Ibrani 12:2 - Perjanjian Baru Bahasa Melayu Maluku Utara

² Mari suda torang biking turus sama deng orang yang iko lomba itu, jang lia kiri-kanan tapi lia pa Yesus turus. Barang, Dia yang pimpin pa torang, supaya torang bole percaya pa Tuhan Allah, deng Dia yang biking torang pe percaya jadi sempurna. Waktu dapa salib, Dia tetap batahang. Deng biar Dia dapa hina, Dia tara peduli, karna Dia tau, abis itu, Dia akan sanang. Skarang, Dia so ada di tampa yang terhormat, pa Tuhan Allah pe sabla kanan di sorga.

Ibrani 12:2 ပူးပေါင်းရင်းမြစ်များ

Matius 16:21

Mulai dari itu, Yesus bilang turus tarang pa Dia pe murit-murit, Dia musti pigi di kota Yerusalem, kong di sana Dia mo dapa banya siksa dari tua-tua Yahudi, imam-imam kapala deng guru-guru agama Yahudi yang ahli lima kitab Musa. Dorang itu mo bunu pa Dia, tapi di hari ketiga Tuhan Allah mo kase hidup ulang pa Dia.

Matius 20:28

Itu sama deng Anak Manusia yang dari sorga datang di dunia ini bukang untuk dapa layani, tapi untuk layani deng kase diri mati la tebus orang banya pe dosa.”

Markus 14:36

Dia bilang bagini, “Papa e, ya Bapa, Kita tau samua Bapa bisa biking, tarada yang tara bisa. Jadi Kita minta Bapa kase jao samua penderitaan ini dari Kita, tapi jang iko Kita pe mau, iko saja Bapa pe mau.”

Markus 15:28

Yang Yesus dapa salib sama-sama deng orang jahat, itu iko apa yang so tatulis memang di Kitab Suci, yang dia pe bunyi bagini, “Dorang biking pa Dia sama deng orang jahat.”]

Markus 16:19

Abis Tuhan Yesus bicara pa Dia pe murit-murit, Dia taangka ka sorga, kong dudu di tampa yang terhormat pa Tuhan Allah pe sabla kanan.

Markus 9:12

Yesus bilang pa dorang bagini, “Memang, nabi Elia itu akan datang kamuka supaya kase siap samua-samua. Tapi ada lagi tatulis, to? Anak Manusia yang dari sorga akan banya menderita deng akan dapa tolak.

Markus 9:24

Turus ana itu pe papa langsung bilang kuat-kuat bagini, “Tuhan, kita percaya, tapi masi kurang. Jadi tolong pa kita la kita lebe percaya lagi.”

Lukas 17:5

Turus, Tuhan Yesus pe murit-murit yang orang sebut rasul itu, bilang bagini pa Tuhan Yesus, “Guru, kase tamba kuat ka torang pe percaya!”

Lukas 23:11

Kong Herodes deng dia pe tentara-tentara mulai ejek deng hina pa Yesus, kong dorang kase pake pa Dia juba bagus yang sama deng raja-raja jaga pake. Turus, dorang kase bale ulang Dia pa Pilatus.

Lukas 24:26

Nabi-nabi so bilang Mesias, Raja yang Tuhan Allah janji mo kase slamat pa manusia, Dia itu musti dapa siksa dulu, baru Dia dapa puji deng hormat di sorga.”

Yohanes 1:29

Dia pe beso, Yohanes lia Yesus sementara datang pa dia. Kong Yohanes bilang pa orang-orang yang ada di situ, “Coba ngoni lia, Dia yang datang kamari itu Tuhan Allah mo kase jadi korban, sama deng domba pe ana yang torang orang Israel biasa kase korban untuk hapus dosa.

Yohanes 12:24

Inga bae-bae yang Kita bilang ini. Apa yang mo jadi pa Kita nanti, Kita ambe conto bagini: kalu orang tanam gandum pe biji, biji itu tara batumbu kalu tara isi dalam tana. Itu sama deng biji itu mati dulu baru mo batumbu, abis itu baru dia mo babua banya.

Yohanes 12:32

Kong Kita, kalu Kita dapa angka di atas bumi, Kita mo biking sampe samua orang bole percaya pa Kita.”

Yohanes 13:3

Yesus tau Dia pe Bapa so kase samua kuasa pa Dia. Dia me tau Dia itu datang dari Tuhan Allah, Dia pe Bapa, kong Dia lagi nanti mo bale ulang pa Tuhan Allah.

Yohanes 6:40

Barang, ini yang Kita pe Bapa mau: Dia mau supaya tiap orang yang lia pa Dia pe Anak kong percaya pa Anak itu, dorang itu mo dapa hidup deng Tuhan Allah slama-lamanya, deng nanti di hari kiamat, Kita mo kase hidup ulang pa dorang.”

Yohanes 8:56

Ngoni pe orang tua dulu-dulu Abraham sanang skali waktu dia masi hidup, barang dia tau Tuhan Allah pe janji, nanti dia mo lia Kita datang. Kong skarang waktu Kita datang, Abraham so lia Kita so datang, jadi dia sanang skali.”

Kisah Para Rasul 2:36

Tuhan Allah so bilang bagitu, jadi ngoni samua sudara-sudara orang Israel, ngoni musti tau butul-butul, Yesus yang ngoni perna salib itu, Dia itu suda Mesias, Raja yang Tuhan Allah janji mo kase slamat pa manusia, deng Dia itu me Tuhan.”

Kisah Para Rasul 3:15

Ngoni so bunu pa Yesus. Padahal Dia itu yang biking torang samua bisa hidup. Tapi Tuhan Allah so kase hidup ulang pa Dia. Torang ini so lia deng torang pe mata kapala sandiri, Dia so hidup ulang.

Kisah Para Rasul 5:31

Yesus itu suda yang Tuhan Allah so angka kong taru di tampa yang terhormat pa Tuhan Allah pe sabla kanan. Skarang Yesus so jadi Pemimpin deng yang kase slamat pa torang orang Israel, supaya torang bertobat kong iko pa Tuhan Allah, deng bagitu Tuhan Allah mo kase ampun pa torang.

Kisah Para Rasul 5:41

Pe kaluar dari Mahkama Agama pe tampa urus perkara, rasul-rasul itu sanang skali karna Tuhan Allah anggap dorang pantas dapa siksa karna iko pa Tuhan Yesus.

1 Korintus 1:18

Ada orang yang bapikir, Kabar Bae tentang Yesus mati di kayu salib untuk tebus manusia pe dosa, itu orang bodo pe carita. Dorang itu mo tapisa deng Tuhan Allah slama-lamanya. Tapi untuk torang yang so dapa slamat karna percaya Kabar Bae itu, torang tau, Kabar Bae itu ada kuasa dari Tuhan Allah untuk kase slamat pa manusia.

1 Korintus 1:23

Tapi torang, torang kase tau Kabar Bae tentang Yesus Kristus yang mati di kayu salib supaya orang dapa slamat dari dosa. Kabar Bae itu biking orang-orang Yahudi rasa tersinggung, sama deng batu yang biking dong pe kaki tagate. Turus, orang yang bukang Yahudi rasa Kabar Bae itu tarada guna, kata, itu cuma orang bodo pe carita.

Efesus 2:16

Jadi, deng Yesus Kristus so mati di kayu salib, Dia biking torang orang-orang Yahudi deng ngoni orang-orang bukang Yahudi pe hubungan so bae-bae ulang deng Tuhan Allah, kong torang samua so tara baku musu lagi.

Efesus 5:2

Ngoni musti hidup baku-baku sayang, sama deng Kristus Yesus me sayang pa torang sampe Dia serakan Dia pe diri mati untuk torang. Kong apa yang Dia biking itu Tuhan Allah tarima, sama deng korban persembahan yang bobou sadap yang biking Tuhan Allah pe hati sanang.

Filipi 1:6

Kong kita yakin, Tuhan Allah yang so mulai bakarja di ngoni pe hati, Dia itu suda yang akan turus bakarja biking yang bae pa ngoni sampe di hari Kristus Yesus datang ulang yang kedua kali.

Filipi 3:20

Tapi torang ini orang-orang yang so tahitung di sorga, beda deng dorang. Kong dari situ, Tuhan Yesus Kristus yang torang tunggu-tunggu akan datang ulang. Dia itu yang kase slamat pa manusia.

2 Timotius 4:8

Satu conto lagi, kalu orang iko lomba kong juara, dia dapa hadia. Bagitu lagi deng kita, Tuhan so kase sadia kita pe hadia karna Dia lia kita hidup butul pa Dia pe muka. Hadia itu Dia simpang kong nanti Dia mo kase pa kita di hari yang Dia mo adili pa samua orang deng adil. Hadia itu bukang cuma kita yang mo dapa, tapi samua orang yang percaya yang tunggu-tunggu Dia datang lagi, dorang me mo dapa.

Ibrani 1:13

Kong tara perna Tuhan Allah bicara pa malaekat-malaekat sama deng Dia bicara pa Dia pe Anak macam bagini, “Dudu suda di tampa yang terhormat, pa Kita pe sabla kanan, sampe Kita kase kala Ngana pe musu-musu samua.”

Ibrani 1:3

Kong deng torang lia pa Anak Allah itu, torang bole dapa lia Tuhan Allah pe kuasa yang luar biasa. Karna kalu torang so dapa lia pa Dia, itu sama saja deng torang so lia pa Tuhan Allah. Anak Allah itu lagi yang ator samua-samua yang ada di dunia ini pake Dia pe bicara yang ada kuasa. Dia me yang kase Dia pe diri mati, supaya kase ampun manusia pe dosa. Abis itu, Dia nae di sorga, dudu di tampa yang terhormat, pa Tuhan Allah Yang Paling Berkuasa pe sabla kanan.

Ibrani 10:14

Barang, deng Dia kase korban Dia pe diri satu kali saja, Dia so biking orang-orang percaya jadi sempurna sampe slama-lamanya, dorang itu yang Dia sementara biking jadi Dia pe umat sandiri yang bersi dari dosa.

Ibrani 10:33

Ada dari ngoni yang dapa hina deng dapa siksa di orang banya pe muka, kong ada lagi dari ngoni yang bantu ngoni pe tamang yang dapa siksa, sampe dorang dapa siksa sama deng yang ngoni dapa lagi.

Ibrani 11:36

Ada lagi orang yang karna dorang percaya pa Tuhan Allah, dorang dapa hina deng ada yang dapa pukul deng tali yang ada barang tajam di dia pe ujung, sampe ada yang dapa rante kong dapa maso penjara.

Ibrani 12:3

Jadi coba ngoni inga bae-bae apa yang Yesus Kristus so biking: Dia sabar turus waktu dapa pukul deng dapa sengsara dari orang-orang berdosa. Dia tarima samua itu, supaya ngoni pe percaya tetap kuat deng ngoni tara ilang smangat.

Ibrani 13:13

Jadi, mari suda torang iko pa Yesus Kristus saja, biar orang hina pa torang bagimana lagi macam deng dong biking pa Yesus Kristus di luar kota Yerusalem.

Ibrani 5:9

Deng Yesus biking bagitu, Tuhan Allah so biking Dia jadi sempurna, supaya Dia yang bisa kase slamat pa sapa saja yang dengar-dengaran pa Dia untuk slama-lamanya.

Ibrani 7:19

Aturan-aturan di lima kitab Musa itu tara berhasil biking manusia pe hubungan deng Tuhan Allah jadi sempurna. Tapi skarang, torang so ada tampa baharap yang lebe bae. Itu Yesus suda, Dia yang biking torang bole badekat deng Allah.

Ibrani 8:1

Yang paling penting dari samua yang kita so bilang itu, bagini: Yesus Kristus itu so jadi torang pe Imam Basar yang kase bae-bae torang pe hubungan deng Tuhan Allah. Dia so dudu di tampa yang terhormat, pa Tuhan Allah yang Paling Berkuasa pe sabla kanan di sorga.

Ibrani 9:28

Bagitu lagi Yesus Kristus mati cuma satu kali saja, Dia mati itu supaya jadi korban persembahan untuk hapus banya orang pe dosa-dosa. Kong Dia akan datang lagi yang kedua kali, bukang untuk hapus manusia pe dosa-dosa, tapi untuk kase slamat pa orang-orang yang ada tunggu-tunggu Dia mo datang ulang.

Yakobus 2:1

Sudara-sudara, torang ini so percaya pa Yesus Kristus, torang pe Tuhan yang hebat. Jadi, jang pili-pili orang.

1 Petrus 1:11

Yesus Kristus pe Roh yang ada pa nabi-nabi itu yang kase tau pa dorang tentang Dia mo dapa sengsara, deng abis itu dapa puji deng hormat. Jadi, nabi-nabi itu me cari tau lagi bagimana deng tempo apa itu mo jadi.

1 Petrus 3:18

Barang, Yesus Kristus me so dapa siksa, biar Dia tara biking sala. Dia lagi so mati satu kali untuk hapus torang samua pe dosa. Dia itu salalu biking barang yang butul, untuk orang-orang yang biking barang yang tara butul, supaya Dia bole kase bae-bae ulang torang pe hubungan deng Tuhan Allah. Dia dapa bunu waktu Dia jadi manusia, tapi Roh Kudus so kase hidup ulang pa Dia.

1 Petrus 3:22

Kong skarang, Yesus Kristus so nae ka atas di sorga, so dudu di tampa yang terhormat, pa Tuhan Allah pe sabla kanan. Kong samua malaekat, samua yang ada kuasa, deng samua yang ada pengaru, ada di bawa Yesus Kristus pe kuasa.

Yudas 1:21

Tuhan Allah sayang pa ngoni, jadi ngoni musti tetap yakin Dia pe sayang itu. Ngoni me musti tunggu-tunggu Yesus Kristus torang pe Tuhan datang ulang. Waktu Dia datang ulang, Dia mo kase tunju Dia pe rasa kasiang pa torang supaya torang bole hidup deng Tuhan Allah slama-lamanya.

Wahyu 1:11

Suara itu bilang pa kita bagini, “Yohanes, tulis suda samua yang Kita mo kase tunju pa ngana ini di satu kitab, kong kirim di tuju jemaat ini: jemaat di kota Efesus, kota Smirna, kota Pergamus, kota Tiatira, kota Sardis, kota Filadelfia deng di kota Laodikia.”

Wahyu 1:17

Waktu kita lia pa Dia, kita jatu di tana pas pa Dia pe kaki, sama deng orang mati. Tapi Dia taru Dia pe tangan kanan pa kita deng bilang bagini, “Yohanes, jang ngana tako! Kita ini so ada dari pertama waktu dunia bolong ada, deng tetap ada lagi sampe ahir jaman.

Wahyu 1:8

Tuhan Allah bilang bagini, “Kita ini, Alfa deng Omega, yang pe arti, mulai dari pertama dunia ini bolong ada, Kita so ada, kong Kita so ada skarang, deng sampe dunia abis, Kita tetap ada. Kita Yang Paling Berkuasa.”

Wahyu 2:8

Anak Manusia yang dari sorga bilang lagi pa kita, “Yohanes, tulis suda untuk malaekat yang jaga pa jemaat di kota Smirna. Ngana tulis bagini: Ini pasáng dari Yang Pertama deng Yang Ahir, yang so perna mati, kong so hidup ulang: