Ibrani 11:7 - Perjanjian Baru Bahasa Melayu Maluku Utara

⁷ Nuh me percaya pa Tuhan Allah, jadi Tuhan Allah kase tau pa dia akan ada banjir basar. Biar Nuh bolong perna lia macam bagitu, tapi Nuh dengar-dengaran pa Tuhan Allah, jadi dia biking kapal satu yang basar skali untuk kase slamat pa dia deng dia pe keluarga. Kong karna Nuh biking kapal itu, itu jadi tanda dia percaya apa yang Tuhan Allah bilang. Jadi jelas, orang-orang yang tara dengar-dengaran pa Tuhan Allah pantas dapa hukum dari Tuhan Allah. Deng karna Nuh pe percaya itu, dia bole dapa apa yang Tuhan Allah janji, kong Tuhan Allah biking dia jadi orang yang tara sala pa Tuhan Allah pe muka.

Ibrani 11:7 ပူးပေါင်းရင်းမြစ်များ

Matius 2:12

Abis itu, Tuhan Allah kase mimpi pa orang-orang yang pintar lia bintang itu. Tuhan Allah bilang pa dorang supaya jang bale ulang pa raja Herodes. Jadi, dorang pulang pa dong pe daera iko jalang laeng.

Matius 24:15

Yesus bilang lagi, “Nanti ada satu orang yang paling malawang pa Tuhan Allah mo datang. Orang itu mo badiri di tampa yang kudus di dalam Ruma Ibada Pusat, sama deng yang Tuhan Allah so perna bilang pa nabi Daniel dulu. (Sapa yang baca ini, perhatikan bae-bae la bole mangarti dia pe arti!)

Matius 24:25

Jadi inga bae-bae e, samua ini Kita so bilang kamuka pa ngoni sebelum itu jadi.

Matius 24:38

Waktu itu, dorang tara tau banjir basar mo datang, jadi dong hidup sama biasa, dong makang deng minum sama biasa, deng dong kawing sama biasa. Dorang pe hidup cuma babagitu turus sampe waktu nabi Nuh maso di kapal basar.

Matius 3:7

Ada lagi banya orang Yahudi dari aliran Farisi deng aliran Saduki datang pa Yohanes la mo minta Yohanes baptis pa dorang. Tapi waktu Yohanes lia pa dorang, dia bilang, “Ee, ngoni orang-orang jahat. Ngoni pe jahat sama deng ular bisa. Jang ngoni kira kalu ngoni so datang kamari dapa baptis, ngoni bole mo dapa lolos dari Tuhan Allah pe hukuman.

Lukas 17:26

Kong nanti, waktu Dia mo datang ulang, orang-orang pe hidup akan sama deng waktu jaman nabi Nuh dulu.

Roma 1:17

Kabar Bae itu ada kuasa dari Tuhan Allah, karna Kabar Bae itu kase tau bagimana supaya torang bole jadi orang yang tara sala pa Tuhan Allah pe muka. Dia pe cara, torang musti percaya pa Tuhan Allah, tarada cara laeng. Itu sama deng yang so tatulis di Kitab Suci bagini, “Orang yang percaya pa Tuhan, dia itu yang Tuhan biking jadi orang yang tara sala pa Tuhan pe muka, kong dia yang mo hidup deng Tuhan Allah slama-lamanya.”

Roma 10:6

Tapi, ada lagi yang nabi Musa tulis yang bilang, torang bole jadi orang yang tara sala pa Tuhan Allah pe muka kalu torang percaya. Dia tulis, “Jang ngoni bilang dalam hati bagini, ‘Musti ada satu orang yang nae ka sorga.’ ” Kalu ngoni bilang bagitu, itu dia pe maksut mo bawa Yesus Kristus turung kamari dari sorga supaya kase tau cara orang dapa slamat.

Roma 3:22

torang bole jadi orang yang tara sala pa Dia pe muka karna torang percaya pa Yesus Kristus. Itu mo jadi pa samua orang yang percaya, karna Tuhan Allah tara pili-pili orang.

Roma 4:11

Jadi Abraham so percaya dulu pa Tuhan Allah, baru dia dapa sunat. Kong sunat itu yang jadi tanda, Tuhan Allah so tarima pa dia jadi orang yang tara sala karna dia pe percaya pa Tuhan Allah. Deng karna dia pe percaya itu, Abraham jadi samua orang yang percaya pe papa. Biar orang-orang yang percaya itu tara sunat, Tuhan Allah tetap tarima pa dorang jadi orang yang tara sala, karna dorang pe percaya.

Roma 4:13

Tuhan Allah janji mo kase dunia pa Abraham deng pa dia pe turunan, bukang karna Abraham jaga iko aturan di lima kitab Musa, tapi karna Abraham percaya pa Tuhan Allah, itu sampe Tuhan Allah biking dia jadi orang yang tara sala pa Tuhan Allah pe muka.

Roma 9:30

Karna itu, torang bole bilang bagini: orang-orang yang bukang Yahudi, dorang tara berusaha supaya jadi orang yang butul pa Tuhan Allah pe muka. Tapi, biar bagitu, ada dari dorang yang percaya pa Yesus Kristus sampe Tuhan Allah biking dorang itu jadi orang yang tara sala pa Dia pe muka.

Galatia 5:5

Tapi sudara-sudara, Roh Kudus bakarja di torang pe hati jadi torang percaya Tuhan Allah mo biking torang jadi orang yang tara sala pa Dia pe muka. Itu suda yang torang tunggu-tunggu.

Filipi 3:9

deng bole hidup satu hati deng Dia. Tuhan Allah biking kita jadi orang yang tara sala pa Dia pe muka, bukang karna kita berusaha iko aturan-aturan di lima kitab Musa, tapi itu cuma karna kita percaya pa Yesus Kristus. Jadi, cuma deng percaya saja pa Yesus Kristus, kita jadi orang yang tara sala pa Tuhan Allah pe muka.

Ibrani 11:1

Sudara-sudara, skarang torang bicara tentang apa itu percaya pa Tuhan Allah. Percaya pa Tuhan Allah itu pe arti bagini: torang yakin torang akan tarima apa yang Tuhan Allah so janji pa torang, biar torang bolong dapa lia.

Ibrani 12:25

Jadi, ngoni musti dengar bae-bae pa Tuhan Allah yang bicara pa ngoni, jang ngoni tolak pa Dia. Barang, dulu-dulu itu, orang-orang Israel tara peduli deng Tuhan Allah pe kata-kata yang nabi Musa bilang pa dorang di dunia, jadi dorang dapa hukum. Apalagi deng torang ini, torang pasti tara akan bebas dari Tuhan Allah pe hukuman kalu torang tara mau dengar Tuhan Allah yang dari sorga pe bicara.

Ibrani 5:7

Waktu Yesus Kristus hidup di dunia ini, Dia berdoa kong minta sunggu-sunggu sampe babataria deng mamanangis pa Tuhan Allah yang punya kuasa untuk kase lapas pa Dia dari kematian. Tuhan Allah dengar Dia pe doa itu, barang Dia butul-butul iko Tuhan Allah pe mau.

Ibrani 8:5

Imam-imam pe tugas yang dong biking di Tuhan Allah pe Tenda Ibada di dunia itu cuma gambaran atau conto saja deng apa yang mo jadi di sorga nanti. Jadi itu sama deng dulu, waktu nabi Musa mo biking Tenda Ibada itu, Tuhan Allah bilang pa dia, “Inga e! Ngana biking Tenda itu sama persis deng yang Kita so kase tunju pa ngana di atas gunung.”

1 Petrus 3:20

Roh-roh itu, orang-orang mati pe roh yang waktu jaman Nuh dong tara dengar-dengaran pa Tuhan Allah. Waktu itu Nuh ada biking kapal basar. Sementara itu, Tuhan Allah tunggu deng sabar la manusia jaman itu mo ruba dong pe kalakuang yang tara bae, tapi dorang tara mau. Karna itu, waktu banjir basar datang, cuma delapan orang yang maso di kapal itu kong slamat.

2 Petrus 1:1

Sudara-sudara yang percaya, salam dari kita Simon Petrus. Kita ini orang yang jaga biking apa yang Yesus Kristus suru, deng kita ini me Dia pe utusan yang orang sebut rasul. Yesus Kristus itu Tuhan Allah, deng Dia me yang kase slamat pa torang dari dosa-dosa. Dia itu yang biking sampe ngoni percaya pa Dia sama deng torang yang so percaya pa Dia, karna Dia salalu biking barang yang butul.

2 Petrus 2:5

Bagitu lagi deng orang-orang yang tara iko pa Tuhan Allah waktu jaman Nuh. Tuhan Allah tara kase biar dorang malawang turus pa Dia, tapi Dia hukum pa dorang deng banjir basar. Kong cuma Nuh deng dia pe keluarga tuju orang yang Tuhan Allah kase slamat dari banjir basar itu, barang Nuh yang kase tau Tuhan Allah pe pasáng kong suru dorang biking yang butul.

2 Petrus 3:6

Kong deng aer lagi Tuhan Allah kase ancor dunia ini deng banjir basar.