2 Timotius 2:11 - Perjanjian Baru Bahasa Melayu Maluku Utara

¹¹ Memang butul kata-kata ini, “Kalu torang kase tinggal torang pe cara hidup lama yang malawang pa Tuhan Allah, itu sama deng torang so mati sama-sama deng Yesus. Deng bagitu, torang nanti akan hidup sama-sama deng Dia.

2 Timotius 2:11 ပူးပေါင်းရင်းမြစ်များ

Yohanes 14:19

So tara lama lagi orang-orang yang tara percaya, tara akan lia lagi pa Kita. Tapi ngoni mo lia lagi pa Kita barang Kita mo hidup ulang, kong karna Kita mo hidup ulang, Kita mo biking ngoni hidup deng Tuhan Allah slama-lamanya.

Roma 6:5

Jadi, kalu memang torang itu so sama deng orang yang so mati sama-sama deng Yesus Kristus, torang me pasti akan hidup ulang sama-sama deng Dia.

Roma 6:8

Kong, karna torang itu sama deng so mati sama-sama deng Yesus Kristus, torang me percaya lagi, torang akan hidup sama-sama deng Dia.

2 Korintus 13:4

Memang waktu Dia mati di kayu salib, Dia tara kuat. Tapi skarang Dia hidup ulang deng kuasa dari Tuhan Allah. Bagitu lagi deng torang, torang percaya pa Yesus Kristus biar torang tara kuat. Tapi torang hidup deng Dia pe kuasa, kong deng Dia pe kuasa itu torang bisa hukum pa ngoni.

2 Korintus 4:10

Torang dapa sengsara deng amper mati sama deng Yesus Kristus, tapi itu jadi supaya orang bisa lia Yesus Kristus pe kuasa ada pa tong pe diri, deng dong bisa tau deng jelas, butul Yesus so hidup ulang.

1 Tesalonika 4:17

Abis itu, torang yang masi hidup, Tuhan Allah mo angka di awan-awan sama-sama deng orang-orang yang so hidup ulang la baku dapa deng Tuhan Yesus. Kong torang samua mo tinggal sama-sama deng Tuhan Yesus slama-lamanya.

1 Tesalonika 5:10

Yesus Kristus so mati untuk torang samua, supaya torang dapa hidup sama-sama deng Dia nanti waktu Dia datang ulang. Kong tara jadi masala kalu waktu itu torang masi hidup atau so mati.

1 Timotius 1:15

Kata-kata yang kita mo bilang ini, butul skali. Ngana musti tarima deng percaya deng hati yang sunggu-sunggu bagini, “Kristus Yesus datang di dunia untuk kase slamat orang berdosa.” Kong dari samua orang yang perna biking dosa, kita ini suda yang paling banya biking dosa.

1 Timotius 3:1

Memang butul yang orang jaga bilang ini, “Orang yang suka mo pimpin pa orang-orang percaya di jemaat, tugas yang dia suka itu bagus skali.”

Titus 3:8

Samua yang kita so kase ajar ini butul, kong itu bagus deng ada guna untuk samua orang. Kita mau ngana bilang deng tegas ajaran ini pa samua orang yang percaya pa Tuhan Allah, supaya dorang berusaha butul-butul biking barang yang bae.