2 Timotius 1:5 - Perjanjian Baru Bahasa Melayu Maluku Utara

⁵ Kita inga deng yakin, ngana itu sunggu-sunggu percaya pa Tuhan Yesus, sama deng ngana pe nene Lois deng mama Eunike yang so percaya pa Yesus kamuka.

2 Timotius 1:5 ပူးပေါင်းရင်းမြစ်များ

Yohanes 1:47

Turus dorang dua pigi pa Yesus. Pe lia Natanael datang pa Dia, Yesus bilang, “Coba ngoni lia, dia yang kamari ini butul-butul orang Israel, dia tara putar bale.”

Kisah Para Rasul 16:1

Paulus bajalang di kota Derbe, kong dia turus di kota Listra. Di situ, Paulus baku dapa deng satu orang yang pe nama Timotius, dia ini so percaya pa Yesus. Dia pe mama itu orang Yahudi yang so percaya pa Yesus Kristus, kong dia pe papa bukang orang Yahudi.

Kisah Para Rasul 26:26

Raja Agripa sandiri tau samua yang kita bilang itu, jadi kita barani bicara tarang-tarang pa raja pe muka. Samua itu jadi di orang banya pe muka, jadi kita yakin tarada satu yang raja tara tau.

Roma 14:14

Deng karna kita so satu hati deng Tuhan Yesus, kita tau deng yakin, tara ada lagi makanang yang haram pa Tuhan Allah pe muka. Tapi kalu ada orang yang pikir ada makanang yang haram, makanang itu mo jadi haram untuk dia kalu dia makang.

Roma 14:5

Ada conto laeng lagi bagini: ada orang yang pikir kata, ada hari yang lebe penting dari hari yang laeng. Ada lagi yang bilang samua hari sama saja. Tapi sebenarnya hari apa saja yang torang pili untuk semba pa Tuhan Allah, torang musti yakin, apa yang torang biking itu Tuhan Allah anggap butul.

Roma 15:14

Sudara-sudara, kita tau butul ngoni so banya biking barang yang bae, ngoni so banya mangarti Tuhan pe ajaran, deng ngoni me so mampo untuk baku kase ajar satu deng yang laeng Tuhan pe ajaran itu.

Roma 4:21

Abraham yakin skali Tuhan Allah akan biking Dia pe janji itu.

Roma 8:38

Kita yakin skali, tara ada satu yang bisa kase pisa pa torang dari Yesus Kristus pe sayang. Jadi biar torang masi hidup atau so mati, Tuhan tetap sayang pa torang. Malaekat-malaekat deng setang-setang me tarada kuasa untuk mo kase pisa pa torang dari Tuhan pe sayang. Apa saja yang mo jadi skarang atau nanti, Tuhan tetap sayang pa torang.

2 Korintus 6:6

Samua yang torang biking, tong biking deng hati bersi, torang lagi tau banya hal karna Tuhan Allah bantu pa torang, torang sabar, torang bae-bae deng orang, torang sayang orang butul-butul, deng Roh Kudus bakarja di torang pe hati.

1 Timotius 1:5

Kita kase nasehat ini pa ngana, dia pe tujuan supaya orang-orang percaya baku sayang. Torang bisa baku sayang kalu torang pe hati so bersi, torang pe hati tau apa yang butul, deng tong so butul-butul percaya pa Tuhan.

1 Timotius 4:6

Timotius, ngana musti kase ajar hal-hal itu turus pa orang-orang percaya supaya dorang jang iko ajaran sesat. Kalu ngana kase ajar samua itu, ngana so jadi Kristus Yesus pe pelayan yang bae. Ngana pe percaya me akan jadi kuat karna ngana iko turus ajaran yang butul yang orang ajar pa ngana dari dulu.

2 Timotius 1:12

Kong karna kita kase tau Kabar Bae itu, kita dapa siksa dari orang-orang yang tara suka Kabar Bae itu sampe dong kase maso pa kita di penjara. Tapi biar bagitu me, kita tara malu, karna kita tau butul Tuhan yang kita percaya itu, deng kita yakin Dia pe kuasa ada pa kita turus untuk jaga tugas yang Dia so kase percaya pa kita sampe Dia datang ulang yang kedua kali.

2 Timotius 3:15

Waktu ngana masi kacil, ngana so tau Kitab Suci. Kitab Suci itu yang biking ngana jadi tau Tuhan pe jalang yang butul sampe ngana bole percaya pa Kristus Yesus kong Dia bole kase slamat pa ngana.

Ibrani 11:13

Orang tua dulu-dulu yang tadi kita so bilang itu tetap percaya pa Tuhan Allah sampe dorang mati. Waktu dorang masi hidup, memang dorang bolong tarima apa yang Tuhan Allah janji pa dorang. Tapi dorang yakin dong akan tarima itu, jadi bole kase sama deng dorang ada balia dari jao apa yang Tuhan Allah janji pa dorang kong dorang sambut itu. Kong sementara dorang tunggu Tuhan pe janji mo jadi pa dorang, dong jaga bilang dong pe diri di dunia itu sama deng tamu deng pendatang saja yang tinggal tara lama di dunia ini.

Ibrani 6:9

Tapi ngoni sudara-sudara yang kita sayang, biar torang bicara bagitu, torang yakin ngoni tara sama deng tana yang dapa kutuk itu. Tapi yang ngoni biking itu kase tunju ngoni so jadi percaya pa Tuhan Allah, jadi torang yakin, ngoni termasuk orang yang dapa slamat dari dosa-dosa.

1 Petrus 1:22

Jadi karna ngoni so iko ajaran yang butul tentang Yesus Kristus, ngoni pe hati so jadi bersi. Deng bagitu, ngoni bisa baku sayang deng hati yang tulus di antara ngoni sudara-sudara yang sama-sama percaya. Karna itu, ngoni musti sunggu-sunggu baku sayang satu deng yang laeng deng hati yang tulus,