Ibrani 13:5 - Perjanjian Baru Bahasa Melayu Maluku Utara

⁵ Jang ngoni gila doi, tapi lebe bae ngoni puas suda deng apa yang ada pa ngoni. Barang, Tuhan Allah so perna bilang bagini, “Kita tara akan perna kase biar pa ngana, deng Kita tara akan perna kase tinggal pa ngana sandiri.”

Ibrani 13:5 ပူးပေါင်းရင်းမြစ်များ

Matius 6:19

Yesus bilang lagi, “Jang ngoni kumpul harta di dunia, karna gai deng karat mo kase rusak, deng papancuri mo bulengkar kong ambe harta itu.

Matius 6:25

Yesus bilang lagi, “Karna itu, inga bae-bae yang Kita bilang pa ngoni, tara usa ngoni hawater deng ngoni pe hidup, apa yang ngoni mo makang atau apa yang ngoni mo minum. Ngoni me tara usa hawater deng ngoni pe badan, apa yang ngoni mo pake. Ngoni tau ngoni pe hidup itu lebe penting dari apa yang ngoni mo makang deng minum. Deng ngoni pe badan itu lebe penting dari baju yang ngoni mo pake.

Matius 6:34

Jadi, ngoni tara usa hawater apa yang mo jadi beso, karna beso ada dia pe susa sandiri. Cukup suda susa yang ngoni so rasa hari ini, tara usa lagi bapikir hari beso pe susa.”

Markus 7:22

baku suka deng orang yang bukang dia pe laki atau dia pe bini, golojo orang pe barang, kalakuang jahat, putar bale, napsu tara bae, mangiri, kase tara bae orang pe nama, sombong deng suka malawang.

Lukas 3:14

Di situ, ada lagi tentara-tentara yang datang. Dorang tanya pa Yohanes, “Kalu torang, apa yang torang musti biking?” Kong Yohanes jawab pa dorang, “Jang ancam orang kong ambe dorang pe doi, deng jang tudu orang bilang dong sala la dong kase doi pa ngoni. Rasa puas suda deng ngoni pe gaji yang ngoni tarima.”

Lukas 8:14

Bibit yang jatu di tana yang ada rumpu baduri, itu sama deng orang-orang yang so dengar firman, tapi dorang pe hati tara tenang tentang dong pe hidup, dorang cuma cari harta, deng cuma suka hidup sanang. Jadi firman yang dorang dengar itu dorang tara biking, sampe firman itu tara bawa hasil apa-apa, sama deng bibit yang tara babua.

Roma 1:29

Dorang pe hati ponong deng barang yang tara butul deng barang yang jahat. Dorang golojo samua-samua, cuma pikir yang jahat, mangiri, deng jadi tukang bunu. Kong dorang me jaga baku mara, deng tukang bafoya. Dorang suka orang laeng dapa cilaka deng suka bacarita tara bae tentang orang laeng.

1 Korintus 5:11

Tapi skarang kita tulis pa ngoni ini, kita pe maksut itu, jang ngoni batamang deng orang yang mangaku dia itu tong pe sudara yang percaya, padahal dia salalu biking hal-hal jahat ini: baseks sabarang, golojo orang pe barang kong mau ambe, jaga semba pa dia pe puji-puji, jaga bicara tara bae tentang orang laeng, jaga mabo-mabo, atau yang jaga rampas orang pe barang. Deng orang yang macam bagitu, ngoni tara bole batamang, apalagi mo makang sama-sama.

1 Korintus 6:10

orang yang papancuri, orang yang golojo doi deng harta, orang yang pangmabo, orang yang jaga bicara tara butul tentang orang laeng, deng orang yang rampas orang pe barang. Orang-orang ini tara bisa jadi Tuhan Allah pe umat yang Dia Berkuasa sebagai Raja pa dorang pe hidup.

2 Korintus 4:9

Torang dapa siksa, tapi Tuhan tara perna kase tinggal pa torang sandiri. Biar torang dapa pukul sampe taguling-guling, tapi torang tara mati.

Efesus 5:3

Ngoni itu Tuhan Allah pe umat, jadi jang ngoni baseks sabarang, jang biking hal-hal yang cafarune, deng jang ingin orang pe barang jadi ngoni punya. Samua itu biar cuma sebut saja me jangan, karna itu tara pantas untuk orang-orang yang so jadi Tuhan Allah pe umat.

Efesus 5:5

Ngoni inga suda ini bae-bae: orang yang baseks sabarang, yang biking hal-hal yang cafarune, deng yang ingin orang pe barang jadi dia punya, tara ada yang akan jadi Tuhan Allah deng Yesus Kristus pe umat yang Dia Berkuasa sebagai Raja pa dorang pe hidup, barang dorang lebe kase penting hal-hal itu daripada Tuhan.

Kolose 3:5

Jadi, karna Yesus Kristus so ruba ngoni pe hidup jadi baru, ngoni berenti suda iko dunia pe mau, macam deng: baseks sabarang, biking hal-hal yang cafarune, iko napsu yang tara bae, ingin biking barang yang jahat, deng golojo orang pe barang. Karna kalu torang golojo orang pe barang, itu berarti, torang so kase lebe penting barang itu daripada Tuhan.

1 Timotius 3:3

dia tara pangmabo, dia tara pangmara tapi bae-bae, dia suka baku bawa bae deng orang, deng dia tara gila doi.

2 Petrus 2:14

Dorang pe mata kalu lia parampuang, haga deng napsu. Dorang tara perna puas biking dosa. Dorang jaga goda pa orang-orang yang pe percaya bolong kuat pa Tuhan, supaya iko pa dorang untuk biking yang jahat. Dorang itu tara perna puas deng dong pe barang yang so ada, kong dong me mo ambe orang punya. Dorang itu Tuhan Allah pasti mo hukum!

2 Petrus 2:3

Guru-guru palsu itu gila doi, jadi dorang karang-karang carita la tipu pa ngoni samua, supaya dong dapa doi. Tapi dari dulu, Tuhan Allah so rencana untuk hukum pa dorang. Dorang itu pasti mo mati tapisa dari Tuhan Allah slama-lamanya.

Yudas 1:11

Cilaka suda dorang! Tuhan Allah akan kase hukuman pa dorang nanti karna dorang orang yang jahat macam deng Kain. Dorang me berdosa sama deng Bileam, yang bawa orang Israel biking dosa cuma karna golojo doi. Kong dorang me sama deng Korah yang malawang pa Tuhan Allah, jadi dorang akan dapa hukuman lagi.