Ibrani 8:13 - Perjanjian Baru Bahasa Melayu Maluku Utara

¹³ Jadi sudara-sudara, waktu Tuhan Allah bilang Dia mo biking janji yang baru lagi deng dorang, itu berarti, Dia pe janji yang lama so tara pake lagi. Janji yang lama itu so tua, kong apa yang so tua itu so tara lama mo ilang.

Ibrani 8:13 ပူးပေါင်းရင်းမြစ်များ

Matius 24:35

Langit deng bumi mo abis, tapi Kita pe kata-kata akan tetap ada sampe slama-lamanya.”

Lukas 22:20

Bagitu lagi abis makang, Yesus kase cawan yang ada isi anggur pa Dia pe murit-murit. Dia bilang, “Anggur dalam cawan ini, Kita pe dara yang tatumpa untuk kase sah Tuhan Allah pe janji yang baru. Kong Kita pe dara yang tatumpa itu jadi bukti, Tuhan Allah pe janji yang baru untuk manusia so jadi.

1 Korintus 13:8

Sayang itu akan ada sampe slama-lamanya. Tapi karunia untuk kase tau Tuhan Allah pe pasáng, itu nanti so tara ada lagi. Kong karunia untuk bicara deng bahasa roh, itu akan berenti. Bagitu lagi deng karunia untuk tau samua hal, nanti mo ilang.

2 Korintus 3:6

Dia itu yang so biking torang mampo biking apa yang Dia suru, untuk kase tau Tuhan Allah pe janji yang baru pa orang-orang, janji antara Tuhan Allah deng manusia. Janji yang baru itu bukang bagantong dari apa yang so tatulis dalam aturan-aturan di lima kitab Musa, karna aturan-aturan itu kalu torang tara bisa iko samua, nanti waktu torang mati, torang tapisa deng Tuhan Allah slama-lamanya. Tapi janji yang baru itu bagantong dari Roh Kudus. Tuhan Allah kase Dia pe Roh pa torang, la torang ada kuasa iko Tuhan Allah pe mau, deng torang bole hidup deng Tuhan Allah slama-lamanya.

2 Korintus 5:17

Karna itu, sapa saja yang so percaya pa Yesus Kristus, dia itu so jadi manusia baru. Dia pe sifat dulu-dulu yang tara bae itu so ilang. Samua so jadi baru.

Ibrani 1:11

Samua itu akan ancor sampe abis, sama deng baju tua yang rusak kong so tara bisa pake lagi, tapi Ngana tetap ada, tara beruba sampe slama-lamanya.

Ibrani 12:24

Kong di situ lagi ngoni baku dapa deng Yesus Kristus. Dia itu yang mati supaya jadi sama deng jambatan la biking janji yang baru antara Tuhan Allah deng manusia. Kong Dia pe dara yang tatumpa itu lebe bagus dari Habel pe dara yang tatumpa dulu, barang hasil dari Habel pe dara itu, orang dapa hukum, tapi hasil dari Yesus pe dara itu biking orang bole dapa ampun dari dosa.

Ibrani 7:22

Jadi deng Tuhan Allah tentukan Yesus Kristus itu Imam Basar untuk slama-lamanya, torang jadi tau pasti, Dia biking Tuhan Allah pe janji yang baru pa manusia jadi lebe bagus dari janji yang lama.

Ibrani 8:6

Tapi Yesus Kristus so jadi Imam Basar yang lebe hebat dari imam-imam yang biking dong pe tugas di Tenda Ibada di dunia ini. Barang, Dia yang jadi sama deng manusia pe wakil untuk biking janji yang baru antara Tuhan Allah deng manusia. Kong deng janji yang baru itu biking manusia pe hubungan deng Tuhan Allah jadi bae ulang. Tuhan Allah pe janji yang baru itu lebe bagus skali dari janji yang lama, karna Tuhan Allah ada janji hal-hal yang lebe bagus di janji yang baru itu.

Ibrani 8:8

Barang, Tuhan Allah me lia orang Israel tara mampo iko aturan-aturan yang ada di janji yang lama itu. Jadi Dia bilang pa dorang bagini, “Ngoni dengar yang Kita mo bilang ini e! Nanti akan ada dia pe waktu, Kita mo biking janji yang baru deng orang-orang bangsa Israel deng orang-orang bangsa Yehuda.

Ibrani 9:15

Kong deng samua yang Yesus Kristus biking itu, Dia jadi sama deng jambatan untuk biking janji yang baru antara Tuhan Allah deng manusia. Deng Yesus Kristus mati untuk kase slamat itu, samua orang yang Tuhan Allah pangge iko pa Dia mo tarima apa yang Dia janji. Janji itu hidup deng Tuhan Allah slama-lamanya. Barang, Yesus Kristus mati untuk tebus manusia pe dosa-dosa yang dong biking waktu masi iko janji yang lama.