2 Timotius 2:20 - Perjanjian Baru Bahasa Melayu Maluku Utara

²⁰ Ada conto lagi. Di orang kaya pe ruma, ada barang yang dong biking dari macam-macam bahan. Ada yang dong biking dari mas, dari perak, dari kayu deng ada lagi yang dari tana liat. Barang yang dong biking dari mas deng perak itu, dong jaga pake di acara penting. Kalu barang yang dong biking dari kayu deng tana liat, itu dong jaga pake di acara yang biasa-biasa.

2 Timotius 2:20 ပူးပေါင်းရင်းမြစ်များ

Yohanes 8:49

Yesus jawab, “Kita ini tara kemasukan setang. Kita hormati pa Kita pe Bapa, tapi ngoni hina pa Kita.

Roma 9:20

Tapi torang tara bole pikir bagitu. Torang ini sapa kong, sampe torang barani malawang pa Tuhan Allah? Torang ini cuma manusia yang Tuhan Allah cipta. Masa torang bilang bagini pa Dia, “Bikiapa kong Tuhan Allah cipta pa kita bagini?”

1 Korintus 3:9

Torang dua ini me sama-sama karja untuk Tuhan Allah. Kong ngoni itu sama deng Tuhan Allah pe kobong, tampa yang tong dua bakarja. Deng ngoni lagi bole kase sama deng Tuhan Allah pe ruma.

2 Korintus 4:7

Torang ini cuma manusia yang lema, sama deng pot dari tana liat. Tapi biar bagitu, Tuhan Allah kase percaya Dia pe Kabar Bae tentang Yesus Kristus itu pa torang. Kabar Bae itu hebat skali, bole kase sama deng harta yang berharga. Jadi, deng tong kase tau Kabar Bae itu, itu jadi jelas skali pa orang-orang, kuasa basar yang ada pa torang itu memang dari Tuhan Allah, bukang dari tong pe diri sandiri.

Efesus 2:22

Jadi skarang, karna torang so jadi satu hati deng Yesus Kristus, biar dari bangsa mana saja, Dia biking torang samua jadi satu, sama deng satu ruma, kong di situ tampa untuk Tuhan Allah pe Roh tinggal.

1 Timotius 3:15

Jadi kalu kita ada alangan kong terlambat datang, kita pe surat so sampe pa ngana kamuka. Deng kita pe surat ini, ngana bole tau, bagimana orang percaya musti hidup sebagai Tuhan Allah pe keluarga. Kita pe maksut bilang Tuhan Allah pe keluarga, itu pe maksut, Tuhan Allah yang hidup pe jemaat. Dia pe jemaat itu yang musti pegang kuat ajaran yang butul, sama deng tiang raja deng fandasi yang biking ruma jadi kuat.

1 Petrus 2:5

Turus ngoni ini me sama deng batu yang hidup, batu yang Tuhan Allah pake untuk kase badiri Dia pe tampa tinggal. Itu berarti, Tuhan Allah pe Roh Kudus mo tinggal pa ngoni orang-orang yang percaya pe tenga-tenga. Deng ngoni me so jadi sama deng imam-imam yang pe hati bersi pa Tuhan Allah pe muka, jadi ngoni kase persembahan iko Tuhan Allah pe mau. Kong Tuhan Allah sanang tarima ngoni pe persembahan itu karna apa yang Yesus Kristus so biking untuk torang samua.