Ibrani 4:11 - Perjanjian Baru Bahasa Melayu Maluku Utara

¹¹ Jadi, mari suda torang berusaha supaya torang bole baistrahat sama-sama deng Tuhan Allah. Jang sampe ada satu dari torang yang tara dapa baistrahat itu karna dia iko torang pe orang tua dulu-dulu pe sifat yang tara dengar-dengaran pa Tuhan Allah.

Ibrani 4:11 ပူးပေါင်းရင်းမြစ်များ

Matius 11:12

Mulai dari Yohanes Pembaptis datang sampe skarang, ada orang-orang jahat yang malawang pa orang-orang yang so jadi Tuhan Allah pe umat supaya jang percaya lagi pa Tuhan Allah, deng dorang berusaha kuasai pa orang-orang itu.

Matius 7:13

Yesus bilang lagi, “Maso suda iko pintu yang sempit! Barang, kalu ngoni maso iko pintu yang lebar, itu mo pigi di neraka, dia pe jalang memang gampang, deng banya orang yang iko di situ.

Lukas 13:24

Yesus bilang pa orang-orang di situ, “Ngoni berusaha suda maso iko pintu yang sempit! Barang, banya orang berusaha mo maso iko pintu itu, tapi dorang tara bisa maso.

Lukas 16:16

Orang jaga ajar aturan-aturan yang ada di lima kitab Musa deng yang ada di nabi-nabi pe kitab sampe waktu Yohanes Pembaptis datang. Kong mulai waktu itu, Kabar Bae tentang Tuhan Allah mo Berkuasa sebagai Raja so tasiar di mana-mana. Kong banya orang yang berusaha karas mo jadi Dia pe umat.

Yohanes 6:27

Jang ngoni cuma cari-cari makanang yang biasa torang jaga makang di dunia ini, karna makanang itu capat mo abis deng mo busu. Tapi ngoni musti berusaha karas supaya dapa makanang dari sorga yang tara akan busu, kong bole biking ngoni hidup deng Tuhan Allah slama-lamanya. Makanang itu yang Anak Manusia mo kase pa ngoni, barang Tuhan Allah so kase kuasa itu pa Anak Manusia.”

Kisah Para Rasul 26:19

Jadi raja Agripa, mulai dari Tuhan Yesus kase tunju Dia pe diri pa kita, kita tara perna malawang yang Dia parenta pa kita.

Efesus 2:2

Waktu itu, ngoni hidup masi suka biking dosa sama deng orang yang bolong kanal pa Tuhan Allah, baru ngoni lagi iko Iblis pe mau. Iblis itu setang-setang pe raja yang berkuasa di udara, deng dia itu suda yang skarang ini ada pengaru pa orang-orang yang tara dengar-dengaran pa Tuhan Allah.

Efesus 5:6

Jang ngoni dapa kase bodo dari orang-orang yang bilang kata, hal-hal itu bukang dosa. Barang, Tuhan Allah pasti mo hukum pa orang-orang yang biking hal-hal itu, karna dorang tara dengar-dengaran pa Tuhan Allah.

Filipi 2:12

Sudara-sudara yang kita sayang, waktu kita ada sama-sama deng ngoni, ngoni salalu dengar-dengaran pa Tuhan Allah. Lebe-lebe skarang kita so jao dari ngoni, jadi ngoni musti tetap dengar-dengaran pa Dia. Ngoni musti berusaha turus hidup deng kalakuang yang pantas untuk orang yang so dapa slamat dari dosa-dosa. Ngoni hidup bagitu deng rasa tako deng hormat pa Tuhan Allah.

Kolose 3:6

Pa orang yang biking samua hal yang jahat macam bagitu, Tuhan Allah jadi mara kong akan hukum pa dorang [yang tara dengar-dengaran pa Dia].

Titus 1:16

Dorang bilang kata, dorang kanal pa Tuhan Allah, padahal dong pe kalakuang itu kase tunju dorang itu tara kanal pa Dia. Orang-orang yang jahat bagitu, dorang tara iko Tuhan Allah pe mau, deng tara mampo biking barang yang bae.

Titus 3:3

Barang, dulu waktu torang bolong percaya pa Yesus, torang tara mangarti apa-apa. Jadi torang malawang pa Tuhan, torang me tapengaru deng hal-hal yang jahat. Napsu deng keinginan yang tara bae so kuasai di torang pe hati kong torang hidup baku mangiri deng orang laeng. Torang jahat pa orang deng torang salalu baku binci.

Ibrani 3:12

Jadi sudara-sudara, ngoni musti ati-ati. Jang sampe ada satu dari ngoni yang pe hati jahat sama deng itu, sampe so tara percaya deng tara iko lagi pa Tuhan Allah yang hidup.

Ibrani 3:18

Kong sapa yang Tuhan Allah bajanji deng basumpa, dorang itu tara akan maso di tana Kanaan yang Tuhan Allah mo kase pa orang percaya untuk baistrahat sama-sama deng Dia? Tantu dorang itu suda yang tara dengar-dengaran pa Tuhan Allah, to?

Ibrani 4:6

Jadi dari ayat-ayat itu so jelas, torang pe orang tua dulu-dulu so kamuka dengar kabar yang bae tentang tana itu, tapi dorang tara jadi maso di situ, karna dorang tara dengar-dengaran pa Tuhan Allah. Tapi biar bagitu, masi ada kesempatan untuk Tuhan Allah pe umat bole baistrahat sama-sama deng Dia.

Ibrani 6:11

Torang mau, ngoni samua tetap smangat biking yang bae itu turus-turus sampe hari kiamat, supaya jelas ngoni akan dapa apa yang ngoni harap dari Tuhan Allah di sorga.

2 Petrus 2:6

Bagitu lagi deng orang-orang di kota Sodom deng kota Gomora dulu yang tara dengar-dengaran pa Tuhan Allah, Tuhan Allah hukum pa dorang pake api sampe dong pe kota samua angus tabakar. Tuhan Allah biking bagitu la orang tau, orang-orang yang tara iko Tuhan Allah pe mau akan dapa hukuman.