2 Timotius 2:1 - Perjanjian Baru Bahasa Melayu Maluku Utara

¹ Timotius, ngana so sama deng kita pe ana sandiri! Kristus Yesus so kase Dia pe bae pa ngana, jadi pake itu untuk kase kuat ngana pe hati karna ngana so percaya pa Dia.

2 Timotius 2:1 ပူးပေါင်းရင်းမြစ်များ

1 Korintus 16:13

Ngoni musti jaga diri bae-bae! Ngoni pe percaya musti kuat pa Tuhan! Jang ngoni tako, tapi ngoni musti barani!

Efesus 6:10

Ahirnya, kita mo bilang pa ngoni bagini, kase kuat suda ngoni pe hati deng Tuhan pe kuasa yang Dia so kase pa ngoni karna ngoni so satu hati deng Tuhan.

Filipi 4:13

Kita bole batahang deng sagala macam keadaan, itu karna Yesus Kristus yang biking kita kuat mangada samua itu.

1 Timotius 1:18

Timotius, kita so anggap ngana itu sama deng kita pe ana sandiri! Kita suru ngana iko tugas yang kita so bilang ini. Tugas ini sama deng yang Tuhan Allah so kase pa ngana, yang Dia pe utusan kase tau pa ngana dulu. Jadi biking butul-butul ngana pe tugas ini sama deng satu tentara yang lawan pa orang yang serang dia pe daera. Kong supaya ngana biking tugas itu bae-bae, ngana musti percaya kuat Tuhan pe ajaran yang torang so kase tau pa ngana, turus apa yang ngana biking, ngana pe hati musti tau itu butul.

1 Timotius 1:2

Timotius, torang dua sama-sama percaya jadi kita so anggap ngana itu sama deng kita pe ana sandiri. Kita minta pa Tuhan Allah torang pe Bapa, deng pa Kristus Yesus torang pe Tuhan, supaya kase yang bae pa ngana, sayang pa ngana, deng salalu biking ngana pe hati tetap tenang.

2 Timotius 1:1

Timotius, salam dari kita Paulus. Kita ini Kristus Yesus pe utusan yang orang sebut rasul. Kita jadi rasul, itu karna Tuhan Allah pe mau. Tuhan Allah pili pa kita untuk kase tau pa orang-orang Tuhan Allah pe janji. Tuhan Allah janji, kalu orang percaya pa Kristus Yesus, orang itu mo dapa hidup deng Dia slama-lamanya.

2 Timotius 1:2

Timotius, kita sayang pa ngana sama deng kita pe ana sandiri. Kita minta pa Tuhan Allah, torang pe Bapa, deng pa Kristus Yesus, torang pe Tuhan, supaya kase yang bae pa ngana, sayang pa ngana, deng salalu biking ngana pe hati tetap tenang.

2 Timotius 1:7

Karna Tuhan Allah kase Dia pe Roh Kudus pa torang. Roh Kudus itu tara biking torang panako tapi biking torang pe hati kuat untuk iko Tuhan pe mau, untuk sayang orang, deng untuk kuasai torang pe diri.

2 Timotius 2:10

Karna itu, kita sabar tanggung siksa itu samua deng tetap kase tau Kabar Bae tentang Yesus Kristus, supaya orang yang Tuhan Allah so pili mo jadi Dia pe umat bole percaya pa Kristus Yesus. Deng bagitu, dong bole dapa slamat deng dapa puji deng hormat sama-sama deng Tuhan Allah slama-lamanya.

2 Timotius 4:17

Biar dorang kase tinggal pa kita, Tuhan Allah tetap sama-sama deng kita. Dia kase kuat pa kita supaya kita bole kase tau samua Kabar Bae tentang Yesus Kristus, deng supaya samua orang yang bukang Yahudi dengar. Dia kase slamat pa kita dari bahaya kematian, sama deng kita bebas dari singa pe mulu.

2 Petrus 3:18

Lebe bae tiap hari ngoni tamba sadar Yesus Kristus pe bae deng lebe tamba kanal pa Dia. Dia itu torang pe Tuhan Yesus Kristus yang kase slamat pa torang dari dosa-dosa. Kong untuk Dia suda puji deng hormat dari skarang sampe slama-lamanya. Amin.