Ibrani 13:21 - Perjanjian Baru Bahasa Melayu Maluku Utara21 supaya Dia kase pa ngoni samua yang ngoni perlu la ngoni bisa biking Dia pe mau, deng supaya Yesus Kristus bakarja di torang pe hati la biking torang mampo biking Tuhan Allah pe hati sanang. Puji deng hormat suda pa Dia sampe slama-lamanya! Amin. အခန်းကိုကြည့်ပါ။ |
Ibrani 13:21
53 ပူးပေါင်းရင်းမြစ်များ
Jadi menurut ngoni, dari dua ana itu sapa yang biking dorang pe papa pe mau?” Pemimpin-pemimpin agama Yahudi itu jawab, “Ana yang tua.” Kong Yesus bilang pa dorang, “Karna itu, dengar yang Kita mo bilang pa ngoni ini, orang-orang berdosa yang dong pe karja tagi-tagi pajak, deng parampuang-parampuang tara bae, dorang itu yang kamuka dari ngoni mo jadi Tuhan Allah pe umat yang Dia Berkuasa sebagai Raja.
Kita suka dorang itu jadi satu hati deng Kita, kong Bapa jadi satu deng Kita, supaya dorang itu butul-butul jadi satu hati satu deng yang laeng. Deng bagitu, orang-orang yang tara percaya pa Bapa di dunia ini bole tau, Bapa yang utus pa Kita kong Bapa itu sayang pa dorang, sama deng Bapa sayang pa Kita.
Skarang kita so tarima samua yang kita perlu dari ngoni, mala so talebe-lebe lagi. Samua itu Epafroditus yang bawa. Apa yang ngoni kase pa kita, itu biking Tuhan Allah pe hati sanang, kong apa yang ngoni kase itu pantas Tuhan Allah tarima, sama deng dulu orang bakar binatang korban persembahan yang bobou sadap pa Tuhan Allah.
Cuma Tuhan Allah saja yang tara perna mati. Dia hidup di dalam tarang. Tarang itu tarang skali, sampe orang me tara bole badekat pa Dia. Deng tarada orang yang perna lia pa Dia, deng memang butul tara orang bisa lia pa Dia. Samua hormat untuk Dia, deng samua kuasa ada pa Dia sampe slama-lamanya. Amin!
Di sana ngoni me baku dapa deng orang-orang yang percaya pa Tuhan Allah yang ada bakumpul, dorang itu Dia sebut Dia pe ana-ana yang tua, dorang itu pe nama-nama so tatulis di sorga. Di sana ngoni me baku dapa deng Tuhan Allah, Dia yang mo adili pa samua orang. Ngoni me baku dapa deng orang-orang yang so mati kamuka, yang waktu dong masi hidup, dong jaga biking yang butul pa Tuhan Allah pe muka, kong dorang itu Tuhan Allah so biking dorang jadi sempurna.
Turus ngoni ini me sama deng batu yang hidup, batu yang Tuhan Allah pake untuk kase badiri Dia pe tampa tinggal. Itu berarti, Tuhan Allah pe Roh Kudus mo tinggal pa ngoni orang-orang yang percaya pe tenga-tenga. Deng ngoni me so jadi sama deng imam-imam yang pe hati bersi pa Tuhan Allah pe muka, jadi ngoni kase persembahan iko Tuhan Allah pe mau. Kong Tuhan Allah sanang tarima ngoni pe persembahan itu karna apa yang Yesus Kristus so biking untuk torang samua.
Jadi puji deng hormat suda pa Tuhan Allah, Dia itu cuma satu. Dia yang kase slamat pa torang dari torang pe dosa karna Yesus Kristus torang pe Tuhan. Tuhan Allah pe kuasa paling basar, tara ada yang bisa lawan, deng Dia yang berkuasa untuk ator samua-samua yang ada di dunia ini. Dia tetap bagitu, mulai dari dunia ini bolong ada, skarang deng sampe slama-lamanya. Amin.
Abis itu, kita dengar samua orang deng samua binatang yang ada di sorga, di dunia, di tampa orang mati, deng di dalam laut, bilang bagini, “Torang puji deng hormat pa Tuhan Allah yang dudu di kursi raja, deng pa Anak Domba. Tuhan Allah deng Anak Domba itu luar biasa deng berkuasa sampe slama-lamanya.”
Kong dorang manyanyi puji pa Anak Domba itu deng lagu baru bagini: “Anak Domba ini yang pantas tarima kitab tagulung itu, deng yang pantas buka tuju segel yang talém di kitab itu. Barang, Anak Domba ini so perna dapa bunu, kong Dia pe dara so tatumpa untuk hapus orang-orang pe dosa dari tiap fam, suku, bahasa deng bangsa supaya dorang jadi Dia pe umat.
ကြော်ငြာတွေ