Ibrani 4:16 - Perjanjian Baru Bahasa Melayu Maluku Utara

¹⁶ Karna itu, jang torang tako lagi, tapi mari suda torang badekat untuk berdoa pa Tuhan Allah, torang pe Raja yang pe hati bae. Torang berdoa pa Dia itu, supaya Dia tolong pa torang sampe torang tarima Dia pe rasa kasiang deng Dia pe bae, pas di waktu yang torang perlu.

Ibrani 4:16 ပူးပေါင်းရင်းမြစ်များ

Efesus 2:18

Barang, karna Yesus Kristus itu, torang samua dapa pintu maso untuk badekat pa Tuhan Allah torang pe Bapa. Kong Roh Kudus yang ada pa torang samua pe hati itu suda yang tolong pa torang untuk badekat deng Dia.

Efesus 3:12

Kong karna torang so percaya pa Yesus Kristus, torang dapa pintu maso untuk badekat pa Tuhan Allah, deng torang tara usa tako tapi bole yakin Dia akan tarima pa torang.

Ibrani 13:6

Deng karna Tuhan Allah so bilang bagitu, torang bisa yakin kong bilang bagini, “Tuhan itu yang salalu tolong pa kita, jadi kita tara akan tako. Manusia tara bisa biking apa-apa pa kita!”

Ibrani 3:6

Tapi Yesus Kristus lebe berkuasa dari nabi Musa. Barang, Yesus Kristus itu Anak Allah yang setia pa Tuhan Allah pe umat, sama deng ana satu yang berkuasa pa samua dia pe papa pe ruma. Kong torang ini sama deng Tuhan Allah pe ruma sandiri, asal torang bapegang kuat deng tong pe percaya, deng torang yakin torang akan dapa apa yang Tuhan Allah so janji mo kase pa torang. Itu yang biking torang pe hati sanang.

Ibrani 7:19

Aturan-aturan di lima kitab Musa itu tara berhasil biking manusia pe hubungan deng Tuhan Allah jadi sempurna. Tapi skarang, torang so ada tampa baharap yang lebe bae. Itu Yesus suda, Dia yang biking torang bole badekat deng Allah.

Ibrani 7:25

Kong karna Dia Imam slama-lamanya, Dia ada kuasa kase slamat pa orang-orang yang mau datang pa Tuhan Allah, dari skarang sampe slama-lamanya. Dia kase slamat pa torang, barang Dia hidup slama-lamanya untuk kase berdoa pa torang pa Tuhan Allah.

Ibrani 9:5

Di atas Kotak Perjanjian itu, ada patong dua yang pe model sama deng malaekat yang orang jaga bilang kerub. Kerub dua itu jadi lambang Tuhan Allah yang hebat ada di situ. Kerub dua itu pe sayap ada tabuka lebar kong tutu Kotak Perjanjian itu pe panutu, di tampa yang imam jaga kase percik dara untuk Tuhan Allah kase ampun orang pe dosa-dosa. Tapi skarang bukang dia pe waktu untuk carita samua itu.

1 Petrus 2:10

Dulu, ngoni itu bukang Tuhan Allah pe umat, tapi skarang ngoni so jadi Dia pe umat. Dulu ngoni me bolong tarima Tuhan Allah pe rasa kasiang, tapi skarang ngoni so tarima Dia pe rasa kasiang itu.