2 Timotius 2:12 - Perjanjian Baru Bahasa Melayu Maluku Utara

¹² Kalu torang menderita kong tetap percaya pa Tuhan Yesus, nanti torang akan berkuasa sama-sama deng Dia. Kalu torang manyangkal pa Dia, Dia me akan manyangkal pa torang.

2 Timotius 2:12 ပူးပေါင်းရင်းမြစ်များ

Matius 10:33

Tapi sapa yang manyangkal pa Kita di orang banya pe muka, nanti Kita me akan manyangkal pa dia di Kita pe Bapa di sorga pe muka.”

Matius 26:35

Tapi Petrus bilang pa Dia bagini, “Biar lagi kita musti mati sama-sama deng Guru, kita tara akan manyangkal pa Guru.” Kong Yesus pe murit-murit yang laeng me bilang bagitu.

Matius 26:75

Kong Petrus dapa inga yang Yesus so perna bilang pa dia, sebelum ayam bakuku, dia so manyangkal tiga kali, bilang dia tara kanal pa Yesus. Petrus langsung kaluar kong manangis karna manyasal skali.

Markus 10:33

Yesus bilang bagini, “Dengar e! Skarang torang mo pigi ka atas di kota Yerusalem. Di sana, orang mo serakan Anak Manusia yang dari sorga pa imam-imam kapala deng guru-guru agama yang ahli lima kitab Musa. Kong dorang mo kase hukuman mati pa Dia. Dorang mo serakan Dia pa orang-orang yang bukang Yahudi,

Markus 8:38

Orang-orang yang hidup skarang ini tara setia iko pa Tuhan Allah. Dorang lebe suka biking dosa. Kalu ada orang yang iko pa Kita deng Kita pe ajaran kong malu pa dorang itu, nanti Kita Anak Manusia me malu mo bilang, Kita kanal pa orang itu waktu Kita datang ulang deng Kita pe Bapa pe kuasa yang luar biasa, sama-sama deng malaekat-malaekat yang kudus.”

Lukas 12:9

Tapi sapa yang manyangkal pa Kita di orang banya pe muka, nanti Kita me akan manyangkal dia di Tuhan Allah pe malaekat-malaekat pe muka.

Lukas 22:29

Karna itu, Kita mo kase kuasa pa ngoni untuk berkuasa sama deng Kita pe Bapa ada kase kuasa pa Kita.

Lukas 22:30

Deng bagitu, waktu Kita Berkuasa sebagai Raja pa Kita pe umat, ngoni bole makang minum di meja sama-sama deng Kita. Kong, ngoni akan dudu di atas kursi raja untuk adili pa dua blas suku bangsa Israel.”

Lukas 9:26

Karna sapa yang malu mangaku dia iko pa Kita deng iko Kita pe ajaran, nanti waktu Kita Anak Manusia datang ulang, Kita me akan malu mangaku dia iko pa Kita. Waktu itu Kita datang deng Kita pe kuasa yang luar biasa deng Kita pe Bapa pe kuasa yang luar biasa deng malaekat-malaekat yang kudus.

Kisah Para Rasul 14:22

Di tampa-tampa itu, Paulus deng Barnabas kase kuat orang-orang percaya pe hati deng kase nasehat supaya dorang tetap batahang percaya pa Tuhan Yesus. Paulus deng Barnabas bilang pa dorang, “Kalu torang mau jadi Tuhan Allah pe umat yang Dia Berkuasa sebagai Raja, torang akan dapa banya sengsara.”

Roma 5:17

Jadi, karna Adam so langgar Tuhan Allah pe parenta, biar dia cuma sandiri, itu biking samua orang akan mati. Tapi apa yang Yesus Kristus ada biking, jao lebe basar. Biar Dia cuma sandiri me, Tuhan Allah mo biking banya orang jadi orang yang tara sala pa Dia pe muka. Dorang dapa itu deng cuma-cuma dari Tuhan Allah karna Dia pe bae. Deng dorang itu mo hidup deng Tuhan Allah slama-lamanya kong dorang me mo berkuasa sama-sama deng Dia lagi.

Roma 8:17

Deng karna torang ini so jadi Tuhan Allah pe ana-ana, nanti tong mo dapa warisan dari Dia, itu berarti, torang ini me ada hak dari samua yang Dia so kase sadia untuk Dia pe ana-ana. Kong torang mo dapa samua itu sama-sama deng Yesus Kristus. Tapi kalu torang mau dapa itu, tong lagi musti menderita iko pa Tuhan Allah sama deng Yesus Kristus so menderita, supaya torang nanti dapa puji deng hormat sama-sama deng Dia.

Filipi 1:28

Ngoni tara usa tako pa orang-orang yang lawan pa ngoni. Kalu dorang lia ngoni tara tako, itu kase tunju dorang itu akan dapa hukuman tapisa deng Tuhan Allah slama-lamanya, kong itu lagi kase tunju, ngoni yang percaya itu akan dapa slamat dari Tuhan Allah.

1 Timotius 5:8

Karna kalu ada orang yang tara mau urus orang-orang yang ada hubungan keluarga deng dia, apalagi dia pe keluarga yang satu ruma deng dia, itu sama saja dia so manyangkal pa Tuhan Yesus. Orang itu lebe soe dari orang yang tara percaya pa Tuhan.

Yudas 1:4

Barang, ada orang-orang yang bawa ajaran yang tara butul yang so maso pa ngoni pe jemaat, tapi ngoni tara sadar. Dorang itu tara iko Tuhan Allah pe mau. Dorang memang so tarima ajaran tentang torang pe Tuhan Allah pe bae, tapi dorang kase putar bale ajaran itu la orang bisa iko dorang pe napsu yang tara bae. Deng dorang me manyangkal, Yesus Kristus yang cuma satu itu saja torang pe Tuhan, yang berkuasa pa samua-samua. Orang-orang model bagini, dari dulu ada tatulis di Kitab Suci, dorang memang akan dapa hukuman.

Wahyu 1:6

Dia Raja, kong Dia pili pa torang jadi Dia pe rakyat. Dia me angka pa torang sama deng imam-imam yang pe tugas kusus untuk semba deng puji pa Tuhan Allah, Dia pe Bapa. Cuma pa Dia saja samua yang ada di dunia ini puji deng hormat, deng Dia yang berkuasa sampe slama-lamanya. Amin.

Wahyu 1:9

Kita Yohanes, ngoni pe sudara yang sama-sama dapa siksa karna percaya pa Yesus. Torang sama-sama percaya pa Yesus yang Berkuasa sebagai Raja pa torang pe hidup, deng biar dapa siksa, torang tahang mangada siksa itu. Kong kita ini dapa buang di pulo yang pe nama Patmos, karna kita kase tau Tuhan Allah pe firman deng kase tau Yesus pe pasáng pa orang-orang.

Wahyu 2:13

Kita tau ngoni pe tampa tinggal. Ngoni tinggal di kota Pergamus, memang kota yang Iblis, setang-setang pe raja pe tampa berkuasa. Tapi biar bagitu, ngoni percaya turus pa Kita. Tempo hari, ada orang yang dia pe nama Antipas, Kita pe saksi yang setia, dia kase tau Tuhan Allah pe pasáng, kong dong bunu pa dia. Tapi biar dorang bunu pa dia di ngoni pe tenga-tenga, ngoni percaya turus pa Kita, ngoni tara manyangkal pa Kita.

Wahyu 20:4

Turus kita lia ada kursi-kursi raja. Orang-orang yang dudu di kursi raja itu, orang-orang yang dapa kuasa untuk adili pa manusia. Kita me lia roh-roh dari orang-orang yang dulu dapa potong kapala kong mati karna dorang kase tau tentang Yesus deng Tuhan Allah pe firman. Orang-orang itu tara perna semba pa binatang jahat deng dia pe patong, jadi dorang me tara perna dapa binatang itu pe cap di dong pe testa deng di dong pe tangan. Tuhan Allah kase hidup ulang pa dorang, turus dong berkuasa sebagai raja sama-sama deng Yesus Kristus selama saribu taong.

Wahyu 20:6

Dorang yang pertama dapa hidup ulang, dorang itu paling sanang suda. Dorang itu yang so jadi Tuhan Allah pe umat. Dorang me tara rasa yang dia pe nama kematian yang kedua. Dorang akan jadi imam-imam yang pe tugas layani pa Tuhan Allah deng Yesus Kristus, turus dorang me akan berkuasa sama-sama deng Dia selama saribu taong.

Wahyu 3:10

Ngoni tetap batahang percaya pa Kita biar ngoni dapa siksa, kong deng bagitu ngoni so biking Kita pe parenta. Karna itu, nanti Kita mo jaga pa ngoni supaya ngoni tara dapa siksa yang hebat yang nanti mo jadi untuk samua orang di dunia ini. Siksa itu untuk uji samua orang di dunia ini la dapa tau sapa orang-orang yang butul-butul percaya pa Tuhan Allah.

Wahyu 3:21

Sapa yang menang dari pengaru jahat, Kita mo kase dudu dia pa Kita pe pinggir sama-sama deng Kita di kursi raja. Barang, orang itu so menang sama deng Kita yang so menang dari setang-setang pe pengaru, kong Kita dudu baku pinggir sama-sama deng Kita pe Bapa di Dia pe kursi raja.

Wahyu 3:8

Kita tau samua yang ngoni jaga biking: Kita tau ngoni pe pengaru cuma sadiki. Tapi biar bagitu me, ngoni so iko Kita pe parenta deng ngoni me tara perna manyangkal pa Kita. Jadi dengar bae-bae! Kita so buka pintu untuk ngoni, pintu yang tara ada orang bisa tutu.

Wahyu 5:10

Anak Domba ini so biking dorang jadi Tuhan Allah pe umat yang Dia berkuasa sebagai Raja pa dorang pe hidup, deng Dia biking lagi dorang samua jadi sama deng imam-imam yang pe tugas kusus untuk semba deng puji pa Tuhan Allah. Kong dorang mo berkuasa sebagai raja di dunia.”