Ibrani 6:18 - Perjanjian Baru Bahasa Melayu Maluku Utara

¹⁸ Jadi ada dua hal yang tara perna beruba: pertama, Tuhan Allah pe janji, deng kedua, Dia pe sumpa. Barang, Tuhan Allah tara perna bafoya. Kong karna itu, torang yang cari slamat pa Dia, torang pe hati jadi kuat kong torang bole percaya deng yakin, tong akan tarima samua yang Tuhan Allah so janji pa torang.

Ibrani 6:18 ပူးပေါင်းရင်းမြစ်များ

Matius 24:35

Langit deng bumi mo abis, tapi Kita pe kata-kata akan tetap ada sampe slama-lamanya.”

Matius 3:7

Ada lagi banya orang Yahudi dari aliran Farisi deng aliran Saduki datang pa Yohanes la mo minta Yohanes baptis pa dorang. Tapi waktu Yohanes lia pa dorang, dia bilang, “Ee, ngoni orang-orang jahat. Ngoni pe jahat sama deng ular bisa. Jang ngoni kira kalu ngoni so datang kamari dapa baptis, ngoni bole mo dapa lolos dari Tuhan Allah pe hukuman.

Lukas 2:25

Waktu itu di Yerusalem, ada satu orang dia pe nama Simeon. Dia itu hidup butul pa Tuhan Allah pe muka deng dia dengar-dengaran pa Tuhan Allah. Deng dia ada tunggu waktu yang nanti Tuhan Allah mo kase slamat pa bangsa Israel. Kong Roh Kudus salalu sama-sama deng dia.

Roma 15:5

Tuhan Allah yang biking orang bole tetap percaya biar dapa siksa, deng yang kase smangat orang pe hati supaya lebe tamba kuat iko pa Dia. Kita minta pa Dia supaya Dia tolong pa ngoni la ngoni bole hidup satu hati deng ngoni pe sudara yang sama-sama percaya, iko Kristus Yesus pe cara hidup.

Roma 3:25

Tuhan Allah utus pa Kristus Yesus di dunia ini supaya Dia mati kong Dia pe dara tatumpa di kayu salib. Tuhan Allah biking bagitu supaya Yesus dapa hukuman yang sebenarnya musti manusia yang dapa, kong deng bagitu Dia kase ampun manusia pe dosa asal dorang percaya pa Yesus. Waktu Yesus bolong mati, Tuhan Allah masi sabar deng manusia yang biking dosa. Tapi kalu Dia tara perna hukum orang yang berdosa, Dia tara adil. Jadi deng Yesus mati di kayu salib, Tuhan Allah kase tunju, Dia itu adil.

Roma 3:4

Yang pasti tara bagitu! Biar samua orang tukang bafoya, Tuhan Allah tetap setia deng Dia pe janji. Tuhan Allah itu salalu butul sama deng yang ada tatulis di Kitab Suci, “Samua yang Tuhan Allah bilang itu butul, kong kalu ada yang mo kase sala pa Dia, Tuhan Allah pasti menang.”

Roma 5:5

Kong karna torang so baharap deng yakin pa Tuhan Allah, torang tau, torang tara akan kecewa karna Tuhan Allah akan kase samua yang Dia janji. Torang so tau itu butul karna Tuhan Allah so kase Roh Kudus yang bakarja di torang pe hati sampe torang bole rasa Dia pe sayang yang basar.

Filipi 2:1

Sudara-sudara, ngoni so percaya pa Yesus Kristus, jadi Dia so biking ngoni pe hati kuat. Ngoni pe hati sanang karna Dia sayang pa ngoni. Ngoni so hidup satu hati satu deng yang laeng karna Roh Kudus yang pimpin pa ngoni. Ngoni me baku-baku sayang, deng ada rasa kasiang satu deng yang laeng.

Kolose 1:23

Yang penting, ngoni tetap percaya pa Yesus Kristus deng jang ragu. Percaya turus Kabar Bae tentang Yesus Kristus yang ngoni so dengar itu. Kabar Bae itu suda yang biking torang yakin, torang mo dapa apa yang Tuhan Allah so janji pa Dia pe umat. Kabar Bae itu so tasiar di seluru dunia, kong kita ini, Paulus yang Tuhan Allah so pili untuk kase tau Kabar Bae itu.

Kolose 1:27

Yang Tuhan Allah kase mangarti pa dorang itu, Dia pe rencana yang paling hebat deng luar biasa pa ngoni orang-orang bukang Yahudi. Dia pe rencana itu bagini: Yesus Kristus tinggal di ngoni pe hati, jadi ngoni bole baharap deng yakin, nanti ngoni me sama-sama deng Dia di Dia pe tampa yang luar biasa.

Kolose 1:5

Ngoni percaya deng sayang macam bagitu, barang ngoni so yakin, ngoni akan tarima apa yang Tuhan Allah so kase sadia untuk ngoni di sorga. Ngoni jadi yakin itu, mulai dari pertama kali ngoni dengar ajaran yang butul, itu Kabar Bae tentang Yesus Kristus.

1 Tesalonika 1:10

deng ngoni me tunggu-tunggu Anak Allah yang mo datang ulang dari sorga. Dia itu suda Yesus, yang biar so mati tapi Tuhan Allah so kase hidup ulang pa Dia. Yesus itu suda yang kase slamat pa torang yang percaya pa Dia dari Tuhan Allah pe hukuman nanti.

1 Timotius 1:1

Timotius, salam dari kita Paulus, Kristus Yesus pe utusan yang orang sebut rasul. Kita jadi rasul, itu karna iko Tuhan Allah deng Kristus Yesus pe parenta. Tuhan Allah itu yang kase slamat pa torang, deng Kristus Yesus itu yang jadi torang pe harapan.

1 Timotius 6:12

Ngana musti berusaha turus percaya pa Tuhan Allah, sama deng orang yang iko lomba yang berusaha mo dapa piala. Tuhan Allah so pangge pa ngana untuk hidup deng Dia slama-lamanya. Waktu Tuhan Allah pangge pa ngana, ngana mangaku sunggu-sunggu percaya pa Yesus Kristus di orang banya pe muka.

2 Timotius 2:13

Tapi biar torang tara setia, Dia tetap setia, karna samua yang Dia so janji tara mungkin Dia tara biking.”

Titus 1:2

Kita ajar pa orang-orang yang percaya itu, supaya dorang bole baharap deng yakin, dorang bole dapa hidup deng Tuhan Allah slama-lamanya, sama deng Tuhan Allah so janji. Karna waktu Tuhan Allah bolong biking dunia ini, Dia so janji kamuka, Dia mo kase hidup slama-lamanya pa orang-orang yang percaya pa Dia. Dia pe janji itu pasti jadi, karna Tuhan Allah tara perna bafoya.

Ibrani 11:7

Nuh me percaya pa Tuhan Allah, jadi Tuhan Allah kase tau pa dia akan ada banjir basar. Biar Nuh bolong perna lia macam bagitu, tapi Nuh dengar-dengaran pa Tuhan Allah, jadi dia biking kapal satu yang basar skali untuk kase slamat pa dia deng dia pe keluarga. Kong karna Nuh biking kapal itu, itu jadi tanda dia percaya apa yang Tuhan Allah bilang. Jadi jelas, orang-orang yang tara dengar-dengaran pa Tuhan Allah pantas dapa hukum dari Tuhan Allah. Deng karna Nuh pe percaya itu, dia bole dapa apa yang Tuhan Allah janji, kong Tuhan Allah biking dia jadi orang yang tara sala pa Tuhan Allah pe muka.

Ibrani 3:11

Dorang biking Kita mara bagitu sampe Kita basumpa bagini, ‘Dorang itu tara akan bisa maso di tana yang Kita so janji pa dorang la dorang baistrahat sama-sama deng Kita di situ.’ ”

Ibrani 3:6

Tapi Yesus Kristus lebe berkuasa dari nabi Musa. Barang, Yesus Kristus itu Anak Allah yang setia pa Tuhan Allah pe umat, sama deng ana satu yang berkuasa pa samua dia pe papa pe ruma. Kong torang ini sama deng Tuhan Allah pe ruma sandiri, asal torang bapegang kuat deng tong pe percaya, deng torang yakin torang akan dapa apa yang Tuhan Allah so janji mo kase pa torang. Itu yang biking torang pe hati sanang.

Ibrani 6:17

Bagitu lagi deng Tuhan Allah. Waktu Tuhan Allah bajanji pa Dia pe umat, Tuhan Allah suka kase kuat torang pe hati la torang tau, Dia pe rencana tara perna beruba. Jadi Dia basumpa pake Dia pe nama supaya jelas, apa yang Dia so janji itu, pasti Dia biking.

Ibrani 7:19

Aturan-aturan di lima kitab Musa itu tara berhasil biking manusia pe hubungan deng Tuhan Allah jadi sempurna. Tapi skarang, torang so ada tampa baharap yang lebe bae. Itu Yesus suda, Dia yang biking torang bole badekat deng Allah.

Ibrani 7:21

Tapi waktu Tuhan Allah angka pa Yesus Kristus jadi Imam, Dia kase kuat deng sumpa. Dia basumpa bagini, “Kita ini Tuhan Allah! Kita basumpa, Kita tara akan ruba apa yang Kita bilang ini, ‘Ngana itu Imam untuk slama-lamanya.’ ”

1 Yohanes 1:10

Kalu torang bilang torang tara perna biking dosa, itu sama saja deng torang so bilang Tuhan Allah pangbafoya kong Dia pe firman tarada di torang pe hati.

1 Yohanes 5:10

Sapa saja yang percaya pa Anak Allah, di dia pe hati dia so tarima apa yang Tuhan Allah so kase tau tentang Dia pe Anak. Tapi sapa saja yang tara percaya pa Tuhan Allah, dia biking Tuhan Allah sama deng pangbafoya, barang dia tara percaya apa yang Tuhan Allah so kase tau tentang Dia pe Anak.