Ibrani 11:10 - Perjanjian Baru Bahasa Melayu Maluku Utara

¹⁰ Abraham bole batahang hidup sebagai pendatang, karna dia ada tunggu-tunggu deng yakin mo tinggal di kota yang baru di sorga yang Tuhan Allah biking iko Dia pe rencana sandiri. Kota itu pe fandasi kuat skali.

Ibrani 11:10 ပူးပေါင်းရင်းမြစ်များ

Yohanes 14:2

Pa Kita pe Bapa pe ruma ada banya tampa, kong Kita pigi ka sana untuk kase siap ngoni pe tampa itu. Kita kase tau itu pa ngoni, karna memang ngoni pe tampa itu ada di sana.

2 Korintus 5:1

Torang pe badan di dunia ini sama deng ruma yang tong tinggal tara lama. Jadi torang tau, waktu torang orang percaya mati, itu sama deng tong pe tampa tinggal itu ancor, kong Tuhan Allah nanti kase pa torang tampa tinggal yang baru supaya bole tinggal di sorga. Tampa tinggal itu bukang ruma yang manusia biking, tapi badan yang baru, yang hidup deng Tuhan Allah slama-lamanya.

Filipi 3:20

Tapi torang ini orang-orang yang so tahitung di sorga, beda deng dorang. Kong dari situ, Tuhan Yesus Kristus yang torang tunggu-tunggu akan datang ulang. Dia itu yang kase slamat pa manusia.

Ibrani 11:16

Tapi tampa tinggal yang dorang rindu itu, tampa tinggal yang lebe bagus. Tampa tinggal itu, sorga suda. Karna itu, Tuhan Allah tara malu waktu dorang bilang, Dia itu dorang pe Tuhan Allah, barang Dia so kase sadia kota itu untuk dorang tinggal.

Ibrani 12:22

Tapi sudara-sudara, ngoni ini so percaya pa Tuhan Yesus yang biking Tuhan Allah pe janji yang baru. Jadi ngoni macam deng so datang di gunung Sion, kota Yerusalem itu. Itu bukang Yerusalem yang ada di dunia, tapi di Tuhan Allah yang hidup pe tampa tinggal di sorga. Kong di situ ngoni baku dapa deng malaekat yang pe banya deng ribu yang bakumpul kong yang puji Tuhan pe nama deng hati sanang.

Ibrani 12:28

Jadi mari suda, torang bilang tarimakasi pa Tuhan Allah karna torang so jadi Dia pe umat pa Dia pe kerajaan yang tara akan tagoyang deng ancor slama-lamanya. Mari torang semba pa Tuhan Allah deng cara yang biking Dia pe hati sanang, torang semba deng rasa tako kong hormati pa Dia.

Ibrani 13:14

Barang, di dunia ini torang tara punya tampa tinggal yang tetap untuk torang tinggal slama-lamanya, tapi torang tunggu-tunggu deng rindu mo dapa tampa tinggal yang tetap untuk torang tinggal nanti di sorga.

Ibrani 3:4

Conto itu butul, barang, tiap ruma ada tukang yang biking, tapi samua-samua yang ada di dunia ini, itu Tuhan Allah yang biking.

Wahyu 21:2

Kita lia lagi Tuhan Allah pe kota yang kudus, Yerusalem Baru itu, turung dari sorga, dari Tuhan Allah. Kota itu bagus skali sama deng pengantin parampuang yang barias untuk dia pe pengantin laki-laki.