kong so bantu pa orang-orang yang maso penjara karna percaya pa Yesus Kristus. Kong waktu orang rampas ngoni pe harta, ngoni tarima deng hati sanang saja, barang ngoni tau, nanti ngoni akan dapa harta dari Tuhan di sorga yang lebe bagus, kong harta itu akan tetap ada sampe slama-lamanya.

Ibrani 10:36

Karna itu, ngoni musti batahang percaya biar dapa siksa, supaya kalu ngoni so biking apa yang Tuhan Allah mau, ngoni mo tarima apa yang Dia so janji itu.

Ibrani 11:13

Orang tua dulu-dulu yang tadi kita so bilang itu tetap percaya pa Tuhan Allah sampe dorang mati. Waktu dorang masi hidup, memang dorang bolong tarima apa yang Tuhan Allah janji pa dorang. Tapi dorang yakin dong akan tarima itu, jadi bole kase sama deng dorang ada balia dari jao apa yang Tuhan Allah janji pa dorang kong dorang sambut itu. Kong sementara dorang tunggu Tuhan pe janji mo jadi pa dorang, dong jaga bilang dong pe diri di dunia itu sama deng tamu deng pendatang saja yang tinggal tara lama di dunia ini.

Ibrani 12:24

Kong di situ lagi ngoni baku dapa deng Yesus Kristus. Dia itu yang mati supaya jadi sama deng jambatan la biking janji yang baru antara Tuhan Allah deng manusia. Kong Dia pe dara yang tatumpa itu lebe bagus dari Habel pe dara yang tatumpa dulu, barang hasil dari Habel pe dara itu, orang dapa hukum, tapi hasil dari Yesus pe dara itu biking orang bole dapa ampun dari dosa.

Ibrani 13:20

Tuhan Allah yang salalu biking torang pe hati tetap tenang, Dia yang kase hidup ulang pa Yesus waktu Yesus mati. Yesus itu torang pe Tuhan yang pimpin pa torang bae-bae, sama deng gembala jaga dia pe domba bae-bae. Dia pe dara yang tatumpa itu so biking Tuhan Allah pe janji deng manusia jadi kuat sampe slama-lamanya. Jadi kita minta pa Tuhan Allah,

Ibrani 2:14

Ana-ana yang Yesus bilang itu, dorang itu cuma manusia biasa saja. Yesus datang di dunia jadi manusia supaya jadi sama deng dorang. Kong karna Dia jadi manusia, Dia bisa mati. Deng karna Dia mati itu, Dia kase kala pa Iblis, setang-setang pe raja yang ada kuasa biking orang mati.

Ibrani 3:1

Sudara-sudara yang so jadi Tuhan Allah pe umat, yang so dapa pangge untuk hidup sama-sama deng Dia di sorga, coba ngoni pikir bae-bae tentang Yesus Kristus yang torang so percaya. Dia itu Tuhan Allah pe Utusan deng Dia lagi Imam Basar, karna Dia biking sampe torang manusia deng Tuhan Allah pe hubungan bisa jadi bae ulang.

Ibrani 6:13

Dulu, Tuhan Allah bajanji pa Abraham. Waktu Dia bajanji itu, Dia mo biking supaya Dia pe janji jadi kuat, tapi karna tara ada nama yang lebe hebat dari Dia, Tuhan Allah basumpa pake Dia pe nama sandiri.

Ibrani 6:15

Abraham batunggu-tunggu janji itu deng sabar, kong deng bagitu, dia tarima apa yang Tuhan Allah janji itu.

Ibrani 7:22

Jadi deng Tuhan Allah tentukan Yesus Kristus itu Imam Basar untuk slama-lamanya, torang jadi tau pasti, Dia biking Tuhan Allah pe janji yang baru pa manusia jadi lebe bagus dari janji yang lama.

Ibrani 8:13

Jadi sudara-sudara, waktu Tuhan Allah bilang Dia mo biking janji yang baru lagi deng dorang, itu berarti, Dia pe janji yang lama so tara pake lagi. Janji yang lama itu so tua, kong apa yang so tua itu so tara lama mo ilang.

Ibrani 9:12

Kong Dia so maso satu kali untuk slama-lamanya di tampa yang kudus itu. Waktu Dia maso itu, persembahan yang Dia bawa, bukang kambing laki-laki atau sapi muda pe dara, tapi Dia bawa Dia pe dara sandiri, kong deng dara itu Dia tebus tong pe dosa-dosa untuk slama-lamanya.

Ibrani 9:16

Ambe conto bagini, ada surat wasiat untuk kase warisan pa satu orang, tapi nanti di surat itu ada kase tau, orang yang tulis surat wasiat itu so mati baru orang yang mo tarima warisan bole dapa apa yang so tatulis di surat itu.

Ibrani 9:28

Bagitu lagi Yesus Kristus mati cuma satu kali saja, Dia mati itu supaya jadi korban persembahan untuk hapus banya orang pe dosa-dosa. Kong Dia akan datang lagi yang kedua kali, bukang untuk hapus manusia pe dosa-dosa, tapi untuk kase slamat pa orang-orang yang ada tunggu-tunggu Dia mo datang ulang.

Yakobus 1:12

Orang yang dapa cobaan kong batahang deng tetap percaya pa Tuhan, dia itu orang yang paling sanang. Karna kalu dia berhasil lolos dari samua cobaan itu, dia mo dapa hadia. Hadia itu, hidup deng Tuhan Allah slama-lamanya. Itu yang Tuhan Allah so janji mo kase pa orang-orang yang sayang pa Dia.

1 Petrus 3:18

Barang, Yesus Kristus me so dapa siksa, biar Dia tara biking sala. Dia lagi so mati satu kali untuk hapus torang samua pe dosa. Dia itu salalu biking barang yang butul, untuk orang-orang yang biking barang yang tara butul, supaya Dia bole kase bae-bae ulang torang pe hubungan deng Tuhan Allah. Dia dapa bunu waktu Dia jadi manusia, tapi Roh Kudus so kase hidup ulang pa Dia.

1 Petrus 5:10

Tapi siksa yang ngoni rasa itu cuma sementara saja. Nanti Tuhan Allah sandiri yang mo kase bae-bae ngoni pe keadaan, kase kuat ngoni pe hati, kase kuat ngoni pe percaya, deng biking ngoni tetap percaya pa Dia. Dia itu suda Tuhan Allah yang kase Dia pe bae pa manusia, yang so pangge pa ngoni untuk percaya pa Yesus Kristus, kong ngoni mo rasa Dia pe kuasa yang luar biasa untuk slama-lamanya.

1 Yohanes 2:25

Kong Anak itu pe janji pa torang bagini: torang mo hidup deng Tuhan Allah slama-lamanya.

Wahyu 5:9

Kong dorang manyanyi puji pa Anak Domba itu deng lagu baru bagini: “Anak Domba ini yang pantas tarima kitab tagulung itu, deng yang pantas buka tuju segel yang talém di kitab itu. Barang, Anak Domba ini so perna dapa bunu, kong Dia pe dara so tatumpa untuk hapus orang-orang pe dosa dari tiap fam, suku, bahasa deng bangsa supaya dorang jadi Dia pe umat.