2 Timotius 1:10 - Perjanjian Baru Bahasa Melayu Maluku Utara

¹⁰ Kong skarang Tuhan Allah so kase Dia pe bae itu pa torang. Yesus Kristus so datang deng kase slamat pa torang dari tong pe dosa, kong kase ancor kuasa yang biking sampe orang bisa mati slama-lamanya. Jadi sapa yang percaya Kabar Bae tentang Yesus Kristus, dia hidup deng Tuhan Allah sampe slama-lamanya.

2 Timotius 1:10 ပူးပေါင်းရင်းမြစ်များ

Lukas 11:36

Kalu ngoni samua pe hidup ini tarang deng tara ada bagian yang galap biar cuma sadiki, pasti ngoni pe hidup akan tarang skali sama deng lampu pe cahaya yang ada kase tarang pa ngoni.”

Lukas 13:7

Kong dia bilang pa orang yang jaga kobong itu, ‘Lia, so tiga taong kita bula-bale cari pohong ara ini pe bua, tapi kita tara perna dapa. Potong suda pohong ini! Untuk apa dia hidup di atas tana ini kalu dia tara babua!’

Lukas 2:11

Kabar yang bae itu bagini: hari ini, Orang yang mo kase slamat pa manusia so lahir. Dia so lahir di Betlehem, raja Daud pe kota. Dia itu orang pangge Kristus, Raja yang Tuhan Allah janji mo kase slamat pa ngoni. Dia itu suda Tuhan.

Yohanes 1:9

Tarang yang butul itu Yesus suda, kong Dia sementara datang di dunia. Dia mo kase tarang samua orang pe hati la dorang bole tau tentang Tuhan Allah.

Yohanes 14:6

Kong Yesus bilang pa dia, “Kita ini jalang yang mo pigi pa Tuhan Allah, deng Kita ini yang kase tau yang butul tentang Tuhan Allah, deng Kita lagi yang kase hidup deng Tuhan Allah slama-lamanya. Jadi, tara ada satu orang yang bole pigi pa Tuhan Allah kalu tara iko pa Kita.

Yohanes 20:31

Tapi samua yang so tatulis di kitab ini, itu ada tulis supaya ngoni percaya Yesus itu Mesias, Raja yang Tuhan Allah janji mo kase slamat pa manusia, deng Dia itu Anak Allah. Kalu ngoni so percaya pa Dia, ngoni mo dapa hidup deng Dia slama-lamanya.

Yohanes 4:42

Dorang bilang pa parampuang itu, “Torang skarang percaya bukang cuma karna dengar apa yang ngana bilang, tapi karna torang sandiri so dengar dari Dia langsung kong torang so tau Dia itu memang butul-butul Orang yang mo kase slamat pa manusia dari dosa-dosa.”

Yohanes 5:40

Tapi biar bagitu, ngoni tara mau datang pa Kita untuk dapa hidup deng Tuhan Allah slama-lamanya.

Kisah Para Rasul 13:23

Sudara-sudara yang percaya, dari Daud pe turunan itu suda, Tuhan Allah so pili satu Orang untuk torang orang Israel yang akan kase slamat pa manusia, sama deng Tuhan Allah janji dari dulu. Dia itu suda Yesus.

Kisah Para Rasul 5:31

Yesus itu suda yang Tuhan Allah so angka kong taru di tampa yang terhormat pa Tuhan Allah pe sabla kanan. Skarang Yesus so jadi Pemimpin deng yang kase slamat pa torang orang Israel, supaya torang bertobat kong iko pa Tuhan Allah, deng bagitu Tuhan Allah mo kase ampun pa torang.

Roma 16:26

tapi skarang baru Tuhan Allah kase tau pa torang manusia. Kabar Bae itu, Tuhan Allah so janji pa nabi-nabi dulu kong Dia suru dorang tulis itu supaya samua orang yang dari samua suku bangsa tau, kong dorang bole jadi percaya deng iko pa Yesus. Tuhan Allah itu salalu ada sampe slama-lamanya.

Roma 2:7

Ada orang yang biking barang yang bae turus, karna dorang suka dapa puji deng hormat dari Tuhan Allah, deng dorang suka hidup deng Tuhan Allah slama-lamanya. Jadi pa dorang itu, Tuhan Allah mo kase hidup deng Dia slama-lamanya.

Roma 3:31

Tapi ada kaapa orang yang pikir, “Jadi kalu Tuhan Allah biking torang jadi orang yang tara sala karna torang percaya pa Yesus, itu pe arti, torang tara perlu mo biking lagi aturan di lima kitab Musa.” Sama skali bukang bagitu. Mala karna torang percaya, torang lebe tamba biking aturan di lima kitab Musa itu.

Roma 6:6

Torang tau to, torang pe hidup lama yang suka biking dosa itu so mati sama-sama deng Yesus Kristus di kayu salib, supaya torang so tara iko lagi torang pe mau yang basar untuk mo biking dosa, itu sama deng torang so tara jadi dosa pe suru-suru lagi.

1 Korintus 15:26

Kong Tuhan Allah pe musu yang terahir yang Dia mo kase kala itu, kuasa yang biking orang mati.

1 Korintus 4:5

Karna itu, jang ngoni nilai orang laeng sala kalu bolong dia pe waktu. Nanti waktu Tuhan datang ulang, itu dia pe waktu untuk Tuhan mo adili pa samua orang. Kong waktu itu, Dia mo buka samua hal yang orang sambunyi dalam galap. Dia me akan buka apa yang orang rencana dalam hati. Waktu itu, Tuhan Allah akan puji pa tiap orang yang pantas dapa puji.

2 Korintus 5:4

Memang selama torang hidup deng tong pe badan di dunia ini, torang mengelu karna banya sengsara. Tapi biar torang mengelu, itu bukang berarti torang ingin capat mati la torang lapas tong pe badan yang skarang, tapi torang mau supaya torang ganti tong pe badan yang lama deng badan yang baru di sorga.

Galatia 5:4

Kalu ngoni mau iko aturan-aturan di lima kitab Musa untuk jadi orang yang butul pa Tuhan Allah pe muka, itu berarti, ngoni pe hubungan deng Yesus Kristus so taputus. Karna Tuhan Allah so kase Dia pe bae pa ngoni deng cara biking ngoni jadi orang yang tara sala pa Dia pe muka. Jadi kalu ngoni sandiri mo usaha jadi orang yang butul, ngoni so tolak Dia pe bae itu.

Efesus 1:18

Kong kita minta lagi supaya Dia buka ngoni pe hati, la ngoni bisa mangarti butul samua hal yang ngoni bole harap pa Dia karna ngoni yang Dia so pili jadi Dia pe umat. Deng kita minta lagi supaya ngoni mangarti pe hebat skali samua janji yang Dia mo kase pa ngoni itu.

Efesus 1:9

Dulu, tarada orang yang tau Dia pe rencana itu, tapi skarang Dia so kase tau pa torang. Dia pe rencana itu tentang Yesus Kristus, kong rencana itu suda yang Dia ingin biking dari dulu.

2 Tesalonika 2:8

Waktu itu, baru orang jahat itu mo muncul. Tapi waktu Tuhan Yesus datang ulang deng Dia pe kuasa yang hebat, orang jahat itu akan mati slama-lamanya. Tuhan Yesus bunu pa dia deng cara tiop pa dia, langsung dia mati.

2 Timotius 1:1

Timotius, salam dari kita Paulus. Kita ini Kristus Yesus pe utusan yang orang sebut rasul. Kita jadi rasul, itu karna Tuhan Allah pe mau. Tuhan Allah pili pa kita untuk kase tau pa orang-orang Tuhan Allah pe janji. Tuhan Allah janji, kalu orang percaya pa Kristus Yesus, orang itu mo dapa hidup deng Dia slama-lamanya.

2 Timotius 1:8

Jadi jang ngana malu kase tau tentang torang pe Tuhan. Ngana me jang malu mangaku kita ini ngana pe tamang, biar skarang kita di penjara. Kita ada di penjara karna kita iko pa Tuhan. Ngana me musti siap-siap tarima siksa, karna ngana salalu kase tau Kabar Bae tentang Yesus Kristus pa orang-orang, sama deng kita. Kalu ngana dapa siksa, Tuhan Allah pasti kase kuat ngana pe hati.

2 Timotius 4:1

Yesus Kristus nanti mo datang ulang di dunia ini jadi Raja kong berkuasa. Dia yang mo adili orang-orang yang masi hidup deng yang so mati. Jadi skarang kita bilang deng butul-butul di Tuhan Allah deng Kristus Yesus pe muka, supaya ngana Timotius

2 Timotius 4:8

Satu conto lagi, kalu orang iko lomba kong juara, dia dapa hadia. Bagitu lagi deng kita, Tuhan so kase sadia kita pe hadia karna Dia lia kita hidup butul pa Dia pe muka. Hadia itu Dia simpang kong nanti Dia mo kase pa kita di hari yang Dia mo adili pa samua orang deng adil. Hadia itu bukang cuma kita yang mo dapa, tapi samua orang yang percaya yang tunggu-tunggu Dia datang lagi, dorang me mo dapa.

Titus 2:11

Torang musti hidup macam bagitu, barang Tuhan Allah so kase jalang la torang samua bole dapa slamat dari torang pe dosa-dosa, supaya torang jang dapa hukuman. Itu Dia pe bae pa torang.

Titus 2:13

Sementara torang biking samua itu, torang batunggu hari yang nanti biking torang paling sanang waktu Tuhan Yesus Kristus datang lagi deng Dia pe kuasa yang luar biasa. Dia itu suda torang pe Tuhan Allah Yang Paling Berkuasa, deng yang kase slamat pa torang. Torang pe harapan cuma pa Dia.

Titus 3:4

Biar torang so jahat bagitu, tapi Tuhan Allah sayang pa torang kong kase tunju Dia pe bae pa torang sampe torang bole dapa slamat dari torang pe dosa-dosa.

Ibrani 10:32

Coba ngoni inga waktu ngoni baru tarima Kabar Bae tentang Yesus Kristus deng jadi percaya pa Dia. Waktu itu, ngoni banya menderita karna ngoni pe percaya, tapi biar bagitu, ngoni tetap pegang kuat ngoni pe percaya.

2 Petrus 1:1

Sudara-sudara yang percaya, salam dari kita Simon Petrus. Kita ini orang yang jaga biking apa yang Yesus Kristus suru, deng kita ini me Dia pe utusan yang orang sebut rasul. Yesus Kristus itu Tuhan Allah, deng Dia me yang kase slamat pa torang dari dosa-dosa. Dia itu yang biking sampe ngoni percaya pa Dia sama deng torang yang so percaya pa Dia, karna Dia salalu biking barang yang butul.

2 Petrus 1:11

Deng bagitu, nanti Tuhan Allah akan buka pintu sorga untuk ngoni, Dia akan tarima pa ngoni di Tuhan Yesus Kristus pe tampa berkuasa sebagai Raja. Tuhan Yesus Kristus itu yang kase slamat pa torang, deng Dia itu yang jadi Raja slama-lamanya.

2 Petrus 1:3

Tuhan Allah itu hebat deng hati bae, kong karna itu, Dia pangge pa torang untuk iko pa Dia la torang kanal pa Dia. Kong karna torang so kanal pa Dia, Dia pake Dia pe kuasa yang basar untuk kase pa torang samua yang torang perlu supaya torang bole hidup iko Dia pe mau.

2 Petrus 2:20

Kita pe maksut, kalu dorang itu so kanal pa Yesus Kristus torang pe Tuhan deng Juruslamat, dorang me so lapas dari dunia pe mau yang jahat. Tapi kalu dorang bale ulang untuk iko keinginan-keinginan yang jahat itu, dorang pe keadaan nanti mo lebe soe dari yang pertama.

2 Petrus 3:18

Lebe bae tiap hari ngoni tamba sadar Yesus Kristus pe bae deng lebe tamba kanal pa Dia. Dia itu torang pe Tuhan Yesus Kristus yang kase slamat pa torang dari dosa-dosa. Kong untuk Dia suda puji deng hormat dari skarang sampe slama-lamanya. Amin.

2 Petrus 3:2

Ngoni musti inga Tuhan Allah pe pasáng yang dulu Dia pe nabi-nabi so perna kase tau. Ngoni me musti inga parenta dari torang pe Tuhan Yesus yang kase slamat pa torang. Parenta itu, Yesus pe utusan-utusan yang orang sebut rasul ada kase tau pa ngoni.

1 Yohanes 1:2

Dia itu yang kase hidup pa manusia. Dari pertama Dia ada sama-sama deng Bapa di sorga. Dia so datang di dunia kong torang lia pa Dia. Jadi torang mo jadi Dia pe saksi la kase tau pa ngoni bagimana ngoni bole mo dapa hidup deng Tuhan Allah slama-lamanya.

1 Yohanes 4:14

Torang ini so lia pa Anak Allah deng torang pe mata kapala sandiri kong so kase tau pa ngoni, butul Tuhan Allah torang pe Bapa so utus Dia pe Anak untuk kase slamat pa manusia yang ada di dunia ini.

Wahyu 18:1

Abis itu, kita lia ada malaekat satu yang laeng, turung dari sorga. Dia ada kuasa basar deng dia pe cahaya luar biasa sampe dunia ini jadi tarang.

Wahyu 2:7

Jadi dengar bae-bae apa yang Tuhan Allah pe Roh kase tau pa Dia pe jemaat-jemaat, bagini, ‘Sapa yang menang dari pengaru jahat, Kita mo kase pa dorang hak untuk makang bua dari pohong kehidupan yang ada di Tuhan Allah pe taman Firdaus.’ ”

Wahyu 20:14

Abis itu, kuasa yang biking orang mati deng tampa orang mati, dapa lempar di api yang luas skali. Hukuman dapa lempar di api itu, dia pe nama kematian yang kedua.

Wahyu 22:14

Orang-orang yang pe hati so bersi, dorang sama deng orang yang cuci dong pe pakeang sampe bersi. Dorang itu paling sanang suda, karna nanti dong bole maso di dalam kota itu iko pintu-pintu gerbang, deng dorang lagi ada hak untuk makang bua yang biking dorang hidup deng Tuhan Allah sampe slama-lamanya.

Wahyu 22:17

Kong Tuhan Allah pe Roh deng pengantin parampuang itu bilang, “Mari suda!” Sapa saja yang dengar itu, lebe bae dia bilang, “Mari suda!” Sapa yang aus, lebe bae dia datang. Deng sapa yang mau minum, lebe bae dia ambe aer deng cuma-cuma, aer yang biking orang hidup deng Tuhan Allah slama-lamanya.