Ibrani 10:10 - Perjanjian Baru Bahasa Melayu Maluku Utara

¹⁰ Yesus Kristus ada iko Tuhan Allah pe mau waktu Dia jadi korban persembahan satu kali untuk slama-lamanya. Kong deng Dia kase korban Dia pe diri itu, Dia biking torang jadi Dia pe umat yang bersi dari dosa satu kali untuk slama-lamanya.

Ibrani 10:10 ပူးပေါင်းရင်းမြစ်များ

Yohanes 17:19

Bapa, Kita serakan Kita pe hidup pa Bapa. Kita biking bagitu untuk Kita pe orang-orang yang iko pa Kita, supaya dorang lagi mo serakan dorang pe hidup pa Bapa iko ajaran yang butul itu.”

Yohanes 19:34

Tapi satu dari tentara-tentara di situ tikam Yesus pe lambung deng tombak, kong langsung dara yang baku tacampur deng aer kaluar.

Yohanes 6:51

Kita ini suda makanang yang so turung dari sorga, yang bole kase hidup pa manusia. Sapa saja yang makang makanang ini, dia akan dapa hidup deng Tuhan Allah slama-lamanya. Kong makanang yang Kita mo kase itu, Kita pe badan suda, yang Kita mo kase pa samua orang di dunia ini supaya dorang bole hidup.”

1 Korintus 1:30

Barang, Tuhan Allah sandiri yang buka jalang untuk ngoni, supaya ngoni bole percaya pa Kristus Yesus. Deng bagitu, torang bole tau Tuhan Allah pe rencana yang bijaksana untuk kase slamat pa manusia. Yesus Kristus itu yang biking torang jadi orang yang tara sala pa Tuhan Allah pe muka deng yang biking torang jadi Dia pe umat, deng Yesus me yang tebus torang pe dosa-dosa.

1 Korintus 6:11

Deng ada babarapa dari ngoni yang dulu pe kalakuang tara bae bagitu. Tapi skarang so tarada, karna Tuhan Allah so kase bersi pa ngoni dari dosa. Tuhan Allah so biking ngoni jadi Dia pe umat sandiri deng biking ngoni jadi orang yang tara sala pa Dia pe muka. Tuhan Allah biking samua itu karna Tuhan Yesus Kristus so mati untuk kase slamat pa torang, deng karna Roh dari torang pe Tuhan Allah bakarja di ngoni pe hati.

Efesus 5:2

Ngoni musti hidup baku-baku sayang, sama deng Kristus Yesus me sayang pa torang sampe Dia serakan Dia pe diri mati untuk torang. Kong apa yang Dia biking itu Tuhan Allah tarima, sama deng korban persembahan yang bobou sadap yang biking Tuhan Allah pe hati sanang.

Efesus 5:26

Yesus Kristus mati, supaya torang Dia pe jemaat bole jadi Dia pe umat yang bersi dari dosa karna torang so dengar Dia pe firman deng torang so dapa baptis.

Ibrani 10:12

Tapi Yesus Kristus, cuma satu kali Dia serakan Dia pe diri jadi korban persembahan untuk hapus manusia pe dosa-dosa, kong korban itu berlaku untuk slama-lamanya. Abis itu, Dia dudu di tampa yang terhormat di sorga, pa Tuhan Allah pe sabla kanan.

Ibrani 10:14

Barang, deng Dia kase korban Dia pe diri satu kali saja, Dia so biking orang-orang percaya jadi sempurna sampe slama-lamanya, dorang itu yang Dia sementara biking jadi Dia pe umat sandiri yang bersi dari dosa.

Ibrani 10:20

Yesus Kristus so buka jalang pa torang la tong dapa hidup deng Tuhan Allah slama-lamanya. Dia buka jalang itu waktu Dia kase Dia pe diri mati di kayu salib. Apa yang Dia biking itu, itu sama deng Dia so robe kaeng pampele basar di Ruma Ibada Pusat jadi dua, sampe biking orang so bisa maso di Ruang Paling Suci untuk langsung semba pa Tuhan Allah.

Ibrani 10:29

Orang yang tara iko lima kitab Musa saja dapa hukuman barát bagitu, apalagi orang yang so pandang enteng pa Anak Allah, dia pasti dapa hukuman yang lebe barát lagi karna dia so tolak pa Yesus Kristus. Dia sama deng so injang-injang pa Anak Allah, deng anggap Yesus Kristus pe dara tara arti apa-apa. Padahal, Yesus Kristus pe dara so tatumpa untuk biking janji yang baru antara manusia deng Tuhan Allah, kong dara itu lagi yang biking orang itu jadi Tuhan Allah pe umat yang bersi dari dosa. Jadi orang yang pandang enteng itu so hina pa Roh Kudus, padahal Roh Kudus itu yang Tuhan Allah kase pa torang cuma karna Dia pe bae pa torang.

Ibrani 10:5

Kong karna binatang korban persembahan pe dara itu tara cukup untuk hapus manusia pe dosa, itu yang biking sampe Yesus Kristus bilang bagini waktu Dia datang di dunia, “Tuhan Allah, Tuhan tara mau binatang korban persembahan deng persembahan-persembahan laeng, tapi Tuhan Allah so sadia Kita pe badan untuk jadi persembahan pa Tuhan Allah.

Ibrani 13:12

Dorang bakar bangke di luar tampa tinggal itu, itu bole kase sama deng Yesus Kristus lagi menderita kong mati di luar kota Yerusalem untuk kase Dia pe dara sandiri, supaya biking ngoni jadi Dia pe umat yang bersi dari dosa.

Ibrani 2:11

Yesus yang tebus torang manusia pe dosa supaya torang jadi bersi pa Tuhan Allah pe muka. Dia deng torang pe Bapa cuma satu. Karna itu, Dia tara malu bilang, torang ini Dia pe sudara-sudara.

Ibrani 2:14

Ana-ana yang Yesus bilang itu, dorang itu cuma manusia biasa saja. Yesus datang di dunia jadi manusia supaya jadi sama deng dorang. Kong karna Dia jadi manusia, Dia bisa mati. Deng karna Dia mati itu, Dia kase kala pa Iblis, setang-setang pe raja yang ada kuasa biking orang mati.

Ibrani 5:7

Waktu Yesus Kristus hidup di dunia ini, Dia berdoa kong minta sunggu-sunggu sampe babataria deng mamanangis pa Tuhan Allah yang punya kuasa untuk kase lapas pa Dia dari kematian. Tuhan Allah dengar Dia pe doa itu, barang Dia butul-butul iko Tuhan Allah pe mau.

Ibrani 7:27

Yesus Kristus tara sama deng imam-imam basar laeng. Tiap hari, imam basar laeng itu musti potong binatang la jadi korban persembahan pa Tuhan Allah untuk hapus dia pe dosa sandiri, baru kase korban persembahan untuk hapus orang-orang pe dosa. Tapi Yesus Kristus tara bagitu. Dia kase Dia pe diri sandiri mati di kayu salib. Dia pe diri itu suda yang jadi korban persembahan pa Tuhan Allah untuk tebus samua manusia pe dosa, satu kali untuk slama-lamanya.

Ibrani 9:12

Kong Dia so maso satu kali untuk slama-lamanya di tampa yang kudus itu. Waktu Dia maso itu, persembahan yang Dia bawa, bukang kambing laki-laki atau sapi muda pe dara, tapi Dia bawa Dia pe dara sandiri, kong deng dara itu Dia tebus tong pe dosa-dosa untuk slama-lamanya.

Ibrani 9:14

Jadi kalu dara deng abu binatang saja bisa kase bersi orang pe dosa-dosa, apalagi deng Yesus Kristus pe dara! Yesus Kristus so kase Dia pe diri sandiri pa Tuhan Allah jadi korban persembahan yang sempurna. Yesus Kristus jadi korban yang sempurna, barang Roh Kudus yang ada turus sampe slama-lamanya itu yang biking Dia mampo kase Dia pe diri bagitu. Dia pe dara itu yang kase bersi torang pe hati dari hal-hal yang tarada dia pe guna, supaya torang bole semba pa Tuhan Allah yang hidup.

Ibrani 9:26

Barang, kalu ulang-ulang kali Dia kase korban Dia pe diri, itu berarti, mulai dari dunia ini jadi, Dia musti ulang-ulang menderita turus. Tapi skarang ini, yang orang bilang dunia so mo kiamat, Dia datang di dunia cuma satu kali saja untuk hapus manusia pe dosa-dosa deng cara Dia kase Dia pe diri sandiri mati untuk jadi korban persembahan.

Ibrani 9:28

Bagitu lagi Yesus Kristus mati cuma satu kali saja, Dia mati itu supaya jadi korban persembahan untuk hapus banya orang pe dosa-dosa. Kong Dia akan datang lagi yang kedua kali, bukang untuk hapus manusia pe dosa-dosa, tapi untuk kase slamat pa orang-orang yang ada tunggu-tunggu Dia mo datang ulang.

1 Petrus 2:24

Dia sandiri yang tanggung torang pe dosa waktu Dia mati di kayu salib, supaya torang bole bebas dari dosa pe kuasa, kong torang bole hidup untuk biking barang yang butul pa Tuhan Allah pe muka. Kong karna Dia pe luka-luka itu, torang jadi bae.

1 Petrus 3:18

Barang, Yesus Kristus me so dapa siksa, biar Dia tara biking sala. Dia lagi so mati satu kali untuk hapus torang samua pe dosa. Dia itu salalu biking barang yang butul, untuk orang-orang yang biking barang yang tara butul, supaya Dia bole kase bae-bae ulang torang pe hubungan deng Tuhan Allah. Dia dapa bunu waktu Dia jadi manusia, tapi Roh Kudus so kase hidup ulang pa Dia.

1 Yohanes 5:6

Yesus Kristus itu suda yang Tuhan Allah utus untuk datang di dunia ini. Dia dapa baptis, kong Dia lagi dapa salib sampe Dia pe dara tatumpa. Yesus bukang cuma dapa baptis saja, tapi dapa salib lagi supaya jadi jelas Dia itu dari Tuhan Allah, kong Tuhan Allah pe Roh bilang samua itu butul, barang Roh itu tara perna bafoya.