Ibrani 12:22 - Perjanjian Baru Bahasa Melayu Maluku Utara

²² Tapi sudara-sudara, ngoni ini so percaya pa Tuhan Yesus yang biking Tuhan Allah pe janji yang baru. Jadi ngoni macam deng so datang di gunung Sion, kota Yerusalem itu. Itu bukang Yerusalem yang ada di dunia, tapi di Tuhan Allah yang hidup pe tampa tinggal di sorga. Kong di situ ngoni baku dapa deng malaekat yang pe banya deng ribu yang bakumpul kong yang puji Tuhan pe nama deng hati sanang.

Ibrani 12:22 ပူးပေါင်းရင်းမြစ်များ

Matius 16:16

Kong Simon Petrus jawab, “Guru itu suda Mesias, Raja yang Tuhan Allah janji mo kase slamat pa manusia. Guru itu Anak Allah yang hidup!”

Matius 5:35

Ngoni me jang basumpa demi bumi, karna bumi itu Tuhan Allah pe tampa taru kaki. Ngoni me jang basumpa demi kota Yerusalem, karna kota itu Tuhan Allah punya, Dia itu Raja yang Basar.

Roma 11:26

Kalu orang bukang Yahudi so percaya pa Yesus Kristus, itu baru samua orang Yahudi me akan jadi percaya kong dapa slamat dari dosa-dosa. Dorang mo dapa slamat itu, barang ada tatulis di Kitab Suci bagini, “Nanti ada satu Orang yang datang kase slamat pa orang-orang, Dia datang dari gunung Sion. Dia mo hapus orang Yahudi pe kajahatan, orang Yahudi itu, Yakub pe turunan.”

Roma 9:26

Kong ada lagi tatulis bagini tentang orang-orang yang bukang Yahudi, “Di daera yang dulu Kita bilang dorang bukang Kita pe umat, di situ me nanti Kita bilang dorang itu Kita pe ana-ana. Kita itu Tuhan Allah yang hidup.”

Galatia 4:26

Tapi Sara itu bukang pembantu yang Abraham punya, jadi bole kase sama deng torang yang percaya pa Tuhan Yesus karna torang tara musti iko aturan-aturan di lima kitab Musa sama deng aturan itu suru-suru pa torang. Sara itu bole mo kase sama deng kota Yerusalem yang baru di sorga, di mana torang samua orang yang percaya pa Tuhan Yesus mo pigi, torang orang-orang yang so bebas dari aturan-aturan di lima kitab Musa.

Efesus 2:19

Jadi sudara-sudara yang bukang Yahudi, ngoni itu bukang lagi sama deng orang asing atau orang pendatang, tapi ngoni itu so jadi Tuhan Allah pe umat, deng ngoni itu so termasuk Tuhan Allah pe keluarga.

Filipi 3:20

Tapi torang ini orang-orang yang so tahitung di sorga, beda deng dorang. Kong dari situ, Tuhan Yesus Kristus yang torang tunggu-tunggu akan datang ulang. Dia itu yang kase slamat pa manusia.

1 Tesalonika 1:9

Orang-orang itu sandiri bacarita, ngoni tarima bae-bae pa torang waktu torang bawa Kabar Bae pa ngoni. Dorang me carita bagimana sampe ngoni so kase tinggal ngoni pe puji-puji, kong so semba pa Tuhan Allah yang hidup deng yang butul,

2 Timotius 4:18

Tuhan Allah kase lapas pa kita dari samua orang pe rencana yang jahat, yang mo biking kita cilaka. Dia mo bawa pa kita di sorga, di situ Dia Berkuasa sebagai Raja. Dia itu suda yang torang puji deng hormat sampe slama-lamanya! Amin.

Ibrani 10:31

Ii, pe dengar Tuhan Allah bilang itu, torang jadi tako skali kalu mo dapa hukum dari Tuhan Allah yang hidup!

Ibrani 11:10

Abraham bole batahang hidup sebagai pendatang, karna dia ada tunggu-tunggu deng yakin mo tinggal di kota yang baru di sorga yang Tuhan Allah biking iko Dia pe rencana sandiri. Kota itu pe fandasi kuat skali.

Ibrani 11:16

Tapi tampa tinggal yang dorang rindu itu, tampa tinggal yang lebe bagus. Tampa tinggal itu, sorga suda. Karna itu, Tuhan Allah tara malu waktu dorang bilang, Dia itu dorang pe Tuhan Allah, barang Dia so kase sadia kota itu untuk dorang tinggal.

Ibrani 13:14

Barang, di dunia ini torang tara punya tampa tinggal yang tetap untuk torang tinggal slama-lamanya, tapi torang tunggu-tunggu deng rindu mo dapa tampa tinggal yang tetap untuk torang tinggal nanti di sorga.

Ibrani 3:12

Jadi sudara-sudara, ngoni musti ati-ati. Jang sampe ada satu dari ngoni yang pe hati jahat sama deng itu, sampe so tara percaya deng tara iko lagi pa Tuhan Allah yang hidup.

Ibrani 9:14

Jadi kalu dara deng abu binatang saja bisa kase bersi orang pe dosa-dosa, apalagi deng Yesus Kristus pe dara! Yesus Kristus so kase Dia pe diri sandiri pa Tuhan Allah jadi korban persembahan yang sempurna. Yesus Kristus jadi korban yang sempurna, barang Roh Kudus yang ada turus sampe slama-lamanya itu yang biking Dia mampo kase Dia pe diri bagitu. Dia pe dara itu yang kase bersi torang pe hati dari hal-hal yang tarada dia pe guna, supaya torang bole semba pa Tuhan Allah yang hidup.

Yudas 1:14

Dulu, Henokh, Adam pe turunan yang ketuju, ada bilang apa yang Tuhan Allah pasáng pa dia bagini, “Perhatikan e, Tuhan mo datang deng Dia pe malaekat-malaekat kudus deng ribu.

Wahyu 14:1

Abis itu, kita lia Anak Domba badiri di gunung kacil satu, gunung itu pe nama Sion. Anak Domba itu badiri sama-sama deng Dia pe umat saratus ampa pulu ampa ribu. Di orang-orang itu pe testa ada tatulis Anak Domba pe nama deng Dia pe Bapa pe nama.

Wahyu 21:10

Turus, Tuhan Allah pe Roh kuasai pa kita kong malaekat itu bawa pa kita di gunung basar satu yang tinggi pe puncak. Kong dia kase tunju pa kita, Yerusalem, Tuhan Allah pe kota yang kudus. Kita lia kota itu turung dari sorga, dari Tuhan Allah.

Wahyu 21:2

Kita lia lagi Tuhan Allah pe kota yang kudus, Yerusalem Baru itu, turung dari sorga, dari Tuhan Allah. Kota itu bagus skali sama deng pengantin parampuang yang barias untuk dia pe pengantin laki-laki.

Wahyu 22:19

Bagitu lagi, kalu ada orang yang kase kurang apa-apa yang so tatulis di kitab ini tentang yang mo jadi nanti, Tuhan Allah me akan ambe orang itu pe bagian di kota kudus itu, deng dia tara bole makang bua pohong yang biking orang hidup deng Tuhan Allah slama-lamanya.”

Wahyu 3:12

Sapa yang menang dari pengaru jahat, Kita akan biking dong tinggal di Tuhan Allah pe Ruma di sorga slama-lamanya. Sama deng satu tiang yang kuat skali di ruma yang biking ruma tetap kuat, tarada satu yang bisa kase kaluar pa dorang lagi. Pa dorang pe badan, Kita akan tulis Tuhan Allah pe nama. Kong Kita mo tulis pa dong lagi Tuhan Allah pe kota pe nama, kota Yerusalem Baru. Kota itu Tuhan Allah akan kase turung dari sorga. Turus Kita mo tulis lagi pa dorang itu Kita pe nama baru.

Wahyu 7:2

Malaekat ampa itu so dapa kuasa untuk kase rusak tana deng laut. Tapi kita lia lagi ada malaekat laeng muncul dari timur, tampa matahari nae. Malaekat itu ada bawa Tuhan Allah yang hidup pe cap, kong cap itu untuk orang yang jadi Tuhan Allah pe umat. Malaekat itu bicara kuat-kuat pa malaekat ampa yang laeng itu bagini,