Filipi 1:20 - Perjanjian Baru Bahasa Melayu Maluku Utara

²⁰ Kong yang butul-butul kita ingin deng harap itu, kita barani biking apa saja yang Yesus Kristus suru pa kita, sama deng yang kita so biking dari dulu, supaya kita tara biking apa-apa yang biking malu kita pe diri. Yang penting itu Yesus Kristus dapa puji deng hormat dalam kita pe hidup, waktu kita masi hidup atau kita so mati.

Filipi 1:20 ပူးပေါင်းရင်းမြစ်များ

Yohanes 21:19

Yesus bilang bagitu untuk kase tau bagimana Petrus mo mati nanti. Kong deng Petrus pe cara mati itu, banya orang akan puji deng hormat pa Tuhan Allah. Abis Yesus bilang bagitu, Dia bilang lagi pa Petrus, “Iko suda pa Kita.”

Kisah Para Rasul 20:24

Biar bagitu, kita tara peduli deng kita pe hidup, tapi yang penting kita bisa kase selesai tugas yang Tuhan Yesus suru kita biking. Kita pe tugas itu, kita musti kase tau Kabar Bae tentang Tuhan Allah pe bae pa torang manusia.

Kisah Para Rasul 21:13

Tapi Paulus bilang pa torang, “Bikiapa kong ngoni manangis? Ngoni bagini biking kita pe hati tamba barát. Kita siap pigi di Yerusalem biar apa saja yang mo jadi pa kita di situ. Kita so siap, bukang cuma mo dapa ika saja, tapi kita me so siap mati karna kase tau tentang Tuhan Yesus.”

Kisah Para Rasul 4:31

Pe abis berdoa, ruma yang dorang pake bakumpul itu tagoyang, kong Roh Kudus kuasai pa dorang samua. Abis itu, dorang pigi kase tau Tuhan Allah pe Kabar Bae tentang Yesus pa orang-orang deng barani.

Roma 12:1

Sudara-sudara, Tuhan Allah bagitu kasiang pa torang. Karna itu, kita minta butul-butul pa ngoni: serakan suda ngoni pe diri pa Tuhan Allah untuk iko Dia pe mau, itu sama deng ngoni pe hidup so jadi korban persembahan pa Dia. Ngoni kase ngoni pe hidup jadi Dia punya, deng ngoni hidup untuk biking Dia pe hati sanang. Itu baru bilang ngoni pe ibada itu butul.

Roma 5:5

Kong karna torang so baharap deng yakin pa Tuhan Allah, torang tau, torang tara akan kecewa karna Tuhan Allah akan kase samua yang Dia janji. Torang so tau itu butul karna Tuhan Allah so kase Roh Kudus yang bakarja di torang pe hati sampe torang bole rasa Dia pe sayang yang basar.

Roma 6:13

Deng tara bole ngoni kase biar ngoni pe tangan, kaki deng samua-samua yang ada pa ngoni pe badan untuk dosa kuasai supaya biking barang yang jahat. Tapi ngoni kase ngoni pe diri pa Tuhan Allah supaya biking barang yang butul, karna ngoni sama deng orang yang so mati, kong skarang Dia so kase pa ngoni hidup yang baru. Ngoni kase biar suda ngoni pe tangan, kaki, deng samua-samua yang ada di ngoni pe badan untuk Tuhan Allah pake supaya mo biking barang yang butul.

Roma 6:19

Kita pake conto suru-suru, supaya ngoni bole capat mangarti yang kita bilang itu. Dulu, dosa so jadi ngoni pe tuang yang suru-suru pa ngoni. Ngoni so iko ngoni pe napsu sampe biking hal-hal kotor deng ngoni pe badan, deng ngoni malawang turus-turus Tuhan Allah pe parenta. Tapi skarang, ngoni musti serakan ngoni pe diri jadi Tuhan Allah pe suru-suru supaya ngoni biking turus yang butul pa Tuhan Allah pe muka. Deng bagitu, Tuhan Allah biking ngoni jadi Dia pe umat yang hidup cuma biking Dia pe mau.

Roma 8:19

Karna itu, samua yang Tuhan Allah so cipta di dunia ini, ada tunggu-tunggu waktu Tuhan Allah mo kase tunju sapa Dia pe ana-ana.

Roma 9:33

Dorang itu lagi sama deng yang Tuhan Allah bilang di Kitab Suci bagini, “Ngoni dengar bae-bae, Kita so taru batu satu di gunung Sion, kong sapa yang tara percaya, dorang pe kaki mo tagate di batu itu kong dorang mo jatu. Tapi sapa yang percaya pa Dia, dorang itu tara akan kecewa.”

1 Korintus 15:31

Itu butul sudara-sudara, tiap hari kita mangada siksa itu sampe amper-amper mo mati karna kita bawa Kabar Bae ini. Tapi kita bangga pa ngoni, barang ngoni so percaya pa Kristus Yesus, torang pe Tuhan.

1 Korintus 6:20

Barang, waktu Tuhan Yesus mati untuk tebus ngoni pe dosa, itu pe arti, Dia so bili pa ngoni untuk jadi Dia pe umat. Jadi, ngoni musti pake ngoni pe badan untuk biking apa yang bae, supaya Tuhan Allah dapa puji deng hormat.

1 Korintus 7:34

Deng bagitu, dia pe perhatian tabagi-bagi. Kong kalu parampuang yang tarada laki, deng nona-nona, dong pe perhatian lebe banya pa Tuhan. Dorang kase dong pe diri, deng kase dong pe pikiran, cuma untuk biking Tuhan pe hati sanang. Tapi parampuang yang ada laki, dia pe perhatian lebe banya pa dia pe hidup hari-hari, bagimana supaya dia bisa kase sanang dia pe laki pe hati.

2 Korintus 10:8

Jadi kalu kita bicara banya tentang Tuhan angka pa torang untuk biking apa yang Dia suru, jang sampe ada yang anggap kita puji diri. Barang, Tuhan kase kuasa pa torang itu supaya torang pake untuk kase kuat ngoni pe percaya, bukang untuk kase ancor ngoni pe percaya.

2 Korintus 3:12

Jadi, karna torang bagitu yakin deng Tuhan Allah pe janji yang baru itu, torang barani kase tau Kabar Bae tentang Yesus Kristus pa orang-orang.

2 Korintus 4:10

Torang dapa sengsara deng amper mati sama deng Yesus Kristus, tapi itu jadi supaya orang bisa lia Yesus Kristus pe kuasa ada pa tong pe diri, deng dong bisa tau deng jelas, butul Yesus so hidup ulang.

2 Korintus 5:15

Yesus Kristus so mati untuk samua orang, supaya orang-orang percaya yang masi hidup di dunia ini, tara hidup lagi untuk kase sanang dong pe diri sandiri, tapi supaya dorang bole hidup untuk kase sanang pa Yesus Kristus, yang so mati deng hidup ulang untuk dorang.

2 Korintus 7:14

Kita so puji-puji memang tentang ngoni pa Titus waktu dia bolong datang pa ngoni, deng ngoni memang tara kase malu pa kita. Bagitu lagi, samua yang torang so perna bilang pa ngoni itu butul, sama deng yang torang ada puji-puji pa ngoni tentang Titus itu me butul.

2 Korintus 7:4

Kita percaya skali pa ngoni, mala kita sanang skali deng apa yang ngoni biking. Jadi biar lagi torang banya kali dapa siksa, tapi kita pe hati tahibur deng sanang skali karna ngoni.

Filipi 1:14

Kong gara-gara kita dapa kase maso di penjara, itu yang biking banya sudara yang percaya yang tinggal di kota ini lebe tatamba kuat percaya pa Tuhan, sampe dorang lagi lebe barani kase tau Kabar Bae tentang Yesus Kristus deng tara tako-tako lagi.

Filipi 2:17

Dulu waktu pertama kita kase tau Kabar Bae tentang Yesus Kristus pa ngoni, ngoni jadi percaya deng ngoni kase ngoni pe diri untuk biking Dia pe mau. Jadi biar lagi orang mo bunu pa kita nanti gara-gara kita so kase tau Kabar Bae, itu tara apa-apa. Barang, itu sama deng kita pe dara so tatumpa untuk jadi korban persembahan pa Tuhan Allah. Jadi biar kita pe dara tatumpa sampe mati, kita pe hati tetap sanang deng kita rasa sanang sama-sama deng ngoni samua.

Kolose 1:24

Skarang ini kita pe hati sanang saja, karna siksa yang kita dapa waktu kase tau Kabar Bae tentang Yesus Kristus, itu untuk ngoni pe bae. Siksa itu memang musti kita rasa, karna kita karja untuk Yesus Kristus. Deng kalu kita dapa siksa, itu sama saja deng kita ambe bagian dalam siksa yang Yesus Kristus rasa untuk tolong Dia pe jemaat. Jemaat itu sama deng Dia pe badan sandiri.

1 Tesalonika 5:23

Tuhan Allah yang biking torang pe hati tetap tenang, jadi torang minta supaya Dia biking ngoni jadi Dia pe umat sandiri yang hidup deng hati bersi. Torang minta supaya Dia jaga ngoni pe badan, hati deng jiwa, supaya ngoni tarada sala apa-apa waktu torang pe Tuhan Yesus Kristus datang ulang.

1 Petrus 4:16

Tapi, kalu ngoni dapa siksa karna ngoni orang Kristen, jang ngoni malu. Lebe bae ngoni puji deng hormat pa Tuhan Allah karna ngoni so jadi Yesus Kristus pe umat.

1 Yohanes 2:28

Ngoni yang kita sayang sama deng kita pe ana-ana, ngoni musti tetap hidup satu hati deng Yesus Kristus, supaya waktu Dia datang ulang, torang so tara tako deng tara malu mo mangada pa Dia.