Filipi 4:12 - Perjanjian Baru Bahasa Melayu Maluku Utara

¹² Kita tau bagimana hidup susa, deng kita me tau bagimana hidup tara kurang apa-apa sampe talebe-lebe lagi. Dalam keadaan apa saja, kita so balajar hidup untuk kase cukup kita pe diri, biar itu waktu kanyang ka, lapar ka, biar itu waktu kita kurang apa-apa ka, atau di waktu kita ada talebe-lebe.

Filipi 4:12 ပူးပေါင်းရင်းမြစ်များ

Matius 11:29

Dengar kong iko suda Kita pe parenta, sama deng sapi yang ada kase pake tali kong iko dia pe tuang pe parenta. Balajar suda dari Kita karna Kita ini bae-bae deng tara sombong, kong ngoni pe hati akan jadi tenang.

Matius 13:52

Kong Yesus bilang pa dorang, “Jadi tiap guru agama yang ahli lima kitab Musa, kong dia lagi tau ajaran tentang Tuhan Allah Berkuasa sebagai Raja, dia itu sama deng tuang ruma yang kase kaluar harta yang baru deng harta yang lama dari dia pe tampa simpang harta.”

2 Korintus 10:1

Kita Paulus, minta pa ngoni supaya ngoni dengar bae-bae yang kita mo bilang ini. Ada dari ngoni yang bilang, kita tara barani togor karas pa ngoni waktu kita ada sama-sama deng ngoni. Kata, kita cuma barani togor karas waktu torang baku jao pake surat. Tapi skarang, sama deng Yesus Kristus pe sifat yang tara sombong deng tara kasar,

2 Korintus 10:10

Karna ada yang bilang bagini, “Jang bapusing deng Paulus. Barang dia cuma tegas deng karas di surat. Tapi kalu so baku dapa langsung, dia pe hati so lombo kong dia pe kata-kata so tara guna.”

2 Korintus 11:27

Kita banya karja banting tulang, laeng kali kita tara tidor-tidor, laeng kali kita tara makang deng minum, laeng kali kita tara ada makanang, deng laeng kali kita tadingin-dingin karna tarada baju tabal.

2 Korintus 11:7

Waktu kita kase tau Kabar Bae dari Tuhan Allah pa ngoni, kita tara minta ngoni bayar pa kita. Tapi kita karja cari kita pe doi sandiri untuk kita pe hidup hari-hari. Kita karja sama deng orang biasa bagitu, itu karna kita hormati pa ngoni la ngoni bole dengar Kabar Bae itu deng cuma-cuma. Jadi apa kita sala tara minta apa-apa dari ngoni? Pasti tarada to?

2 Korintus 11:9

Waktu kita ada sama-sama deng ngoni kong kita kekurangan, kita tara minta dari ngoni biar cuma dari satu orang saja. Karna untuk tutu kita pe kekurangan itu, sudara-sudara yang percaya yang datang dari daera Makedonia yang bantu pa kita. Jadi kita tara jadi beban pa ngoni, deng bagitu kita akan tetap kase tau Kabar Bae itu turus-turus deng cuma-cuma pa ngoni.