Ibrani 7:25 - Perjanjian Baru Bahasa Melayu Maluku Utara

²⁵ Kong karna Dia Imam slama-lamanya, Dia ada kuasa kase slamat pa orang-orang yang mau datang pa Tuhan Allah, dari skarang sampe slama-lamanya. Dia kase slamat pa torang, barang Dia hidup slama-lamanya untuk kase berdoa pa torang pa Tuhan Allah.

Ibrani 7:25 ပူးပေါင်းရင်းမြစ်များ

Yohanes 14:13

Kong apa saja yang ngoni minta pa Bapa karna ngoni Kita pe umat, Kita mo biking itu untuk ngoni, supaya deng apa yang Kita biking itu, orang-orang bole puji deng hormat pa Kita pe Bapa.

Yohanes 14:16

Kong Kita mo minta pa Kita pe Bapa, supaya Dia kase Penolong satu pa ngoni, yang mo ada turus sama-sama deng ngoni.

Yohanes 14:6

Kong Yesus bilang pa dia, “Kita ini jalang yang mo pigi pa Tuhan Allah, deng Kita ini yang kase tau yang butul tentang Tuhan Allah, deng Kita lagi yang kase hidup deng Tuhan Allah slama-lamanya. Jadi, tara ada satu orang yang bole pigi pa Tuhan Allah kalu tara iko pa Kita.

Roma 5:10

Karna dulu, waktu torang masi pangmalawang pa Tuhan Allah, Tuhan Allah sandiri yang kase bae-bae ulang torang pe hubungan deng Dia, deng cara Dia kase Dia pe Anak supaya mati untuk torang. Kong karna torang deng Dia pe hubungan so bae-bae ulang skarang, torang tau, torang pasti akan dapa slamat dari dosa-dosa karna Dia pe Anak so hidup ulang.

Roma 5:2

Kong karna apa yang Yesus Kristus so biking itu, torang dapa pintu maso untuk dapa Tuhan Allah pe bae asal torang percaya pa Yesus Kristus. Turus torang me bole sanang lagi, karna torang bisa baharap deng yakin nanti torang mo sama-sama deng Tuhan Allah dapa puji deng hormat.

Roma 8:34

Tarada yang bisa kase hukuman pa torang yang percaya, karna Kristus Yesus yang ada bela pa torang pa Tuhan Allah pe muka. Kristus Yesus mati supaya tebus torang pe dosa. Kong lebe dari itu lagi, skarang Dia so hidup ulang kong dudu di tampa yang terhormat, pa Tuhan Allah pe sabla kanan.

1 Korintus 1:21

Karna biar manusia pande skali, manusia tara bisa kanal Tuhan Allah deng dong pe pande. Tapi Tuhan Allah itu tau samua hal kong Dia biking rencana yang bae, sampe Dia mau kase slamat pa orang-orang yang percaya Kabar Bae itu, biar banya orang bilang kata, itu orang bodo pe carita.

Efesus 2:18

Barang, karna Yesus Kristus itu, torang samua dapa pintu maso untuk badekat pa Tuhan Allah torang pe Bapa. Kong Roh Kudus yang ada pa torang samua pe hati itu suda yang tolong pa torang untuk badekat deng Dia.

Efesus 3:12

Kong karna torang so percaya pa Yesus Kristus, torang dapa pintu maso untuk badekat pa Tuhan Allah, deng torang tara usa tako tapi bole yakin Dia akan tarima pa torang.

Efesus 3:20

Tuhan Allah pe kuasa yang bakarja pa torang pe hidup itu paling basar skali, kong deng Dia pe kuasa itu Dia bisa biking lebe dari apa yang torang minta, deng lebe dari apa yang torang pikir.

Filipi 3:21

Nanti waktu Dia datang, Dia mo ruba torang pe badan yang bisa ancor ini, jadi sama deng Dia pe badan yang luar biasa. Dia biking bagitu, karna Dia ada kuasa untuk biking samua-samua tundu iko Dia pe mau.

1 Timotius 2:5

Barang, Tuhan Allah itu cuma satu. Deng cuma ada satu saja yang bisa kase bae-bae ulang Tuhan Allah deng manusia pe hubungan. Dia itu Kristus Yesus yang jadi manusia.

2 Timotius 1:12

Kong karna kita kase tau Kabar Bae itu, kita dapa siksa dari orang-orang yang tara suka Kabar Bae itu sampe dong kase maso pa kita di penjara. Tapi biar bagitu me, kita tara malu, karna kita tau butul Tuhan yang kita percaya itu, deng kita yakin Dia pe kuasa ada pa kita turus untuk jaga tugas yang Dia so kase percaya pa kita sampe Dia datang ulang yang kedua kali.

Ibrani 11:6

Tara mungkin orang mo biking Tuhan Allah pe hati sanang, kalu dia tara percaya pa Tuhan Allah. Barang, sapa saja yang mo datang pa Tuhan Allah, dia musti yakin Tuhan Allah ada, deng dia lagi musti yakin, Tuhan Allah mo kase hal-hal yang bae pa orang-orang yang butul-butul cari pa Dia.

Ibrani 13:15

Kong karna Yesus Kristus so jadi korban di kayu salib untuk hapus torang pe dosa, torang so tara perlu lagi bawa binatang korban persembahan untuk hapus torang pe dosa. Jadi, mari suda torang puji-puji pa Tuhan Allah. Torang pe kata-kata itu, so sama deng torang so serakan torang pe korban persembahan pa Dia.

Ibrani 2:18

Jadi, karna Dia sandiri so perna menderita waktu dapa goda, Dia me mampo tolong pa torang waktu torang dapa goda.

Ibrani 2:9

Tapi yang so jelas itu, Yesus Kristus yang berkuasa pa samua-samua yang ada. Dia suda yang Tuhan Allah biking Dia pe posisi sadiki lebe randa dari malaekat-malaekat. Tapi itu cuma sementara saja, cuma waktu Dia ada di dunia ini. Skarang ini, Tuhan Allah so biking Dia jadi hebat deng dapa hormati sama deng Raja karna Dia so menderita sampe mati di kayu salib. Dia rasa samua itu karna Tuhan Allah kase Dia pe bae yang cuma-cuma pa torang samua, supaya torang samua dapa slamat dari dosa-dosa.

Ibrani 5:7

Waktu Yesus Kristus hidup di dunia ini, Dia berdoa kong minta sunggu-sunggu sampe babataria deng mamanangis pa Tuhan Allah yang punya kuasa untuk kase lapas pa Dia dari kematian. Tuhan Allah dengar Dia pe doa itu, barang Dia butul-butul iko Tuhan Allah pe mau.

Ibrani 7:16

Dia jadi Imam bukang iko aturan di lima kitab Musa, karna kalu iko aturan itu, yang jadi imam musti dari Lewi pe turunan. Tapi Dia jadi Imam karna Dia ada kuasa dari Tuhan Allah, deng karna Dia hidup slama-lamanya.

Ibrani 7:19

Aturan-aturan di lima kitab Musa itu tara berhasil biking manusia pe hubungan deng Tuhan Allah jadi sempurna. Tapi skarang, torang so ada tampa baharap yang lebe bae. Itu Yesus suda, Dia yang biking torang bole badekat deng Allah.

Ibrani 7:24

Tapi Yesus Kristus, Dia tetap ada sampe slama-lamanya, jadi Dia pegang Dia pe jabatan Imam tara ganti-ganti deng orang laeng.

Ibrani 7:8

Kalu imam-imam dari Lewi pe turunan itu, dorang jaga tarima spulu persen dari umat untuk dorang pe hidup, padahal imam-imam itu cuma manusia biasa saja yang nanti mo mati. Jadi Melkisedek ini lebe penting dari imam-imam biasa, karna di Kitab Suci tara tatulis dia mati.

Ibrani 9:24

Barang, Yesus Kristus tara maso di Ruang Paling Suci di Tenda Ibada di dunia yang manusia biking. Ruang itu cuma conto saja dari cara semba yang butul. Tapi Yesus Kristus maso di Ruang Paling Suci yang butul yang ada di sorga. Di sana skarang Yesus Kristus jadi tong pe wakil pa Tuhan Allah pe muka.

Yudas 1:24

Tuhan Allah ada kuasa untuk jaga pa ngoni supaya ngoni tara taiko biking dosa. Dia me biking ngoni jadi orang yang tara sala apa-apa, kong bawa pa ngoni badiri deng hati yang paling sanang di Dia pe muka yang hebat itu.