2 Timotius 3:10 - Perjanjian Baru Bahasa Melayu Maluku Utara

¹⁰ Tapi ngana Timotius, ngana so iko samua yang kita ajar pa orang, kita pe cara hidup deng kita pe tujuan hidup. Ngana so lia sandiri kita pe percaya pa Yesus deng kita pe sayang pa orang. Ngana me tau, kita pe sabar deng kita pe setia biking kita pe tugas.

2 Timotius 3:10 ပူးပေါင်းရင်းမြစ်များ

Lukas 1:3

Kita sandiri so priksa bae-bae samua carita itu yang dorang tulis mulai dari pertama. Jadi abis itu kita ambe keputusan untuk tulis carita tentang samua yang so perna jadi itu dari awal sampe ahir, kong kirim pa bapa Teofilus.

Kisah Para Rasul 11:23

Waktu Barnabas sampe di sana, dia lia memang Tuhan Allah so kase Dia pe bae sampe banya orang so jadi percaya pa Yesus. Pe lia itu, dia sanang skali. Turus, dia kase smangat pa dorang supaya dorang sunggu-sunggu tetap setia pa Tuhan Yesus.

Kisah Para Rasul 2:42

Orang-orang percaya itu jaga bakumpul sama-sama untuk baku kase kuat dorang pe percaya pa Yesus. Dorang rajin dengar ajaran tentang Yesus dari rasul-rasul. Dorang pela-pela roti kong makang sama-sama, supaya inga Tuhan Yesus pe sengsara deng kematian. Dorang me berdoa sama-sama.

Kisah Para Rasul 20:18

Waktu dorang so datang di Miletus, Paulus bilang pa dorang bagini, “Sudara-sudara, ngoni samua tau bagimana kita pe hidup, mulai kita datang di daera Asia Kecil ini sampe skarang.

Kisah Para Rasul 26:4

Samua orang Yahudi tau bagimana kita pe hidup di kita pe kampong dulu waktu kita masi muda, sampe kita tinggal di tenga-tenga kita pe bangsa di kota Yerusalem ini.

Roma 16:17

Sudara-sudara, kita minta deng butul-butul pa ngoni, ati-ati pa orang yang jaga kase ajaran yang baku beda deng yang torang so ajar pa ngoni. Ati-ati karna dorang suka biking ngoni jadi tapisa-pisa deng biking ngoni jadi ragu-ragu deng ajaran yang torang so kase ajar pa ngoni. Jadi jang badekat pa dorang itu!

2 Korintus 1:17

Tapi biar kita bolong bisa biking kita pe rencana itu, jang ngoni anggap kita ini ragu-ragu. Kita ini tara biking rencana iko kita pe mau sandiri sama deng orang yang jaga iko dunia pe mau, di mulu bilang “iyo”, di hati bilang “tarada”.

Efesus 4:14

Kalu torang pe percaya so kuat bagitu, torang so tara gampang dapa tipu sama deng ana kacil. Jadi kalu ada orang yang datang kase ajar ajaran macam-macam yang tara butul untuk pengaru pa torang, torang tara akan gampang taiko pa dorang. Torang tara akan sama deng omba yang kasana-kamari iko angin batiop.

Filipi 2:20

Kita suru dia pigi pa ngoni itu, karna yang satu hati deng satu pikiran deng kita, cuma Timotius saja. Dia itu yang butul-butul pikir ngoni pe bae.

Filipi 2:22

Tapi Timotius itu so berusaha karas bantu pa kita kase tau Kabar Bae tentang Yesus Kristus, sama deng ana bantu dia pe papa. Karna ngoni sandiri so lia Timotius bagitu, ngoni so tau Timotius itu bae.

1 Tesalonika 1:5

karna pertama kali waktu torang kase tau Kabar Bae tentang Yesus Kristus pa ngoni, ngoni bukang cuma dengar torang pe kata-kata saja, tapi ngoni me lia Tuhan pe kuasa dari Roh Kudus. Roh Kudus yang kase yakin sampe ngoni jadi percaya Kabar Bae itu. Ngoni me lia torang pe kalakuang yang bae, sampe ngoni tau Kabar Bae itu butul.

1 Timotius 1:3

Waktu kita so kase tinggal pa ngana di kota Efesus kong pigi di Makedonia, kita minta ngana tinggal di situ dulu karna di Efesus ada orang-orang yang kase ajar ajaran sesat, jadi ngana musti kase nasehat pa dorang la dong berenti kase ajar ajaran itu.

1 Timotius 4:6

Timotius, ngana musti kase ajar hal-hal itu turus pa orang-orang percaya supaya dorang jang iko ajaran sesat. Kalu ngana kase ajar samua itu, ngana so jadi Kristus Yesus pe pelayan yang bae. Ngana pe percaya me akan jadi kuat karna ngana iko turus ajaran yang butul yang orang ajar pa ngana dari dulu.

1 Timotius 6:11

Tapi Timotius, ngana itu so jadi Tuhan Allah pe umat. Jadi jang ngana badekat deng hal-hal yang tara bae. Ngana musti berusaha hidup butul pa Tuhan Allah pe muka, iko Tuhan Allah pe mau, tamba percaya pa Yesus, tamba sayang pa orang laeng, tetap tahang hadapi macam-macam susa, deng tara kasar pa orang laeng.

2 Timotius 2:22

Orang muda banya yang dong pe keinginan tara bae, jadi jaga ngana pe diri bae-bae la jang iko sama deng dorang. Tapi ngana musti berusaha hidup butul pa Tuhan Allah pe muka, percaya pa Yesus, sayang pa orang laeng, deng hidup baku bawa bae-bae deng orang yang percaya pa Tuhan deng hati yang bersi.

2 Timotius 4:2

kase tau Tuhan Allah pe firman pa orang-orang. Ngana musti salalu siap kase tau firman itu di tiap waktu, biar orang mau dengar atau tarada. Kalu dorang biking sala, ngana togor pa dorang la dorang berenti. Turus ngana kase kuat dong pe hati la dong iko ajaran yang butul. Deng sementara ngana biking samua itu, ngana musti kase ajar bae-bae pa dorang deng sabar.

2 Timotius 4:3

Ngana musti rajin biking itu karna akan ada dia pe waktu, orang-orang tara mau dengar lagi ajaran yang butul. Mala dorang cuma mo pangge guru-guru agama yang dorang suka. Guru-guru itu mo bilang pa dorang hal-hal yang dorang suka dengar saja supaya cuma iko dorang pe mau.

2 Timotius 4:7

Kita so karja karas biking kita pe tugas itu deng bae sampe selesai, sama deng orang yang iko lomba lari sampe di finis. Deng kita tetap percaya pa Yesus Kristus.

Titus 2:7

Kong Titus, ngana lagi pe kalakuang musti bagus, supaya ngana bole jadi conto pa dorang. Kalu ngana mangajar, musti deng hati yang bersi deng sunggu-sunggu.

Ibrani 13:9

Jang ngoni iko ajaran-ajaran yang tara butul yang bole biking ngoni jadi sesat. Barang, kalu iko aturan tentang makanang yang halal deng haram, tarada dia pe guna untuk biking ngoni jadi sempurna pa Tuhan Allah pe muka. Cuma Tuhan Allah pe sayang deng pe bae yang bisa biking ngoni pe percaya pa Tuhan jadi kuat.

2 Petrus 3:11

Jadi karna samua itu nanti akan abis deng cara bagitu, torang yang hidup skarang ini musti hidup deng hati bersi, deng lagi hidup iko Tuhan Allah pe mau,