Ibrani 3:6 - Perjanjian Baru Bahasa Melayu Maluku Utara

⁶ Tapi Yesus Kristus lebe berkuasa dari nabi Musa. Barang, Yesus Kristus itu Anak Allah yang setia pa Tuhan Allah pe umat, sama deng ana satu yang berkuasa pa samua dia pe papa pe ruma. Kong torang ini sama deng Tuhan Allah pe ruma sandiri, asal torang bapegang kuat deng tong pe percaya, deng torang yakin torang akan dapa apa yang Tuhan Allah so janji mo kase pa torang. Itu yang biking torang pe hati sanang.

Ibrani 3:6 ပူးပေါင်းရင်းမြစ်များ

Matius 10:22

Kong samua orang akan binci pa ngoni karna ngoni iko pa Kita. Tapi orang yang tetap percaya pa Kita sampe dia pe ahir hidup, dia itu yang Tuhan Allah mo kase slamat.

Matius 16:18

Karna itu, Kita kase nama pa ngana Petrus, yang pe arti, batu fandasi yang kuat. Kong di atas batu fandasi itu Kita mo kase badiri Kita pe jemaat. Kong Kita pe jemaat itu akan ada turus, tarada apa-apa yang mampo kase berenti pa dorang, biar itu kuasa kematian.

Matius 24:13

Tapi orang yang tetap percaya pa Kita sampe dia pe ahir hidup, Tuhan Allah mo kase slamat pa dia.

Roma 11:22

Dari samua yang kita so bilang tadi, torang bole tau, Tuhan Allah itu bae, deng Dia lagi tegas kalu kase hukuman. Dia mo hukum pa orang Yahudi yang tara percaya pa Dia, tapi Dia kase Dia pe bae pa ngoni orang bukang Yahudi, asal ngoni tetap percaya pa Dia. Kalu tarada, Tuhan Allah mo buang lagi pa ngoni sama deng cabang yang so potong dari dia pe pohong yang ada tanam di kobong.

Roma 12:12

Ngoni musti sanang suda, karna torang bole baharap deng yakin pa Tuhan. Ngoni musti sabar biar dapa siksa, deng ngoni lagi musti rajin berdoa!

Roma 15:13

Tuhan Allah itu yang biking torang bole baharap deng yakin, apa yang Dia janji Dia akan biking. Karna itu, kita minta pa Tuhan Allah supaya Dia biking ngoni pe hati sanang deng hati tenang, karna ngoni so percaya pa Dia. Kita minta itu supaya Roh Kudus pe kuasa bakarja di ngoni pe hati untuk biking ngoni tatamba baharap deng yakin turus pa Tuhan Allah.

Roma 5:2

Kong karna apa yang Yesus Kristus so biking itu, torang dapa pintu maso untuk dapa Tuhan Allah pe bae asal torang percaya pa Yesus Kristus. Turus torang me bole sanang lagi, karna torang bisa baharap deng yakin nanti torang mo sama-sama deng Tuhan Allah dapa puji deng hormat.

1 Korintus 3:16

Ngoni tau ka tarada, ngoni itu sama deng Tuhan Allah pe Ruma, kong Tuhan Allah pe Roh tinggal pa ngoni.

1 Korintus 6:19

Ngoni so tau to, Roh Kudus tinggal dalam ngoni pe diri, jadi ngoni sama deng so jadi Tuhan Allah pe Ruma yang Roh Kudus tinggal. Tuhan Allah yang kase Roh Kudus itu pa ngoni, kong ngoni pe diri itu bukang ngoni punya sandiri, tapi Tuhan Allah punya.

2 Korintus 6:16

Apa ada hubungan antara Tuhan Allah pe Ruma deng manusia pe tampa semba puji-puji? Tara ada hubungan! Torang orang-orang percaya, tong ini sama deng Tuhan Allah pe Ruma, karna Tuhan Allah yang hidup tinggal di torang pe hati. Itu sama deng Tuhan Allah janji dulu, kong skarang so jadi, “Kita mo tinggal sama-sama deng dorang, deng hidup deng dorang, kong Kita mo jadi dorang pe Tuhan Allah, deng dorang mo jadi Kita pe umat.”

Galatia 6:10

Jadi selama torang masi hidup, mari suda torang biking barang yang bae pa samua orang, lebe-lebe lagi pa torang pe sudara-sudara yang sama-sama percaya.

Galatia 6:9

Jang torang pastiu untuk salalu biking barang yang bae, karna kalu torang tetap biking yang bae, Tuhan mo balas torang pe bae itu di waktu yang Dia so tentukan, itu sama deng petani mo dapa hasil dari apa yang dia so tanam di kobong.

Efesus 3:12

Kong karna torang so percaya pa Yesus Kristus, torang dapa pintu maso untuk badekat pa Tuhan Allah, deng torang tara usa tako tapi bole yakin Dia akan tarima pa torang.

Kolose 1:23

Yang penting, ngoni tetap percaya pa Yesus Kristus deng jang ragu. Percaya turus Kabar Bae tentang Yesus Kristus yang ngoni so dengar itu. Kabar Bae itu suda yang biking torang yakin, torang mo dapa apa yang Tuhan Allah so janji pa Dia pe umat. Kabar Bae itu so tasiar di seluru dunia, kong kita ini, Paulus yang Tuhan Allah so pili untuk kase tau Kabar Bae itu.

1 Tesalonika 5:16

Ngoni pe hati musti sanang turus.

2 Tesalonika 2:16

Yesus Kristus, torang pe Tuhan, deng Tuhan Allah, torang pe Bapa, sayang skali pa torang deng salalu kase kuat torang pe hati sampe torang bole baharap deng yakin torang dapa hidup deng Dia slama-lamanya. Torang bole yakin bagitu, karna torang tau, Yesus Kristus pe bae pa torang.

1 Timotius 3:15

Jadi kalu kita ada alangan kong terlambat datang, kita pe surat so sampe pa ngana kamuka. Deng kita pe surat ini, ngana bole tau, bagimana orang percaya musti hidup sebagai Tuhan Allah pe keluarga. Kita pe maksut bilang Tuhan Allah pe keluarga, itu pe maksut, Tuhan Allah yang hidup pe jemaat. Dia pe jemaat itu yang musti pegang kuat ajaran yang butul, sama deng tiang raja deng fandasi yang biking ruma jadi kuat.

Ibrani 1:2

Tapi skarang, di waktu yang so dekat hari kiamat ini, Tuhan Allah so utus Dia pe Anak sandiri yang bicara langsung pa torang. Dia pe Anak itu yang dulu Tuhan Allah pake untuk biking dunia ini deng samua-samua dunia pe isi. Kong Dia pe Anak itu suda yang Tuhan Allah so tentukan supaya jadi ahli waris dari samua-samua yang ada.

Ibrani 10:19

Sudara-sudara, Yesus Kristus pe dara so tatumpa untuk hapus torang pe dosa-dosa, jadi skarang torang tara usa tako lagi untuk datang pa Tuhan Allah, itu sama deng torang barani maso pa Tuhan Allah pe Ruang Paling Suci.

Ibrani 10:21

Kong Yesus Kristus itu skarang so jadi torang pe Imam Basar yang hebat yang pimpin pa torang samua Tuhan Allah pe umat.

Ibrani 10:23

Mari suda torang tetap pegang kuat torang pe percaya pa Yesus yang torang so akui itu, Dia itu torang pe tampa baharap. Barang, Tuhan Allah itu setia, Dia pasti biking samua yang Dia so janji pa torang.

Ibrani 10:35

Jadi jang ngoni kase tinggal ngoni pe percaya yang kuat itu, karna kalu ngoni setia, ngoni mo dapa upah yang basar dari Tuhan.

Ibrani 11:1

Sudara-sudara, skarang torang bicara tentang apa itu percaya pa Tuhan Allah. Percaya pa Tuhan Allah itu pe arti bagini: torang yakin torang akan tarima apa yang Tuhan Allah so janji pa torang, biar torang bolong dapa lia.

Ibrani 3:14

Barang, kalu torang tetap pegang turus apa yang torang so percaya dari pertama sampe waktu dunia ini kiamat, torang akan dapa bagian dari samua yang ada pa Yesus Kristus.

Ibrani 4:11

Jadi, mari suda torang berusaha supaya torang bole baistrahat sama-sama deng Tuhan Allah. Jang sampe ada satu dari torang yang tara dapa baistrahat itu karna dia iko torang pe orang tua dulu-dulu pe sifat yang tara dengar-dengaran pa Tuhan Allah.

Ibrani 4:14

Skarang ini torang so untung, karna torang so ada Imam Basar yang Paling Hebat. Dia itu suda Yesus Kristus, Anak Allah. Dia yang kase bae-bae torang manusia yang berdosa pe hubungan deng Tuhan Allah. Dia so nae di sorga, kong so ada sama-sama deng Tuhan Allah. Jadi, mari suda torang tetap kuat percaya pa Dia.

Ibrani 4:16

Karna itu, jang torang tako lagi, tapi mari suda torang badekat untuk berdoa pa Tuhan Allah, torang pe Raja yang pe hati bae. Torang berdoa pa Dia itu, supaya Dia tolong pa torang sampe torang tarima Dia pe rasa kasiang deng Dia pe bae, pas di waktu yang torang perlu.

Ibrani 6:11

Torang mau, ngoni samua tetap smangat biking yang bae itu turus-turus sampe hari kiamat, supaya jelas ngoni akan dapa apa yang ngoni harap dari Tuhan Allah di sorga.

Ibrani 6:18

Jadi ada dua hal yang tara perna beruba: pertama, Tuhan Allah pe janji, deng kedua, Dia pe sumpa. Barang, Tuhan Allah tara perna bafoya. Kong karna itu, torang yang cari slamat pa Dia, torang pe hati jadi kuat kong torang bole percaya deng yakin, tong akan tarima samua yang Tuhan Allah so janji pa torang.

Ibrani 7:19

Aturan-aturan di lima kitab Musa itu tara berhasil biking manusia pe hubungan deng Tuhan Allah jadi sempurna. Tapi skarang, torang so ada tampa baharap yang lebe bae. Itu Yesus suda, Dia yang biking torang bole badekat deng Allah.

1 Petrus 1:8

Biar ngoni bolong perna lia pa Yesus Kristus, tapi ngoni sayang pa Dia. Deng biar lagi skarang ngoni tara lia pa Dia, tapi ngoni percaya pa Dia. Ngoni sanang skali, sampe tara bisa bilang pake kata-kata lagi tentang ngoni pe sanang itu.

1 Petrus 2:5

Turus ngoni ini me sama deng batu yang hidup, batu yang Tuhan Allah pake untuk kase badiri Dia pe tampa tinggal. Itu berarti, Tuhan Allah pe Roh Kudus mo tinggal pa ngoni orang-orang yang percaya pe tenga-tenga. Deng ngoni me so jadi sama deng imam-imam yang pe hati bersi pa Tuhan Allah pe muka, jadi ngoni kase persembahan iko Tuhan Allah pe mau. Kong Tuhan Allah sanang tarima ngoni pe persembahan itu karna apa yang Yesus Kristus so biking untuk torang samua.

1 Petrus 4:17

Barang, skarang so dekat dia pe waktu untuk Tuhan Allah mo adili pa samua orang, kong yang kakamuka Dia mo adili itu Dia pe umat sandiri. Jadi kalu Tuhan Allah mo adili pa torang kamuka, bagimana nanti yang mo jadi deng orang-orang yang tara percaya Kabar Bae dari Tuhan Allah?

Wahyu 2:18

Anak Manusia yang dari sorga bilang lagi pa kita, “Yohanes, tulis suda untuk malaekat yang jaga pa jemaat di kota Tiatira. Ngana tulis bagini: Ini pasáng dari Anak Allah, yang pe mata mamanyala sama deng api, deng yang pe kaki mangkilat sama deng tembaga yang ada bakar di api:

Wahyu 2:25

Tapi ajaran yang ngoni so percaya itu, pegang deng iko turus sampe Kita datang ulang.

Wahyu 2:26

Sapa yang menang dari pengaru jahat, deng tetap biking apa yang Kita suru sampe dunia kiamat, Kita mo kase pa dia kuasa untuk berkuasa pa suku-suku bangsa.

Wahyu 3:11

So tara lama lagi Kita mo datang. Jadi jaga turus ngoni pe percaya pa Tuhan Allah supaya hadia makota yang Dia mo kase pa ngoni itu tarada orang yang mo rampas.