2 Timotius 1:9 - Perjanjian Baru Bahasa Melayu Maluku Utara

⁹ Tuhan Allah yang so kase slamat pa torang dari dosa-dosa deng Dia pangge pa torang untuk jadi Dia pe umat sandiri la hidup deng hati bersi. Dia biking samua itu bukang karna torang ada biking yang bae, tapi karna Tuhan Allah pe mau deng karna Dia pe hati bae pa manusia. Memang, dari dulu waktu Tuhan Allah bolong biking dunia ini, Dia so sayang pa torang, jadi Tuhan Allah biking rencana Kristus Yesus datang di dunia.

2 Timotius 1:9 ပူးပေါင်းရင်းမြစ်များ

Matius 1:21

Maria mo melahirkan ana laki-laki satu. Kong ngana musti kase nama pa ana itu Yesus, barang Dia itu nanti yang mo kase slamat pa Dia pe umat dari dorang pe dosa-dosa.”

Lukas 10:21

Waktu itu suda, Roh Kudus kuasai pa Yesus kong biking Dia pe hati sanang. Kong Dia bilang, “Kita bilang tarimakasi pa Bapa, Tuhan yang berkuasa di sorga deng di bumi. Kita bilang tarimakasi karna Bapa tara kase tau samua itu deng jelas pa orang-orang yang pande deng yang tau banya hal. Tapi pa orang-orang biasa, Bapa biking sampe dorang mangarti. Ya Bapa, itu suda yang biking Bapa pe hati sanang.

Yohanes 17:24

Bapa, Kita ingin dorang yang Bapa so kase pa Kita itu salalu ada sama-sama deng Kita di Kita pe tampa tinggal nanti, supaya dorang bisa lia Kita pe kuasa yang luar biasa. Kuasa yang luar biasa itu Bapa so kase pa Kita karna Bapa sayang pa Kita dari waktu dunia bolong ada.

Yohanes 17:9

Bapa, Kita berdoa bukang untuk orang-orang yang tara percaya pa Kita. Tapi Kita berdoa untuk orang-orang yang iko pa Kita yang Bapa so kase pa Kita, karna dorang itu Bapa punya.

Yohanes 6:37

Samua orang yang Kita pe Bapa kase percaya pa Kita, dorang itu mo datang pa Kita. Kong sapa saja yang datang pa Kita, Kita tara akan tolak pa dia.

Kisah Para Rasul 15:18

Samua itu Dia so kase tau dari dulu.”

Kisah Para Rasul 2:47

Dorang salalu puji pa Tuhan Allah, deng orang banya suka pa dorang. Kong tiap hari, Tuhan biking sampe orang yang percaya pa Dia tatamba turus supaya dorang dapa slamat dari dosa-dosa.

Roma 11:14

karna kita harap deng kita pe tugas ini, kita bisa biking kita pe sudara orang Yahudi yang satu bangsa deng kita jadi cemburu. Barang kalu dorang lia ada orang dari bangsa laeng dapa slamat, sapa tau deng bagitu, ada dari dorang yang bole percaya la dapa slamat lagi.

Roma 11:29

Tuhan Allah masi sayang pa orang Yahudi, karna kalu Dia pili orang untuk jadi Dia pe umat deng kase yang bae pa dorang, Dia tara perna beruba pikiran.

Roma 16:25

Mari suda puji pa Tuhan Allah! Dia itu yang ada kuasa untuk biking ngoni pe percaya lebe tamba kuat, karna ngoni so dengar Kabar Bae tentang Yesus Kristus yang kita jaga kase tau pa orang-orang. Kabar Bae itu so lama skali, so deng ratus-ratus taong orang bolong tau,

Roma 3:20

Barang, tarada satu orang yang jadi orang yang butul pa Tuhan Allah pe muka karna dia iko aturan-aturan di lima kitab Musa. Mala dari aturan itu, torang jadi tau, torang berdosa.

Roma 9:11

Waktu ana dua itu bolong lahir, kong dorang bolong tau biking barang yang bae deng yang jahat, Tuhan Allah so bilang bagini pa Ribka, “Ngana pe ana yang bongso nanti mo jadi tuang pa dia pe kaka.” Tuhan Allah pe maksut supaya torang bole lia, Dia pili bukang iko apa yang dorang dua ada biking, tapi iko Tuhan Allah pe mau.

Roma 9:24

Kong orang-orang itu bukang cuma torang orang Yahudi saja tapi orang yang bukang Yahudi lagi.

1 Korintus 1:18

Ada orang yang bapikir, Kabar Bae tentang Yesus mati di kayu salib untuk tebus manusia pe dosa, itu orang bodo pe carita. Dorang itu mo tapisa deng Tuhan Allah slama-lamanya. Tapi untuk torang yang so dapa slamat karna percaya Kabar Bae itu, torang tau, Kabar Bae itu ada kuasa dari Tuhan Allah untuk kase slamat pa manusia.

Efesus 1:11

Tuhan Allah ator samua yang ada itu, iko Dia pe mau yang Dia so tentukan. Dari dulu, Dia so pili pa torang supaya torang bole tarima apa yang Dia so janji mo kase pa torang karna torang percaya pa Yesus Kristus.

Efesus 1:9

Dulu, tarada orang yang tau Dia pe rencana itu, tapi skarang Dia so kase tau pa torang. Dia pe rencana itu tentang Yesus Kristus, kong rencana itu suda yang Dia ingin biking dari dulu.

Efesus 2:5

Waktu torang masi jaga langgar Tuhan Allah pe parenta, itu bole mo kase sama deng torang so mati. Tapi biar bagitu, waktu Tuhan Allah kase hidup ulang pa Yesus Kristus, itu sama deng Dia so kase hidup ulang pa torang. Jadi, Dia kase slamat pa torang dari dosa-dosa cuma karna Dia pe bae pa torang.

Efesus 3:11

Tuhan Allah biking dorang jadi satu itu iko apa yang Dia so rencana dari dulu, waktu Dia bolong biking dunia ini. Kong Dia pe rencana itu bole jadi karna apa yang Kristus Yesus torang pe Tuhan so biking.

Filipi 3:14

Jadi kita berusaha turus supaya kita bole biking kita pe tujuan untuk hidup sama deng Kristus Yesus. Itu sama deng orang yang iko lomba lari, yang berusaha lari turus sampe garis finis supaya bole mo dapa hadia. Hadia yang kita mo dapa itu, hidup deng Tuhan Allah slama-lamanya. Kong Tuhan Allah pangge pa kita untuk dapa hidup itu, karna kita so percaya pa Kristus Yesus.

1 Tesalonika 4:7

Barang, Tuhan Allah so pangge pa torang jadi Dia pe umat untuk hidup deng hati bersi, bukang untuk mo biking hal-hal yang tara bae iko ngoni pe napsu.

1 Timotius 1:1

Timotius, salam dari kita Paulus, Kristus Yesus pe utusan yang orang sebut rasul. Kita jadi rasul, itu karna iko Tuhan Allah deng Kristus Yesus pe parenta. Tuhan Allah itu yang kase slamat pa torang, deng Kristus Yesus itu yang jadi torang pe harapan.

2 Timotius 1:1

Timotius, salam dari kita Paulus. Kita ini Kristus Yesus pe utusan yang orang sebut rasul. Kita jadi rasul, itu karna Tuhan Allah pe mau. Tuhan Allah pili pa kita untuk kase tau pa orang-orang Tuhan Allah pe janji. Tuhan Allah janji, kalu orang percaya pa Kristus Yesus, orang itu mo dapa hidup deng Dia slama-lamanya.

Titus 1:2

Kita ajar pa orang-orang yang percaya itu, supaya dorang bole baharap deng yakin, dorang bole dapa hidup deng Tuhan Allah slama-lamanya, sama deng Tuhan Allah so janji. Karna waktu Tuhan Allah bolong biking dunia ini, Dia so janji kamuka, Dia mo kase hidup slama-lamanya pa orang-orang yang percaya pa Dia. Dia pe janji itu pasti jadi, karna Tuhan Allah tara perna bafoya.

Ibrani 3:1

Sudara-sudara yang so jadi Tuhan Allah pe umat, yang so dapa pangge untuk hidup sama-sama deng Dia di sorga, coba ngoni pikir bae-bae tentang Yesus Kristus yang torang so percaya. Dia itu Tuhan Allah pe Utusan deng Dia lagi Imam Basar, karna Dia biking sampe torang manusia deng Tuhan Allah pe hubungan bisa jadi bae ulang.

1 Petrus 1:20

Waktu dunia ini bolong ada, Tuhan Allah so pili pa Yesus Kristus. Kong di hari-hari yang so dekat deng kiamat ini, Dia so datang di dunia supaya ngoni samua bole slamat dari ngoni pe dosa-dosa.

1 Petrus 2:9

Tapi ngoni ini suda yang Tuhan Allah so pili jadi Dia pe umat, kong biking ngoni jadi sama deng imam yang jaga layani pa Dia yang jadi torang pe Raja. Dia kase pisa pa ngoni dari samua orang untuk jadi Dia pe umat sandiri, kong ngoni jadi Dia pe rakyat yang pe hati bersi pa Dia pe muka. Ngoni jadi bagitu, supaya ngoni bole kase tau pa orang-orang hal-hal luar biasa yang Dia so biking. Dia itu suda yang so pangge pa ngoni kaluar dari galap, maso pa Dia pe tarang yang luar biasa.

Wahyu 13:8

Kong samua orang yang tinggal di bumi mo semba pa binatang itu. Orang-orang yang semba itu, dorang yang pe nama tara tatulis di Anak Domba pe buku kehidupan waktu dunia ini bolong jadi. Buku kehidupan itu, Anak Domba yang so perna dapa bunu pe buku. Di buku itu, Tuhan Allah tulis orang-orang pe nama yang mo dapa hidup deng Tuhan Allah slama-lamanya.

Wahyu 17:8

Binatang jahat yang ngana lia tadi itu, dulu so perna ada, tapi dia so tarada lagi. Nanti dia akan muncul dari jurang maut, tampa tahang setang-setang, turus dia mo mati slama-lamanya. Kong orang-orang yang tinggal di dunia akan herang waktu lia binatang itu. Dorang yang herang itu yang pe nama tara tatulis di buku kehidupan waktu Tuhan Allah bolong biking dunia ini. Dorang akan herang kalu dong lia, binatang itu dulu ada, skarang so tarada, tapi nanti akan datang ulang.