Filipi 2:8 - Perjanjian Baru Bahasa Melayu Maluku Utara

⁸ Kong waktu Dia jadi manusia, Dia biking Dia pe diri macam deng orang yang tarada arti apa-apa, Dia biking Tuhan Allah pe mau sampe Dia mati, mala sampe mati di kayu salib.

Filipi 2:8 ပူးပေါင်းရင်းမြစ်များ

Matius 17:2

Kong dong tiga lia Yesus pe rupa so beruba jadi laeng. Dia pe muka basinar sama deng matahari, kong Dia pe juba jadi puti mangkilat.

Matius 26:39

Abis itu Yesus bajalang ka sana sadiki, turus Dia berlutut sampe Dia pe muka kanal tana, kong Dia berdoa, “Ya Bapa, kalu bole, jang Kita dapa penderitaan ini. Tapi jang iko Kita pe mau, iko saja Bapa pe mau.”

Matius 26:42

Abis itu, Yesus pigi berdoa lagi yang kedua kali. Dia berdoa bagini, “Ya Bapa, kalu penderitaan ini memang Kita musti dapa, biar suda Bapa pe mau yang jadi!”

Lukas 9:29

Waktu Yesus sementara berdoa, Dia pe muka dapa lia beruba jadi laeng deng Dia pe baju jadi puti mangkilat.

Yohanes 10:18

Tarada orang yang bole ambe Kita pe hidup dari Kita, tapi Kita mo kase Kita pe hidup, iko Kita pe mau sandiri. Kita ada kuasa mo kase Kita pe diri untuk mati, deng Kita lagi ada kuasa mo ambe itu ulang. Barang samua parenta itu Kita so tarima dari Kita pe Bapa.”

Yohanes 14:31

Tapi Kita mo biking apa yang Kita pe Bapa ada parenta pa Kita supaya samua orang di dunia ini bole tau, Kita ini sayang pa Kita pe Bapa. Skarang, badiri suda, kong mari torang pigi dari sini.”

Yohanes 15:10

Kalu ngoni biking Kita pe parenta, ngoni mo rasa turus Kita pe sayang, sama deng Kita biking Kita pe Bapa pe parenta, kong Kita bole rasa turus Dia pe sayang.

Yohanes 4:34

Yesus bilang pa dorang, “Kita pe makanang itu, Kita biking apa yang Tuhan Allah mau. Tuhan Allah itu yang utus pa Kita deng Kita musti kase abis Kita pe karja yang Dia suru Kita biking.

Kisah Para Rasul 8:33

Orang-orang hina pa Dia deng urus Dia pe perkara tara adil. Turus dorang bunu pa Dia, kong tarada orang yang bisa carita Dia pe turunan di dunia ini, barang Dia so dapa bunu.”

Roma 5:19

Karna Adam tara iko Tuhan Allah pe mau, itu biking samua orang berdosa. Tapi karna Yesus Kristus iko Tuhan Allah pe mau, itu biking samua orang bole jadi orang yang tara sala pa Tuhan Allah pe muka.

2 Korintus 8:9

Sebenarnya kita tara perlu suru ngoni bantu pa dorang, barang ngoni so tau Yesus Kristus torang pe Tuhan pe bae yang Dia so kase pa ngoni. Biar Dia punya samua-samua yang ada, tapi karna Dia sayang pa torang, Dia kase tinggal samua itu supaya jadi manusia yang tara punya apa-apa. Dia biking bagitu la torang dapa banya yang bae dari Tuhan Allah.

Galatia 3:13

Kong torang samua pantas dapa kutuk karna torang tara mampo iko samua aturan di lima kitab Musa. Tapi biar bagitu me, Yesus Kristus kase Dia pe diri mati la kase bebas pa torang dari kutuk itu, deng cara Dia kase Dia pe diri dapa kutuk mati untuk torang. Karna di Kitab Suci ada tatulis bagini, “Orang yang dapa hukum mati di kayu salib, dia itu sama deng dapa kutuk dari Tuhan Allah.”

Titus 2:14

Dia yang so serakan Dia pe diri untuk mati la kase bebas pa torang dari torang pe dosa. Dia biking torang pe hati jadi bersi, sampe torang jadi Dia pe umat sandiri yang suka biking barang yang bae.

Ibrani 12:2

Mari suda torang biking turus sama deng orang yang iko lomba itu, jang lia kiri-kanan tapi lia pa Yesus turus. Barang, Dia yang pimpin pa torang, supaya torang bole percaya pa Tuhan Allah, deng Dia yang biking torang pe percaya jadi sempurna. Waktu dapa salib, Dia tetap batahang. Deng biar Dia dapa hina, Dia tara peduli, karna Dia tau, abis itu, Dia akan sanang. Skarang, Dia so ada di tampa yang terhormat, pa Tuhan Allah pe sabla kanan di sorga.

Ibrani 12:4

Waktu ngoni berusaha lawan dosa, ngoni bolong dapa siksa macam deng Yesus Kristus yang pe dara tatumpa.

1 Petrus 2:24

Dia sandiri yang tanggung torang pe dosa waktu Dia mati di kayu salib, supaya torang bole bebas dari dosa pe kuasa, kong torang bole hidup untuk biking barang yang butul pa Tuhan Allah pe muka. Kong karna Dia pe luka-luka itu, torang jadi bae.

1 Petrus 3:18

Barang, Yesus Kristus me so dapa siksa, biar Dia tara biking sala. Dia lagi so mati satu kali untuk hapus torang samua pe dosa. Dia itu salalu biking barang yang butul, untuk orang-orang yang biking barang yang tara butul, supaya Dia bole kase bae-bae ulang torang pe hubungan deng Tuhan Allah. Dia dapa bunu waktu Dia jadi manusia, tapi Roh Kudus so kase hidup ulang pa Dia.