Ibrani 10:20 - Perjanjian Baru Bahasa Melayu Maluku Utara

²⁰ Yesus Kristus so buka jalang pa torang la tong dapa hidup deng Tuhan Allah slama-lamanya. Dia buka jalang itu waktu Dia kase Dia pe diri mati di kayu salib. Apa yang Dia biking itu, itu sama deng Dia so robe kaeng pampele basar di Ruma Ibada Pusat jadi dua, sampe biking orang so bisa maso di Ruang Paling Suci untuk langsung semba pa Tuhan Allah.

Ibrani 10:20 ပူးပေါင်းရင်းမြစ်များ

Matius 27:51

Di dalam Ruma Ibada Pusat ada kaeng pampele basar yang ada gantong untuk kase pele Ruang Paling Suci la orang biasa tara bole maso. Pas Yesus mati, kaeng itu tarobe jadi dua dari atas sampe ka bawa. Kong itu baku iko deng tana goyang yang kuat skali sampe gunung-gunung batu me tabala.

Markus 15:38

Pas Yesus putus napas itu, kaeng pampele basar yang ada di dalam Ruma Ibada Pusat, tarobe jadi dua dari atas sampe ka bawa.

Lukas 23:45

barang matahari so tara basinar lagi. Kong waktu itu, kaeng pampele basar yang ada gantong untuk pele Ruang Paling Suci di Ruma Ibada Pusat tarobe jadi dua.

Yohanes 10:7

Jadi, Yesus bilang satu kali lagi, “Inga bae-bae yang Kita bilang ini. Kita ini suda yang bole kase sama deng pintu di kandang domba.

Yohanes 10:9

Kita ini pintu. Sapa yang iko pa Kita, dia itu akan slamat. Dia bole kase sama deng domba yang kaluar maso kandang la dapa makanang.

Yohanes 14:6

Kong Yesus bilang pa dia, “Kita ini jalang yang mo pigi pa Tuhan Allah, deng Kita ini yang kase tau yang butul tentang Tuhan Allah, deng Kita lagi yang kase hidup deng Tuhan Allah slama-lamanya. Jadi, tara ada satu orang yang bole pigi pa Tuhan Allah kalu tara iko pa Kita.

Efesus 2:15

Skarang, karna deng Yesus Kristus mati di kayu salib, Dia biking supaya torang yang percaya pa Dia tara perlu lagi iko aturan-aturan di lima kitab Musa untuk dapa slamat dari dosa-dosa. Kong karna itu, torang orang Yahudi yang jaga iko aturan itu, deng ngoni orang yang bukang Yahudi yang tara iko aturan itu, bole jadi satu kelompok yang baru karna torang samua so satu hati deng Yesus Kristus, kong Dia biking torang bole hidup baku bawa bae-bae.

1 Timotius 3:16

Ajaran yang Tuhan Allah kase pa torang itu butul, kong pe bagus skali, tarada yang bisa lawan! Biar dulu orang bolong tau ajaran itu, skarang Tuhan Allah so kase tau pa torang bagini: Yesus so datang jadi manusia. Roh Kudus yang kase tunju pa torang Dia itu Orang yang butul, deng malaekat-malaekat lia pa Dia. Dia pe Kabar so tasiar sampe di bangsa-bangsa laeng, kong orang-orang di dunia ini percaya pa Dia. Tuhan Allah so angka pa Dia di sorga deng cara yang luar biasa.

Ibrani 6:19

Torang pe harapan itu biking torang pe hati kuat deng tenang, sama deng jangkar di laut yang tara tapinda-pinda. Kong karna itu, torang so bole langsung berdoa pa Dia, itu sama deng torang so bole maso pa Tuhan Allah pe Ruang Paling Suci yang dulu orang biasa tara bole maso karna ada pele deng kaeng pampele basar.

Ibrani 9:3

Di dalam Tenda itu, ada kaeng pampele basar satu yang ada gantong untuk kase pele ruang yang pertama deng ruang yang kedua. Ruang yang kedua itu pe nama Ruang Paling Suci.

Ibrani 9:8

Kong deng aturan-aturan itu, Roh Kudus biking tong mangarti, bolong ada jalang la tong badekat pa Tuhan Allah selama masi ada ruang yang pertama deng dia pe pampele itu.

1 Petrus 3:18

Barang, Yesus Kristus me so dapa siksa, biar Dia tara biking sala. Dia lagi so mati satu kali untuk hapus torang samua pe dosa. Dia itu salalu biking barang yang butul, untuk orang-orang yang biking barang yang tara butul, supaya Dia bole kase bae-bae ulang torang pe hubungan deng Tuhan Allah. Dia dapa bunu waktu Dia jadi manusia, tapi Roh Kudus so kase hidup ulang pa Dia.

1 Yohanes 4:2

Torang bisa tau Tuhan Allah pe Roh itu ada pa orang ka tarada, deng cara bagini: orang yang mangaku, Yesus Kristus so datang di dunia jadi manusia, pa dorang itu ada Tuhan Allah pe Roh.

2 Yohanes 1:7

Kita tulis surat ini pa ngoni karna ada banya orang skarang pigi bakuliling di seluru dunia untuk kase sesat orang. Dorang itu tara percaya, Yesus Kristus itu datang di dunia sebagai manusia. Dorang itu pangbafoya deng dong musu pa Yesus Kristus.