Ibrani 2:17 - Perjanjian Baru Bahasa Melayu Maluku Utara

¹⁷ Kong karna Dia mo tolong pa torang yang jadi Dia pe sudara, Tuhan Allah musti biking Yesus jadi sama persis deng torang manusia. Deng karna Yesus so rasa samua yang torang so rasa, Dia bole kase tunju Dia pe rasa kasiang pa torang manusia, sampe bole kase Dia pe diri mati untuk tebus torang pe dosa-dosa. Deng Dia mati itu, Yesus jadi Imam Basar yang setia pa Tuhan Allah supaya torang deng Tuhan Allah pe hubungan jadi bae ulang.

Ibrani 2:17 ပူးပေါင်းရင်းမြစ်များ

Roma 15:17

Kita so percaya pa Kristus Yesus, kong kita bole rasa sanang deng samua tugas yang kita biking untuk Tuhan Allah.

Roma 5:10

Karna dulu, waktu torang masi pangmalawang pa Tuhan Allah, Tuhan Allah sandiri yang kase bae-bae ulang torang pe hubungan deng Dia, deng cara Dia kase Dia pe Anak supaya mati untuk torang. Kong karna torang deng Dia pe hubungan so bae-bae ulang skarang, torang tau, torang pasti akan dapa slamat dari dosa-dosa karna Dia pe Anak so hidup ulang.

Efesus 2:16

Jadi, deng Yesus Kristus so mati di kayu salib, Dia biking torang orang-orang Yahudi deng ngoni orang-orang bukang Yahudi pe hubungan so bae-bae ulang deng Tuhan Allah, kong torang samua so tara baku musu lagi.

Kolose 1:21

Dulu, waktu ngoni bolong percaya pa Tuhan Yesus, ngoni hidup jao dari Tuhan Allah. Waktu itu ngoni pe pikiran deng kalakuang jahat sampe ngoni biking Tuhan Allah jadi ngoni pe musu.

Ibrani 10:21

Kong Yesus Kristus itu skarang so jadi torang pe Imam Basar yang hebat yang pimpin pa torang samua Tuhan Allah pe umat.

Ibrani 2:11

Yesus yang tebus torang manusia pe dosa supaya torang jadi bersi pa Tuhan Allah pe muka. Dia deng torang pe Bapa cuma satu. Karna itu, Dia tara malu bilang, torang ini Dia pe sudara-sudara.

Ibrani 2:14

Ana-ana yang Yesus bilang itu, dorang itu cuma manusia biasa saja. Yesus datang di dunia jadi manusia supaya jadi sama deng dorang. Kong karna Dia jadi manusia, Dia bisa mati. Deng karna Dia mati itu, Dia kase kala pa Iblis, setang-setang pe raja yang ada kuasa biking orang mati.

Ibrani 2:16

Jadi so jelas skali, Yesus datang di dunia bukang untuk tolong pa malaekat-malaekat, tapi Dia datang untuk tolong pa torang, bapa Abraham pe turunan.

Ibrani 3:1

Sudara-sudara yang so jadi Tuhan Allah pe umat, yang so dapa pangge untuk hidup sama-sama deng Dia di sorga, coba ngoni pikir bae-bae tentang Yesus Kristus yang torang so percaya. Dia itu Tuhan Allah pe Utusan deng Dia lagi Imam Basar, karna Dia biking sampe torang manusia deng Tuhan Allah pe hubungan bisa jadi bae ulang.

Ibrani 3:2

Yesus Kristus itu Tuhan Allah pili, kong Dia setia pa Tuhan Allah. Dia pe setia itu bole kase sama deng nabi Musa dulu yang setia layani di Tuhan Allah pe ruma. Tuhan Allah pe ruma itu, Tuhan Allah pe umat suda.

Ibrani 3:5

Nabi Musa memang setia pa Tuhan Allah pe umat sama deng orang karja yang setia pa dia pe tuang. Nabi Musa setia kase tau pa Tuhan Allah pe umat tentang apa yang Tuhan Allah mo biking yang mo jadi nanti.

Ibrani 4:14

Skarang ini torang so untung, karna torang so ada Imam Basar yang Paling Hebat. Dia itu suda Yesus Kristus, Anak Allah. Dia yang kase bae-bae torang manusia yang berdosa pe hubungan deng Tuhan Allah. Dia so nae di sorga, kong so ada sama-sama deng Tuhan Allah. Jadi, mari suda torang tetap kuat percaya pa Dia.

Ibrani 4:15

Barang, Yesus Kristus torang pe Imam Basar itu, Dia mangarti skali torang manusia ini tara kuat kong gampang tagoda biking barang jahat. Karna waktu Dia di dunia, Dia me perna dapa goda macam-macam sama deng torang, cuma Dia tara perna tagoda sampe biking dosa.

Ibrani 5:1

Ngoni so tau to, tiap imam basar agama Yahudi dapa pili dari antara Tuhan Allah pe umat. Kong dia pe tugas tarima umat pe persembahan deng binatang korban persembahan kong serakan pa Tuhan Allah, supaya Tuhan Allah hapus umat pe dosa-dosa. Deng imam biking bagitu, dia kase bae-bae umat yang berdosa pe hubungan deng Tuhan Allah.

Ibrani 5:10

Kong Tuhan Allah angka pa Dia jadi Imam Basar, sama deng Melkisedek dulu.

Ibrani 5:2

Imam basar itu cuma manusia biasa saja, yang bisa saja tagoda biking dosa, jadi dia musti sabar untuk layani pa orang-orang yang bolong tau banya tentang Tuhan Allah pe mau, deng pa orang-orang yang jaga biking dosa.

Ibrani 5:5

Bagitu lagi deng Yesus Kristus. Dia tara angka Dia pe diri sandiri jadi Imam Basar, tapi Tuhan Allah yang angka pa Dia supaya dapa puji deng hormat. Tuhan Allah bilang pa Yesus Kristus bagini, “Ngana Kita pe Anak. Hari ini Kita jadi Ngana pe Papa.”

Ibrani 6:20

Jadi torang tara usa tako lagi mo datang pa Tuhan Allah, karna Yesus Kristus yang so kamuka maso di situ la bicara pa Tuhan Allah untuk torang. Dia jadi torang pe Imam Basar untuk slama-lamanya, sama deng Melkisedek dulu yang jadi imam basar.

Ibrani 7:26

Yesus Kristus itu cocok skali jadi torang pe Imam Basar yang kase bae-bae torang pe hubungan deng Tuhan Allah, barang Dia itu Kudus, Dia tarada sala, deng Dia tara perna biking dosa. Tuhan Allah taru pa Yesus Kristus di tampa yang jao dari orang-orang berdosa, kong Dia angka pa Yesus Kristus di tampa yang paling terhormat di sorga.

Ibrani 7:28

Barang, kalu iko aturan-aturan di lima kitab Musa, orang yang dapa angka jadi imam basar, dorang itu cuma manusia biasa saja yang gampang tagoda biking dosa. Tapi abis Tuhan Allah kase aturan-aturan itu, Dia biking lagi janji yang baru deng sumpa la Dia angka Dia pe Anak sandiri, Yesus Kristus. Dia pe Anak itu sempurna, deng Dia jadi Imam yang kase bae-bae torang pe hubungan deng Tuhan Allah sampe slama-lamanya.

Ibrani 8:1

Yang paling penting dari samua yang kita so bilang itu, bagini: Yesus Kristus itu so jadi torang pe Imam Basar yang kase bae-bae torang pe hubungan deng Tuhan Allah. Dia so dudu di tampa yang terhormat, pa Tuhan Allah yang Paling Berkuasa pe sabla kanan di sorga.

Ibrani 8:3

Barang, tiap imam basar di dunia ini dapa pili untuk biking tugas serakan umat pe binatang korban persembahan deng persembahan laeng pa Tuhan Allah. Bagitu lagi deng Yesus Kristus. Karna Dia torang pe Imam Basar, Dia lagi musti ada persembahan yang Dia kase pa Tuhan Allah.

Ibrani 9:11

Skarang ini, Yesus Kristus so datang kong so jadi Imam Basar untuk kase pa torang samua yang bae dari Tuhan Allah pe janji yang baru itu. Dia tara maso di Tuhan Allah pe Tenda Ibada yang manusia biking di dunia ini, tapi Dia maso di Tuhan Allah pe tampa tinggal di sorga yang lebe hebat deng sempurna.