2 Timotius 3:13 - Perjanjian Baru Bahasa Melayu Maluku Utara

¹³ Tapi orang yang jahat deng yang tukang tipu, dorang itu lebe hari lebe tamba jahat. Dorang tipu pa orang-orang kong orang laeng me tipu pa dorang.

2 Timotius 3:13 ပူးပေါင်းရင်းမြစ်များ

2 Korintus 6:8

Waktu torang dapa hormat, dapa hina, dapa kase tara bae nama, deng dapa puji, torang tetap saja biking yang Tuhan Allah suru. Kong ada yang bilang torang ajar yang sala, padahal torang ini salalu ajar yang butul.

1 Timotius 4:1

Roh Kudus so bilang deng jelas, nanti dekat-dekat hari kiamat, ada orang percaya yang akan kase tinggal lagi dorang pe percaya pa Tuhan Allah, kong taiko pa setang-setang yang jaga kase sesat pa manusia. Dorang itu cuma mo iko setang-setang pe ajaran.

2 Timotius 3:8

Ngana masi inga carita Yanes deng Yambres, to? Dulu, dorang dua malawang pa nabi Musa. Itu sama deng orang-orang yang suka tipu parampuang-parampuang itu, dong malawang ajaran yang butul tentang Yesus. Orang-orang itu pe pikiran so rusak deng dong pe percaya pa Yesus so tara butul.

Titus 3:3

Barang, dulu waktu torang bolong percaya pa Yesus, torang tara mangarti apa-apa. Jadi torang malawang pa Tuhan, torang me tapengaru deng hal-hal yang jahat. Napsu deng keinginan yang tara bae so kuasai di torang pe hati kong torang hidup baku mangiri deng orang laeng. Torang jahat pa orang deng torang salalu baku binci.

2 Petrus 2:20

Kita pe maksut, kalu dorang itu so kanal pa Yesus Kristus torang pe Tuhan deng Juruslamat, dorang me so lapas dari dunia pe mau yang jahat. Tapi kalu dorang bale ulang untuk iko keinginan-keinginan yang jahat itu, dorang pe keadaan nanti mo lebe soe dari yang pertama.

2 Petrus 3:3

Ini yang paling penting yang ngoni musti tau, kalu so mo kiamat, nanti ada banya orang yang suka bahina torang pe percaya, barang dorang hidup cuma iko dong pe keinginan yang jahat.

Wahyu 12:9

Naga basar itu, setang-setang pe raja yang dong jaga bilang ‘Iblis’. Naga itu yang dari dulu salalu kase sesat orang-orang di seluru dunia ini. Dia deng malaekat-malaekat yang iko pa dia, samua dapa buang dari sorga di bumi.

Wahyu 13:14

Dia biking tanda-tanda itu di binatang pertama pe muka, sampe dia kase sesat orang-orang di bumi. Dia me suru dorang biking patong satu sama deng binatang yang pertama, binatang yang ada luka barát tapi so sembu itu.

Wahyu 18:23

So tarada lagi cahaya lampu di kota itu, deng so tara dengar orang yang biking pesta kawing lagi di situ. Barang, dulu orang-orang yang bajual di kota itu paling terkenal, kong dorang itu ada pake tiop-tiop la kase pengaru pa samua suku bangsa di dunia supaya iko pa dorang.