2 Timotius 2:21 - Perjanjian Baru Bahasa Melayu Maluku Utara

²¹ Bagitu lagi deng anggota jemaat. Kalu ada yang berenti biking jahat, Tuhan mo pake orang itu untuk biking Dia pe tugas-tugas yang kusus. Tuhan biking orang itu jadi Dia pe umat sandiri, kong Tuhan sanang pake pa orang yang bagitu, karna orang itu so siap mo biking samua karja yang butul.

2 Timotius 2:21 ပူးပေါင်းရင်းမြစ်များ

Kisah Para Rasul 9:15

Tapi Tuhan bilang pa dia, “Ngana pigi suda! Barang, Kita so pili pa dia itu la mo kase tau Kabar Bae tentang Kita pa suku-suku bangsa yang bukang Yahudi, pa raja-raja, deng pa orang-orang Israel.

1 Korintus 5:7

Buang suda samua ngoni pe kalakuang yang jahat itu, la ngoni jadi jemaat yang pe hati bersi. Itu bole kase sama deng waktu torang orang Yahudi biking hari raya Roti Tara Pake Ragi, torang buang samua ragi dari torang pe ruma, kong tong biking adonan yang baru yang tara pake ragi. Ngoni memang so bersi karna ngoni so percaya pa Yesus Kristus yang mati untuk tebus torang pe dosa-dosa. Dia itu bole kase sama deng domba yang torang potong untuk biking jadi korban persembahan di torang pe hari raya.

2 Korintus 7:1

Sudara-sudara yang kita sayang, karna torang so tarima Tuhan Allah pe janji-janji itu, mari suda torang kase bersi torang pe diri dari samua yang biking torang berdosa, bae itu yang ada pa tong pe hati, pikiran deng yang torang biking. Kong deng torang biking bagitu, torang yang so bersi dari dosa pa Tuhan Allah pe muka tamba hari jadi lebe tamba sempurna deng tako pa Tuhan Allah.

2 Korintus 9:8

Kong karna Tuhan Allah pe bae yang talebe-lebe, Dia mampo kase lengkap ngoni pe perlu. Deng bagitu, dalam hal apa saja ngoni tara kurang apa-apa, deng ngoni akan mampo biking banya hal yang bae untuk bantu pa orang laeng.

Efesus 2:10

Barang, Tuhan Allah yang biking torang jadi manusia yang pe hidup so tara sama deng dulu lagi karna torang so satu hati deng Kristus Yesus. Tuhan Allah kase torang hidup deng cara yang baru supaya torang bole biking barang yang bae, yang Dia so rencana dari dulu untuk torang.

1 Timotius 6:11

Tapi Timotius, ngana itu so jadi Tuhan Allah pe umat. Jadi jang ngana badekat deng hal-hal yang tara bae. Ngana musti berusaha hidup butul pa Tuhan Allah pe muka, iko Tuhan Allah pe mau, tamba percaya pa Yesus, tamba sayang pa orang laeng, tetap tahang hadapi macam-macam susa, deng tara kasar pa orang laeng.

2 Timotius 2:16

Jang ngana badekat pa orang-orang yang bacarita yang tarada guna deng yang tara hormati pa Tuhan Allah. Karna orang-orang yang jaga bacarita bagitu, dong itu tara iko Tuhan Allah pe mau.

2 Timotius 2:20

Ada conto lagi. Di orang kaya pe ruma, ada barang yang dong biking dari macam-macam bahan. Ada yang dong biking dari mas, dari perak, dari kayu deng ada lagi yang dari tana liat. Barang yang dong biking dari mas deng perak itu, dong jaga pake di acara penting. Kalu barang yang dong biking dari kayu deng tana liat, itu dong jaga pake di acara yang biasa-biasa.

2 Timotius 3:17

Deng bagitu, Kitab Suci biking torang yang jadi Tuhan Allah pe umat, mampo biking samua yang bae.

2 Timotius 4:11

Yang tinggal sama-sama deng kita di sini cuma Lukas. Jadi ngana pigi cari pa Markus la ngoni dua datang kamari, karna Markus bole bantu pa kita biking kita pe tugas di sini.

Titus 3:1

Titus, ngana musti kase inga pa orang-orang percaya supaya dorang salalu dengar-dengaran pa pemerinta deng pa sapa saja yang berkuasa. Kong dorang me musti salalu siap biking apa saja yang bae.

Titus 3:14

Torang pe orang-orang yang percaya musti rajin biking yang bae supaya bole tolong orang laeng pe keperluan hari-hari. Deng bagitu, dong pe hidup ada dia pe guna.

Titus 3:8

Samua yang kita so kase ajar ini butul, kong itu bagus deng ada guna untuk samua orang. Kita mau ngana bilang deng tegas ajaran ini pa samua orang yang percaya pa Tuhan Allah, supaya dorang berusaha butul-butul biking barang yang bae.

1 Petrus 1:22

Jadi karna ngoni so iko ajaran yang butul tentang Yesus Kristus, ngoni pe hati so jadi bersi. Deng bagitu, ngoni bisa baku sayang deng hati yang tulus di antara ngoni sudara-sudara yang sama-sama percaya. Karna itu, ngoni musti sunggu-sunggu baku sayang satu deng yang laeng deng hati yang tulus,

1 Petrus 1:7

Sengsara yang ngoni dapa itu jadi bukti, ngoni butul-butul percaya pa Tuhan. Itu sama deng mas yang kalu mo tau dia pe asli musti bakar dulu deng api. Tapi ngoni pe percaya lebe berharga dari mas, karna mas itu tara akan ada turus-turus. Kalu ngoni so lolos dari cobaan itu, nanti di hari kiamat, waktu Yesus Kristus datang ulang, Dia mo puji deng hormat pa ngoni.

1 Yohanes 3:3

Samua orang yang baharap pa Tuhan sama deng itu, orang itu musti salalu hidup deng hati bersi sama deng Yesus Kristus yang suci itu.