Filipi 3:19 - Perjanjian Baru Bahasa Melayu Maluku Utara

¹⁹ Orang-orang yang pe hidup macam bagitu, mo tapisa deng Tuhan Allah slama-lamanya. Orang-orang itu tara iko Tuhan pe mau, mala dorang cuma biking puas dong pe diri sandiri, sampe itu suda yang jadi paling penting pa dorang pe hidup. Dorang biking hal-hal yang sebenarnya biking dong malu, tapi dong pikir dong hebat, dong suka orang puji dong biking bagitu, kong dorang cuma pikir dunia pe mau saja.

Filipi 3:19 ပူးပေါင်းရင်းမြစ်များ

Matius 16:23

Tapi Yesus babale kong togor pa Petrus, “Badiam ngana! Ngana pe bicara sama deng Iblis pe bicara. Ngana halangi Kita untuk biking Tuhan Allah pe mau. Barang, ngana cuma pikir apa yang manusia pikir, bukang apa yang Tuhan Allah pikir.”

Matius 25:41

Turus, Dia mo babilang pa orang-orang yang ada pa Dia pe sabla kiri bagini, ‘Bajao suda dari sini ngoni orang-orang yang Tuhan so kutuk, kong ka sana suda maso di api yang tara mati-mati itu, yang so kase sadia untuk Iblis deng dia pe ana-ana bua.

Lukas 12:19

Abis itu, kita mo bilang pa kita pe diri sandiri: kita mo sante-sante saja. Kita so simpang makanang banya deng barang-barang laeng yang bisa kita pake deng taong-taong. Jadi kita tinggal makang, minum deng hidup sanang-sanang saja.’

Lukas 16:19

Yesus carita umpama satu lagi bagini, “Ada orang kaya satu. Dia salalu pake baju ungu, itu baju bagus dari kaeng alus yang mahal. Tiap hari dia hidup sanang deng dia pe harta.

Lukas 18:4

Hakim itu salalu tolak janda itu pe mau, tapi lama-lama dia bilang di dia pe dalam hati bagini, ‘Biar kita tara tako pa Tuhan Allah deng tara hormati pa sapa-sapa,

Roma 16:18

Barang orang-orang yang macam bagitu, sebenarnya dorang tara karja untuk Yesus Kristus torang pe Tuhan, tapi dorang karja iko dong pe mau sandiri. Dorang buju deng kata-kata yang kase sadap di talinga pa orang yang masi bolong mangarti mana yang bae deng mana yang tara bae, sampe orang-orang me iko pa dorang pe ajaran yang tara butul.

Roma 6:21

Tapi kita tanya pa ngoni e, apa dia pe untung yang ngoni dapa dari dosa yang ngoni jaga biking? Tarada, to? Mala ngoni jadi malu skarang dari apa yang ngoni jaga biking dulu itu. Apalagi dosa itu biking orang mati kong tapisa deng Tuhan Allah slama-lamanya.

1 Korintus 3:3

Barang sampe skarang, ngoni pe kalakuang masi iko manusia pe mau. Kita bilang bagitu, barang ada dari ngoni yang jaga baku mangiri, deng baku-baku ambe. Itu dia pe tanda ngoni masi iko manusia pe mau.

1 Korintus 5:2

Tapi biar ada dari ngoni yang jaga biking bagitu me, ngoni masi saja basombong. Sebenarnya, ngoni musti hati susa skali deng yang dia biking itu, kong ngoni musti kase kaluar saja pa dia dari ngoni pe tenga-tenga.

1 Korintus 5:6

Tara bagus ngoni basombong macam bagitu. Jang sampe ngoni tara sadar, kalu satu orang dari ngoni biking sala, bisa pengaru orang laeng dalam ngoni pe jemaat biking sala lagi. Itu sama deng ragi yang sadiki saja, bisa kase nae adonan.

2 Korintus 11:12

Kita tetap tara akan minta apa-apa dari ngoni, supaya orang-orang yang bilang kata, dorang itu Tuhan pe utusan-utusan yang hebat, tara ada alasan untuk kase puji dong pe diri, kata, dorang itu ada karja untuk layani pa ngoni sama deng torang layani pa ngoni.

2 Korintus 11:15

Jadi jang ngoni herang, orang yang karja untuk Iblis, dorang itu me cuma babafoya biking dong pe diri sama deng orang yang jaga biking barang yang butul. Kong dorang itu nanti mo dapa hukuman yang pantas dari Tuhan Allah, iko apa yang dong so biking.

Galatia 6:13

Padahal, dorang yang iko aturan sunat itu, dorang sandiri tara jaga iko aturan-aturan di lima kitab Musa itu. Tapi dorang berusaha buju pa ngoni iko aturan sunat supaya dorang bole angka diri sandiri deng bilang ngoni itu ada iko dong pe aturan sunat.

Filipi 2:21

Dorang yang laeng itu cuma pikir dong pe diri sandiri saja. Dorang tara pusing deng Yesus Kristus pe mau.

Kolose 3:2

Ngoni pikir suda turus hal-hal yang ada di sorga, bukang hal-hal yang ada di dunia.

2 Tesalonika 1:9

Dorang mo dapa hukuman yang biking dorang rasa siksa sampe slama-lamanya. Dorang mo dapa user dari Tuhan pe muka, jadi dorang so tara mo lia lagi Dia pe kuasa yang luar biasa.

2 Tesalonika 2:12

Tuhan Allah biking bagitu, supaya samua orang yang suka biking barang yang jahat, deng yang tara percaya ajaran yang butul tentang Tuhan Yesus, akan dapa hukum.

2 Tesalonika 2:8

Waktu itu, baru orang jahat itu mo muncul. Tapi waktu Tuhan Yesus datang ulang deng Dia pe kuasa yang hebat, orang jahat itu akan mati slama-lamanya. Tuhan Yesus bunu pa dia deng cara tiop pa dia, langsung dia mati.

1 Timotius 6:5

Orang yang jaga kase ajar ajaran sesat itu, dong pe hidup suka baku malawang, deng dorang itu tara tau apa yang butul, kong dong kira deng hidup iko Tuhan Allah pe mau, dong mo jadi kaya.

2 Timotius 3:4

Dorang suka bahianat, tara bapikir panjang, biking diri tau, deng lebe suka basanang-sanang iko dong pe mau sandiri daripada iko Tuhan Allah pe mau.

Yakobus 4:16

Tapi yang ngoni bicara itu cuma untuk puji ngoni pe diri sandiri saja. Samua itu sala basar.

2 Petrus 2:1

Dulu, ada orang-orang yang muncul di orang Israel pe tenga-tenga, yang bilang kata, dorang itu Tuhan Allah pe nabi yang kase turus Tuhan Allah pe pasáng, padahal dong foya. Kong sama deng itu, skarang ini akan ada lagi di ngoni pe tenga-tenga guru-guru agama palsu. Guru-guru palsu itu mo kase ajar ajaran yang orang kira butul, padahal tarada, kong ajaran itu biking rusak orang pe hidup. Kong bukang cuma itu, orang yang iko ajaran itu me mo manyangkal Tuhan Yesus yang so tebus pa dorang. Jadi, apa yang guru-guru palsu biking itu cuma mo biking dong sandiri capat mati kong tapisa deng Tuhan Allah slama-lamanya.

2 Petrus 2:13

Tuhan Allah akan kase hukuman yang barát pa dorang untuk balas samua yang tara bae yang dorang so biking. Siang-siang me, dorang suka skali biking apa yang cuma kase sanang dong pe diri sandiri. Kong kalu ada acara makang-makang, dorang itu cuma kase puas dong pe diri saja. Dorang tara tau malu, jadi dong biking sampe ngoni jemaat pe nama bae rusak. Deng biking bagitu dorang sama deng noda yang biking kotor di kaeng satu yang bersi.

2 Petrus 2:3

Guru-guru palsu itu gila doi, jadi dorang karang-karang carita la tipu pa ngoni samua, supaya dong dapa doi. Tapi dari dulu, Tuhan Allah so rencana untuk hukum pa dorang. Dorang itu pasti mo mati tapisa dari Tuhan Allah slama-lamanya.

Yudas 1:10

Tapi orang-orang yang bawa ajaran tara butul itu, dorang bicara tara bae tentang samua ajaran yang dong tara mangarti. Dorang itu pe kalakuang sama deng binatang. Dorang itu tara bapikir, tapi iko saja apa yang dong pe badan pe mau. Itu yang nanti biking dong dapa hukuman tapisa deng Tuhan Allah slama-lamanya.

Yudas 1:16

Orang-orang itu cuma mengelu-mengelu deng suka kase sala orang laeng. Dorang hidup cuma iko dong pe keinginan tara bae. Dorang pe bicara angka-angka dong pe diri sandiri, kong suka cari muka deng baambe hati di orang la dorang dapa untung.

Yudas 1:4

Barang, ada orang-orang yang bawa ajaran yang tara butul yang so maso pa ngoni pe jemaat, tapi ngoni tara sadar. Dorang itu tara iko Tuhan Allah pe mau. Dorang memang so tarima ajaran tentang torang pe Tuhan Allah pe bae, tapi dorang kase putar bale ajaran itu la orang bisa iko dorang pe napsu yang tara bae. Deng dorang me manyangkal, Yesus Kristus yang cuma satu itu saja torang pe Tuhan, yang berkuasa pa samua-samua. Orang-orang model bagini, dari dulu ada tatulis di Kitab Suci, dorang memang akan dapa hukuman.

Wahyu 18:7

Orang-orang di kota Babel talalu makang puji deng suka hidup mewa. Jadi dorang musti dapa siksa deng dapa hukuman iko deng dong pe hidup dulu itu. Karna dulu, dorang angka-angka dong pe diri sandiri, dong bilang bagini, ‘Kita ini sama deng raja parampuang yang dudu di kursi raja! Kita akan tara jadi janda! Deng kita me tara akan mamanangis!’

Wahyu 19:20

Tapi, Dia deng Dia pe tentara-tentara langsung tangka pa binatang jahat itu deng tangka pa binatang jahat itu pe nabi palsu. Nabi palsu itu yang perna biking tanda-tanda yang biking orang herang, pake binatang itu pe kuasa. Dia biking tanda-tanda itu la biking sesat pa orang-orang yang so tarima cap dari binatang jahat itu, deng yang so semba pa binatang jahat itu pe patong. Binatang jahat deng nabi palsu itu dapa buang hidup-hidup di api belerang yang luas skali.

Wahyu 21:8

Tapi ada orang-orang yang dapa hukum, dorang itu: orang yang stenga-stenga hati iko pa Tuhan, yang tara percaya, yang jaga biking hal-hal tara bae, yang jaga bunu orang, yang baseks sabarang, yang pake tiop-tiop, yang jaga semba pa dong pe puji-puji, deng samua orang yang pangbafoya. Dorang samua akan dapa hukum, dapa buang di api belerang yang luas deng mamanyala. Itu dia pe nama kematian yang kedua.”

Wahyu 22:15

Tapi ada orang-orang yang tara bole maso di kota itu. Dorang itu: orang yang tara percaya pa Tuhan, orang yang jaga pake tiop-tiop, orang yang baseks sabarang, orang yang jaga bunu orang, orang yang semba dong pe puji-puji, deng tiap orang yang suka bafoya kong biking itu turus-turus.