Ibrani 12:23 - Perjanjian Baru Bahasa Melayu Maluku Utara23 Di sana ngoni me baku dapa deng orang-orang yang percaya pa Tuhan Allah yang ada bakumpul, dorang itu Dia sebut Dia pe ana-ana yang tua, dorang itu pe nama-nama so tatulis di sorga. Di sana ngoni me baku dapa deng Tuhan Allah, Dia yang mo adili pa samua orang. Ngoni me baku dapa deng orang-orang yang so mati kamuka, yang waktu dong masi hidup, dong jaga biking yang butul pa Tuhan Allah pe muka, kong dorang itu Tuhan Allah so biking dorang jadi sempurna. အခန်းကိုကြည့်ပါ။ |
Ibrani 12:23
45 ပူးပေါင်းရင်းမြစ်များ
Karna itu sudara-sudara, ngoni musti jaga bae-bae ngoni pe diri, deng jemaat yang Roh Kudus so kase pa ngoni untuk ngoni jaga. Ngoni jaga Tuhan Allah pe jemaat sama deng gembala yang jaga dia pe domba. Jemaat-jemaat itu so jadi Tuhan Allah punya, barang Dia pe Anak Yesus so mati di kayu salib untuk tebus pa torang.
Conto itu pe arti, skarang torang bolong mangarti samua tentang Tuhan Allah, itu sama deng torang ada lia torang pe diri di kaca yang kabur. Tapi nanti kalu torang deng Tuhan Allah so baku lia muka deng muka, torang akan tau samua tentang Dia deng jelas. Skarang torang bolong tau deng sempurna tentang Tuhan Allah, jadi Dia masi kase karunia dari Dia pe Roh, tapi nanti di sorga torang mo tau itu deng sempurna, jadi Tuhan Allah tara perlu kase karunia lagi pa torang, sama deng Dia yang kanal pa tong deng sempurna.
Pa Sunsugos lagi, kita pe tamang karja yang setia, kita minta supaya ngana bantu pa dong dua itu, supaya dong bisa baku bae ulang. Dorang dua itu so berusaha karas sama-sama deng kita. Torang tiga jaga kase tau Kabar Bae tentang Yesus Kristus pa orang-orang. Bagitu lagi deng Klemens deng torang pe tamang-tamang laeng yang so karja sama-sama deng kita untuk kase tau Kabar Bae itu. Dorang samua pe nama-nama so tatulis di buku kehidupan.
Deng kita minta lagi supaya ngoni salalu bilang tarimakasi banya pa Dia, torang pe Bapa. Bapa itu suda yang biking ngoni jadi pantas mo dapa apa yang Dia so janji pa orang-orang yang so jadi Dia pe umat. Kong janji itu, Dia so sadia untuk Dia pe umat di tampa yang tarang, tampa yang Dia Berkuasa sebagai Raja.
Skarang ini kita pe hati sanang saja, karna siksa yang kita dapa waktu kase tau Kabar Bae tentang Yesus Kristus, itu untuk ngoni pe bae. Siksa itu memang musti kita rasa, karna kita karja untuk Yesus Kristus. Deng kalu kita dapa siksa, itu sama saja deng kita ambe bagian dalam siksa yang Yesus Kristus rasa untuk tolong Dia pe jemaat. Jemaat itu sama deng Dia pe badan sandiri.
Kong karna Habel percaya pa Tuhan Allah, jadi dia kase binatang korban persembahan pa Tuhan Allah iko apa yang Tuhan Allah suru, tara sama deng dia pe kaka Kain. Deng karna Habel pe percaya itu, Tuhan Allah tarima deng hati sanang Habel pe persembahan itu, deng bilang, Habel itu so tara sala pa Tuhan Allah pe muka. Jadi biar Habel so mati, dia pe percaya itu jadi conto pa torang. Itu sama saja deng dia masi hidup kong bicara untuk ajar pa torang.
Kong samua orang yang tinggal di bumi mo semba pa binatang itu. Orang-orang yang semba itu, dorang yang pe nama tara tatulis di Anak Domba pe buku kehidupan waktu dunia ini bolong jadi. Buku kehidupan itu, Anak Domba yang so perna dapa bunu pe buku. Di buku itu, Tuhan Allah tulis orang-orang pe nama yang mo dapa hidup deng Tuhan Allah slama-lamanya.
Dorang itu pe hidup bersi pa Tuhan Allah pe muka, itu sama deng laki-laki yang tara perna tidor deng parampuang. Dorang itu jaga iko pa Anak Domba itu di mana saja Dia pigi. Tuhan Allah so tebus pa dorang kamuka dari samua orang, jadi dorang itu so jadi sama deng korban persembahan yang pertama untuk Tuhan Allah deng Anak Domba.
Abis itu, samua orang mati itu pe roh masing-masing tarima dong pe juba puti, kong ada yang bilang pa dorang, supaya tunggu sadiki karna dong pe jumla bolong genap. Barang, masi ada lagi dong pe sudara-sudara yang percaya, deng orang laeng yang jaga biking apa yang Tuhan suru yang nanti mo mati dapa bunu sama deng dorang itu. Waktu itu, baru dong pe jumla jadi genap, kong Tuhan mo hukum pa orang-orang di dunia.
ကြော်ငြာတွေ