Ibrani 10:23 - Perjanjian Baru Bahasa Melayu Maluku Utara

²³ Mari suda torang tetap pegang kuat torang pe percaya pa Yesus yang torang so akui itu, Dia itu torang pe tampa baharap. Barang, Tuhan Allah itu setia, Dia pasti biking samua yang Dia so janji pa torang.

Ibrani 10:23 ပူးပေါင်းရင်းမြစ်များ

1 Korintus 1:9

Tuhan Allah mo biking itu samua karna Dia itu setia. Dia yang pangge pa ngoni, supaya ngoni bole hidup satu hati deng Dia pe Anak Yesus Kristus, torang pe Tuhan.

1 Korintus 10:13

Tiap kali ngoni dapa coba untuk biking dosa, ngoni musti inga, samua manusia jaga dapa cobaan macam bagitu. Tapi Tuhan Allah salalu setia deng Dia pe janji pa ngoni, jadi Dia tara akan kase biar ngoni dapa cobaan yang lebe dari yang ngoni mampo tanggung. Waktu ngoni dapa cobaan, Dia akan kase jalang kaluar, supaya ngoni mampo tahang mangada cobaan itu.

2 Korintus 9:13

Jadi waktu ngoni kase doi sumbangan yang talebe-lebe itu, itu biking banya orang mo puji deng hormat pa Tuhan Allah karna dorang lia ngoni butul-butul percaya Kabar Bae tentang Yesus Kristus, deng karna dorang lia ngoni pe hati bae waktu ngoni bakase pa orang laeng.

1 Tesalonika 5:24

Tuhan Allah yang so pangge pa ngoni jadi Dia pe umat, Dia itu setia. Jadi pasti Dia mo biking samua yang Dia so bilang pa torang.

2 Tesalonika 3:3

Tuhan Allah itu setia. Dia mo kase kuat ngoni pe hati deng jaga pa ngoni dari yang jahat.

Titus 1:2

Kita ajar pa orang-orang yang percaya itu, supaya dorang bole baharap deng yakin, dorang bole dapa hidup deng Tuhan Allah slama-lamanya, sama deng Tuhan Allah so janji. Karna waktu Tuhan Allah bolong biking dunia ini, Dia so janji kamuka, Dia mo kase hidup slama-lamanya pa orang-orang yang percaya pa Dia. Dia pe janji itu pasti jadi, karna Tuhan Allah tara perna bafoya.

Ibrani 11:11

Turus karna Abraham pe percaya itu, dia bisa dapa ana cucu dari dia pe bini Sara, padahal Sara itu tara bisa dapa ana, baru dong dua laki bini itu so tua skali. Dorang dua bisa dapa ana, barang Abraham percaya Tuhan Allah itu setia, deng pasti Dia mo biking apa yang Dia so janji, untuk mo kase turunan pa dorang dua.

Ibrani 3:1

Sudara-sudara yang so jadi Tuhan Allah pe umat, yang so dapa pangge untuk hidup sama-sama deng Dia di sorga, coba ngoni pikir bae-bae tentang Yesus Kristus yang torang so percaya. Dia itu Tuhan Allah pe Utusan deng Dia lagi Imam Basar, karna Dia biking sampe torang manusia deng Tuhan Allah pe hubungan bisa jadi bae ulang.

Ibrani 3:14

Barang, kalu torang tetap pegang turus apa yang torang so percaya dari pertama sampe waktu dunia ini kiamat, torang akan dapa bagian dari samua yang ada pa Yesus Kristus.

Ibrani 3:6

Tapi Yesus Kristus lebe berkuasa dari nabi Musa. Barang, Yesus Kristus itu Anak Allah yang setia pa Tuhan Allah pe umat, sama deng ana satu yang berkuasa pa samua dia pe papa pe ruma. Kong torang ini sama deng Tuhan Allah pe ruma sandiri, asal torang bapegang kuat deng tong pe percaya, deng torang yakin torang akan dapa apa yang Tuhan Allah so janji mo kase pa torang. Itu yang biking torang pe hati sanang.

Ibrani 4:14

Skarang ini torang so untung, karna torang so ada Imam Basar yang Paling Hebat. Dia itu suda Yesus Kristus, Anak Allah. Dia yang kase bae-bae torang manusia yang berdosa pe hubungan deng Tuhan Allah. Dia so nae di sorga, kong so ada sama-sama deng Tuhan Allah. Jadi, mari suda torang tetap kuat percaya pa Dia.

Ibrani 6:18

Jadi ada dua hal yang tara perna beruba: pertama, Tuhan Allah pe janji, deng kedua, Dia pe sumpa. Barang, Tuhan Allah tara perna bafoya. Kong karna itu, torang yang cari slamat pa Dia, torang pe hati jadi kuat kong torang bole percaya deng yakin, tong akan tarima samua yang Tuhan Allah so janji pa torang.

Yakobus 1:6

Tapi waktu orang itu minta pa Tuhan, dia musti percaya butul-butul, jang ragu-ragu. Karna orang yang ragu-ragu, dia itu sama deng omba yang angin tiop kasana-kamari.

Wahyu 3:11

So tara lama lagi Kita mo datang. Jadi jaga turus ngoni pe percaya pa Tuhan Allah supaya hadia makota yang Dia mo kase pa ngoni itu tarada orang yang mo rampas.