2 Timotius 1:14 - Perjanjian Baru Bahasa Melayu Maluku Utara

¹⁴ Ngana pe tugas, kase tau Kabar Bae. Kabar Bae itu sama deng harta yang mahal. Jadi jaga ngana pe tugas itu bae-bae. Roh Kudus yang ada di torang pe hati, mo bantu pa torang jaga tugas itu, supaya tarada orang yang biking itu jadi ajaran sesat.

2 Timotius 1:14 ပူးပေါင်းရင်းမြစ်များ

Lukas 16:11

Jadi kalu ngoni tara bisa dapa kase percaya harta di dunia ini, tarada yang mo kase percaya pa ngoni harta yang di sorga.

Yohanes 14:17

Penolong itu Tuhan Allah pe Roh, yang mo kase ajar pa ngoni apa yang butul tentang Tuhan Allah. Orang-orang yang tara percaya pa Tuhan Allah, tara bisa tarima Tuhan Allah pe Roh itu, barang dorang tara dapa lia pa Dia deng tara kanal pa Dia. Tapi ngoni ini kanal pa Dia karna Dia ada sama-sama deng ngoni kong akan jadi satu deng ngoni.

Roma 3:2

Yang pasti, banya skali dia pe untung. Yang paling penting itu, torang orang Yahudi yang kakamuka Tuhan Allah pili untuk tarima deng jaga Dia pe firman.

Roma 8:11

Tuhan Allah pe Roh so kase hidup ulang pa Kristus Yesus, kong Roh itu suda yang ada di ngoni pe hati. Jadi biar ngoni pe badan mo mati, tapi Tuhan Allah nanti mo kase hidup ulang pa ngoni pake kuasa dari Dia pe Roh yang ada pa ngoni itu.

Roma 8:13

Karna kalu ngoni hidup iko manusia pe mau, ngoni mo dapa hukum tapisa deng Tuhan Allah slama-lamanya. Tapi kalu ngoni hidup iko Tuhan Allah pe Roh, Tuhan Allah pe Roh akan tolong pa ngoni supaya ngoni berenti biking ngoni pe mau yang jahat, ngoni itu mo hidup deng Tuhan Allah slama-lamanya.

Roma 8:9

Tapi ngoni, ngoni so tara hidup iko manusia pe mau yang suka biking dosa itu. Ngoni so hidup iko Tuhan Allah pe Roh pe mau, kalu memang Roh itu so ada di ngoni pe hati. Tapi inga e, orang yang tara ada Yesus Kristus pe Roh di dia pe hati, dia itu bukang Yesus Kristus pe umat.

1 Korintus 3:16

Ngoni tau ka tarada, ngoni itu sama deng Tuhan Allah pe Ruma, kong Tuhan Allah pe Roh tinggal pa ngoni.

1 Korintus 6:19

Ngoni so tau to, Roh Kudus tinggal dalam ngoni pe diri, jadi ngoni sama deng so jadi Tuhan Allah pe Ruma yang Roh Kudus tinggal. Tuhan Allah yang kase Roh Kudus itu pa ngoni, kong ngoni pe diri itu bukang ngoni punya sandiri, tapi Tuhan Allah punya.

1 Korintus 9:17

Barang, kalu kita kase tau Kabar Bae itu karna kita pe mau sandiri, kita me harap dapa balasan dari kita pe suar lala itu. Tapi yang kita biking itu bukang kita pe mau sandiri. Kita kase tau Kabar Bae itu, barang Tuhan Allah yang kase percaya pa kita untuk kita biking itu.

2 Korintus 5:16

Jadi karna torang tau Yesus Kristus pe sayang pa samua orang itu, torang tara nilai orang pake manusia pe pikiran lagi. Memang dulu waktu torang bolong percaya Tuhan itu, torang nilai pa Yesus Kristus pake manusia pe pikiran, tapi skarang tara bagitu lagi.

Galatia 2:7

Dorang tara suru tamba apa-apa lagi, mala dorang jadi yakin Tuhan Allah yang kase percaya pa kita untuk kase tau Kabar Bae tentang Yesus Kristus pa orang-orang bukang Yahudi, sama deng Dia me ada kase percaya pa Petrus untuk kase tau pa orang-orang Yahudi.

Efesus 2:22

Jadi skarang, karna torang so jadi satu hati deng Yesus Kristus, biar dari bangsa mana saja, Dia biking torang samua jadi satu, sama deng satu ruma, kong di situ tampa untuk Tuhan Allah pe Roh tinggal.

Efesus 5:18

Jang ngoni bamabo, karna itu yang biking ngoni tara bisa kuasai ngoni pe diri, sampe ngoni biking banya macam barang yang tara bae. Tapi lebe bae ngoni kase ngoni pe diri untuk Roh Kudus kuasai.

Kolose 4:11

Bagitu lagi deng Yesus yang orang jaga pangge pa dia Yustus, dia ada kirim salam pa ngoni. Dari samua tamang-tamang yang karja sama-sama deng kita untuk Tuhan, cuma dorang tiga itu yang orang Yahudi. Dorang tiga itu suda yang kase kuat kita pe hati. Kong torang pe karja itu, kase tau tentang bagimana orang-orang bisa jadi Tuhan Allah pe umat la Dia Berkuasa sebagai Raja pa dorang pe hidup.

1 Tesalonika 5:19

Jang lawan Tuhan Allah pe Roh yang sementara bakarja.

1 Timotius 1:11

Ajaran yang butul itu, Kabar Bae dari Tuhan Allah. Tuhan Allah itu hebat kong pantas orang puji. Dia yang kase percaya pa kita la kase tau pa orang-orang Kabar Bae itu.

1 Timotius 6:20

Timotius, ngana musti jaga bae-bae samua yang Tuhan so kase percaya pa ngana. Jang ngana badekat deng orang yang bacarita hal yang tarada dia pe guna deng yang tara hormati pa Tuhan Allah. Deng jang ngana badekat pa orang yang bawa ajaran sesat, yang orang jaga bilang ‘pengetahuan’, padahal itu sala.

2 Timotius 1:12

Kong karna kita kase tau Kabar Bae itu, kita dapa siksa dari orang-orang yang tara suka Kabar Bae itu sampe dong kase maso pa kita di penjara. Tapi biar bagitu me, kita tara malu, karna kita tau butul Tuhan yang kita percaya itu, deng kita yakin Dia pe kuasa ada pa kita turus untuk jaga tugas yang Dia so kase percaya pa kita sampe Dia datang ulang yang kedua kali.

2 Timotius 2:2

Ngana so dengar samua ajaran yang kita ajar pa orang banya. Ngana musti kase ajar ajaran itu pa orang laeng yang ngana bisa percaya deng yang pande mangajar. Deng bagitu dorang jadi tau kong ajar lagi ajaran itu pa orang laeng.

1 Petrus 1:22

Jadi karna ngoni so iko ajaran yang butul tentang Yesus Kristus, ngoni pe hati so jadi bersi. Deng bagitu, ngoni bisa baku sayang deng hati yang tulus di antara ngoni sudara-sudara yang sama-sama percaya. Karna itu, ngoni musti sunggu-sunggu baku sayang satu deng yang laeng deng hati yang tulus,