Ibrani 4:12 - Perjanjian Baru Bahasa Melayu Maluku Utara

¹² Barang, Tuhan Allah pe firman itu hidup deng ada kuasa. Firman itu bisa nilai samua torang pe pikiran deng torang pe maksut yang ada di torang pe hati. Tara ada satu yang bisa torang sambunyi. Firman itu lebe tajam dari parang yang muka-balakang tajam skali. Itu kalu kase pake bapotong, bisa sampe kase tabuka isi deng tulang-tulang samua.

Ibrani 4:12 ပူးပေါင်းရင်းမြစ်များ

Lukas 8:11

Ini umpama tadi itu pe arti: bibit itu Tuhan Allah pe firman.

Yohanes 12:48

Sapa saja yang tara tarima pa Kita, deng yang tara tarima Kita pe ajaran, dorang itu mo dapa hukum. Kong nanti di hari kiamat, Tuhan Allah yang mo hukum pa dorang pake Kita pe ajaran itu nanti.

Yohanes 6:51

Kita ini suda makanang yang so turung dari sorga, yang bole kase hidup pa manusia. Sapa saja yang makang makanang ini, dia akan dapa hidup deng Tuhan Allah slama-lamanya. Kong makanang yang Kita mo kase itu, Kita pe badan suda, yang Kita mo kase pa samua orang di dunia ini supaya dorang bole hidup.”

Kisah Para Rasul 2:37

Waktu orang banya dengar apa yang Petrus bilang itu, dorang manyasal skali kong tanya pa Petrus deng pa rasul-rasul yang laeng, “Sudara-sudara, torang so sala, jadi skarang torang musti biking apa, supaya Tuhan Allah jang hukum pa torang?”

Kisah Para Rasul 4:31

Pe abis berdoa, ruma yang dorang pake bakumpul itu tagoyang, kong Roh Kudus kuasai pa dorang samua. Abis itu, dorang pigi kase tau Tuhan Allah pe Kabar Bae tentang Yesus pa orang-orang deng barani.

Kisah Para Rasul 5:33

Pe dengar Petrus puji pa Yesus deng tudu dorang yang bunu pa Yesus, kumpulan Mahkama Agama itu mara skali, sampe dong biking rencana untuk bunu pa rasul-rasul itu.

Kisah Para Rasul 7:38

Musa ini suda yang ada bajalang sama-sama deng torang pe orang tua dulu-dulu di padang gurun. Waktu di gunung Sinai, ada malaekat yang bicara deng dia, kong dia yang kase sampe malaekat pe bicara itu pa torang pe orang tua dulu-dulu. Dia kase tau pa dorang, Tuhan Allah pe firman yang bisa biking sampe torang hidup deng Tuhan Allah slama-lamanya.

Roma 1:16

Kita tara tako kase tau Kabar Bae tentang Yesus Kristus pa orang-orang, karna Kabar Bae itu ada kuasa dari Tuhan Allah yang bisa kase slamat pa samua orang yang percaya dari dosa-dosa. Kong bukang cuma orang Yahudi saja yang mo dapa slamat, tapi orang-orang yang bukang Yahudi lagi mo dapa slamat.

1 Korintus 1:24

Tapi biar bagitu, ada orang Yahudi deng orang yang bukang Yahudi yang Tuhan Allah pangge jadi Dia pe umat. Kong untuk dorang samua, Kabar Bae tentang Yesus Kristus itu yang kase tunju Tuhan Allah pe kuasa, deng Tuhan Allah pe hikmat.

2 Korintus 2:17

Torang tara mampo biking tugas ini deng tong pe kekuatan sandiri. Barang torang tara sama deng banya orang laeng, yang kalu kase tau Tuhan Allah pe firman, cuma mo cari doi. Tapi torang, kalu torang kase tau Tuhan Allah pe firman, torang biking deng hati bersi. Tuhan Allah sandiri yang kase tugas ini pa torang deng Dia yang lia torang kase tau Tuhan Allah pe firman pa orang-orang, karna torang percaya pa Yesus Kristus.

2 Korintus 4:2

Torang so ambe keputusan, torang tara akan perna pake cara-cara tara bae waktu kase tau Kabar Bae itu, karna cara itu cuma mo biking torang jadi malu. Deng torang tara akan kase bodo pa orang, deng tara akan bicara putar bale tentang Tuhan Allah pe firman. Tapi torang akan kase mangarti butul-butul ajaran itu pa orang, iko Tuhan pe mau. Deng biking bagitu, di dorang pe hati, dorang akan tau sandiri, apa yang torang kase tau itu butul ka tarada.

Efesus 5:13

Tapi waktu torang togor pa orang-orang yang biking sala, kong dorang dengar deng tau itu sala, itu sama deng torang ada pasang lampu di galap supaya bole dapa lia deng jelas.

Efesus 5:26

Yesus Kristus mati, supaya torang Dia pe jemaat bole jadi Dia pe umat yang bersi dari dosa karna torang so dengar Dia pe firman deng torang so dapa baptis.

Efesus 6:17

Ngoni musti yakin Tuhan Allah so kase slamat pa ngoni dari dosa-dosa, karna slamat itu bole kase sama deng topi besi yang tentara pake untuk pele dia pe kapala. Deng ngoni musti salalu siap pake Tuhan Allah pe firman yang Tuhan Allah pe Roh so kase pa ngoni. Kalu ngoni salalu siap bagitu, ngoni itu sama deng tentara yang pegang parang tajam untuk salalu siap lawan dia pe musu.

1 Tesalonika 2:13

Torang lagi salalu bilang tarimakasi pa Tuhan Allah karna waktu torang kase tau pa ngoni Kabar Bae dari Tuhan Allah, ngoni tarima itu deng sanang hati. Ngoni tarima Kabar Bae itu karna ngoni tau, kata-kata itu bukang dari manusia, tapi dari Tuhan Allah. Deng memang itu butul dari Tuhan Allah. Kong Kabar Bae itu bakarja di ngoni pe hati yang percaya pa Yesus Kristus.

1 Tesalonika 5:23

Tuhan Allah yang biking torang pe hati tetap tenang, jadi torang minta supaya Dia biking ngoni jadi Dia pe umat sandiri yang hidup deng hati bersi. Torang minta supaya Dia jaga ngoni pe badan, hati deng jiwa, supaya ngoni tarada sala apa-apa waktu torang pe Tuhan Yesus Kristus datang ulang.

Ibrani 13:7

Ngoni inga pa ngoni pe pemimpin-pemimpin yang so kase tau Tuhan Allah pe firman pa ngoni. Ngoni perhatikan waktu dong masi hidup sampe dong pe ahir hidup, kong ngoni iko suda dong pe percaya pa Tuhan Allah.

Ibrani 6:5

Dorang so perna tau, Tuhan Allah pe firman itu paling bagus, deng dorang lagi so rasa Tuhan Allah pe kuasa yang akan ada di dunia yang baru nanti.

Yakobus 1:18

Tuhan Allah biking torang jadi Dia pe ana-ana itu iko Dia pe mau sandiri, karna torang percaya Dia pe ajaran yang butul. Dia biking torang jadi Dia pe ana-ana supaya torang jadi yang paling penting dari samua yang Dia cipta.

1 Petrus 1:23

barang ngoni ini so dapa hidup yang baru. Ngoni dapa itu bukang dari manusia yang memang mo mati, tapi dari Tuhan Allah yang tetap ada sampe slama-lamanya. Ngoni dapa hidup yang baru itu karna ngoni percaya Tuhan Allah pe firman. Firman itu akan tetap ada turus, kong biking orang bole hidup deng Tuhan Allah slama-lamanya.

Wahyu 1:16

Dia pe tangan kanan ada pegang tuju bintang. Dari Dia pe mulu kaluar satu parang yang dia pe tajam muka balakang. Dia pe muka bacahaya, sama deng cahaya matahari di tenga hari tua.

Wahyu 19:15

Ada parang satu yang tajam kaluar dari Dia pe mulu. Deng parang tajam itu Dia akan kase kala suku-suku bangsa di bumi, kong Dia berkuasa pa dorang deng karas skali, sama deng besi pe karas. Dia akan kase tunju Tuhan Allah Yang Paling Berkuasa pe mara, sama deng orang injang-injang anggur la kase kaluar dia pe aer.

Wahyu 19:21

Abis itu, Dia yang dudu di atas kuda puti itu ka sana bunu pa binatang jahat pe tentara-tentara laeng pake parang tajam yang kaluar dari Dia pe mulu. Kong samua burung datang makang orang-orang yang mati itu pe daging sampe kanyang.

Wahyu 2:16

Jadi ngoni musti bertobat suda dari hal-hal yang sala itu. Barang, kalu ngoni tara bertobat, nanti Kita mo datang pa ngoni kong baku prang deng orang-orang macam bagitu, pake parang yang kaluar dari Kita pe mulu ini.

Wahyu 2:23

Kita akan bunu orang-orang yang jaga iko parampuang itu pe ajaran, supaya samua jemaat akan tau, Kita ini yang tau manusia pe pikiran deng manusia pe isi hati. Kong, Kita mo hukum tiap orang iko deng apa yang dia biking.

Wahyu 20:4

Turus kita lia ada kursi-kursi raja. Orang-orang yang dudu di kursi raja itu, orang-orang yang dapa kuasa untuk adili pa manusia. Kita me lia roh-roh dari orang-orang yang dulu dapa potong kapala kong mati karna dorang kase tau tentang Yesus deng Tuhan Allah pe firman. Orang-orang itu tara perna semba pa binatang jahat deng dia pe patong, jadi dorang me tara perna dapa binatang itu pe cap di dong pe testa deng di dong pe tangan. Tuhan Allah kase hidup ulang pa dorang, turus dong berkuasa sebagai raja sama-sama deng Yesus Kristus selama saribu taong.