2 Petrus 2:1 - Perjanjian Baru Bahasa Melayu Maluku Utara

¹ Dulu, ada orang-orang yang muncul di orang Israel pe tenga-tenga, yang bilang kata, dorang itu Tuhan Allah pe nabi yang kase turus Tuhan Allah pe pasáng, padahal dong foya. Kong sama deng itu, skarang ini akan ada lagi di ngoni pe tenga-tenga guru-guru agama palsu. Guru-guru palsu itu mo kase ajar ajaran yang orang kira butul, padahal tarada, kong ajaran itu biking rusak orang pe hidup. Kong bukang cuma itu, orang yang iko ajaran itu me mo manyangkal Tuhan Yesus yang so tebus pa dorang. Jadi, apa yang guru-guru palsu biking itu cuma mo biking dong sandiri capat mati kong tapisa deng Tuhan Allah slama-lamanya.

2 Petrus 2:1 ပူးပေါင်းရင်းမြစ်များ

Matius 10:33

Tapi sapa yang manyangkal pa Kita di orang banya pe muka, nanti Kita me akan manyangkal pa dia di Kita pe Bapa di sorga pe muka.”

Matius 24:11

Nanti ada banya orang yang datang, bilang kata, dorang itu nabi yang kase turus Tuhan Allah pe pasáng. Padahal dorang cuma tipu la banya orang so tara percaya lagi.

Matius 24:24

Karna nanti ada banya orang datang bilang kata, dorang Mesias, atau bilang kata, dorang nabi yang kase turus Tuhan Allah pe pasáng. Deng dorang me biking mujizat-mujizat deng tanda-tanda yang kase tunju dong pe kuasa yang hebat, supaya orang percaya pa dorang kong jang percaya pa Tuhan yang butul lagi. Deng kalu bisa, dorang me mo biking sesat pa orang-orang yang Tuhan Allah so pili.

Matius 24:5

Barang, banya orang akan datang pake Kita pe nama, deng dorang bilang bagini, ‘Kita ini suda Mesias, Raja yang Tuhan Allah janji mo kase slamat pa manusia!’ Tapi dorang itu cuma biking tipu banya orang la iko pa dorang.

Matius 7:15

Yesus bilang lagi, “Ngoni musti ati-ati deng nabi-nabi palsu yang datang pa ngoni! Barang, dorang bilang kata, dorang itu orang yang jaga kase turus Tuhan Allah pe pasáng, padahal bukang. Dorang pura-pura bae sama deng domba, padahal dorang jahat sama deng anjing utang.

Markus 13:22

Karna nanti ada banya orang datang bilang kata, dorang Mesias, atau bilang kata, dorang nabi yang kase turus Tuhan Allah pe pasáng. Deng dorang me biking mujizat-mujizat deng tanda-tanda yang kase tunju dong pe kuasa supaya orang percaya pa dorang kong jang percaya pa Tuhan yang butul lagi. Deng kalu bisa, dorang me mo biking sesat pa orang-orang yang Tuhan Allah so pili.

Lukas 12:9

Tapi sapa yang manyangkal pa Kita di orang banya pe muka, nanti Kita me akan manyangkal dia di Tuhan Allah pe malaekat-malaekat pe muka.

Lukas 21:8

Yesus bilang pa dorang, “Ngoni ati-ati e, jang sampe ngoni dapa tipu. Barang, banya orang akan datang pake Kita pe nama, deng dorang bilang bagini, ‘Kita ini Dia suda, Raja yang Tuhan Allah janji mo kase slamat pa manusia!’ Dorang me akan bilang, hari kiamat so dekat. Tapi jang ngoni iko pa dorang itu.

Lukas 6:26

Kong ngoni yang dapa puji dari samua orang, cilaka suda ngoni, karna itu sama deng yang jadi dulu-dulu pa nabi-nabi yang tara butul. Dorang bilang kata, dong bawa Tuhan Allah pe pasáng, padahal tarada. Ngoni pe orang tua dulu-dulu jaga puji pa dorang.”

Roma 16:18

Barang orang-orang yang macam bagitu, sebenarnya dorang tara karja untuk Yesus Kristus torang pe Tuhan, tapi dorang karja iko dong pe mau sandiri. Dorang buju deng kata-kata yang kase sadap di talinga pa orang yang masi bolong mangarti mana yang bae deng mana yang tara bae, sampe orang-orang me iko pa dorang pe ajaran yang tara butul.

1 Korintus 11:19

Memang ngoni musti tapisa-pisa satu deng yang laeng, supaya jadi jelas, sapa yang butul-butul iko pa Tuhan deng sapa yang tarada.

1 Korintus 6:20

Barang, waktu Tuhan Yesus mati untuk tebus ngoni pe dosa, itu pe arti, Dia so bili pa ngoni untuk jadi Dia pe umat. Jadi, ngoni musti pake ngoni pe badan untuk biking apa yang bae, supaya Tuhan Allah dapa puji deng hormat.

1 Korintus 7:23

Ngoni, Tuhan Allah so bili deng bayar mahal waktu Yesus Kristus dapa salib untuk tebus ngoni pe dosa-dosa. Karna itu, jang lagi kase ngoni pe diri untuk dapa bili jadi manusia pe orang karja.

Galatia 2:4

Memang ada babarapa orang laeng yang tantang supaya Titus dapa sunat. Dorang itu maso babadiam di jemaat, biking diri percaya pa Yesus Kristus sama deng torang, padahal dorang itu cuma mo cari tau pa torang. Dorang lia torang so bebas dari aturan-aturan di lima kitab Musa karna torang so percaya pa Kristus Yesus, kong dorang mo biking torang taika ulang deng aturan-aturan itu, sama deng orang karja yang taika pa dia pe tuang.

Galatia 3:13

Kong torang samua pantas dapa kutuk karna torang tara mampo iko samua aturan di lima kitab Musa. Tapi biar bagitu me, Yesus Kristus kase Dia pe diri mati la kase bebas pa torang dari kutuk itu, deng cara Dia kase Dia pe diri dapa kutuk mati untuk torang. Karna di Kitab Suci ada tatulis bagini, “Orang yang dapa hukum mati di kayu salib, dia itu sama deng dapa kutuk dari Tuhan Allah.”

Galatia 4:17

Orang-orang yang ajar pa ngoni ajaran-ajaran yang tara butul itu, dorang berusaha skali perhatikan bae-bae pa ngoni supaya ngoni iko pa dorang, tapi yang dong ada biking itu tara bagus. Dorang suka kase putus tong dua deng ngoni pe hubungan supaya ngoni cuma mo iko pa dorang kong bukang iko pa tong dua.

Galatia 5:20

jaga semba pa dong pe puji-puji, pake tiop-tiop, binci pa orang laeng, bakalae, mangiri pa orang-orang laeng, capat skali mara, cuma pikir diri sandiri, suka biking orang tapisa-pisa, suka baku beda pendapat sampe biking kelompok-kelompok,

Efesus 1:7

Barang, deng Yesus Kristus mati kong Dia pe dara tatumpa untuk tebus pa torang, torang bole dapa ampun dari torang pe dosa-dosa. Samua itu torang dapa, karna Tuhan Allah pe bae yang basar skali pa torang.

Efesus 4:14

Kalu torang pe percaya so kuat bagitu, torang so tara gampang dapa tipu sama deng ana kacil. Jadi kalu ada orang yang datang kase ajar ajaran macam-macam yang tara butul untuk pengaru pa torang, torang tara akan gampang taiko pa dorang. Torang tara akan sama deng omba yang kasana-kamari iko angin batiop.

Filipi 3:19

Orang-orang yang pe hidup macam bagitu, mo tapisa deng Tuhan Allah slama-lamanya. Orang-orang itu tara iko Tuhan pe mau, mala dorang cuma biking puas dong pe diri sandiri, sampe itu suda yang jadi paling penting pa dorang pe hidup. Dorang biking hal-hal yang sebenarnya biking dong malu, tapi dong pikir dong hebat, dong suka orang puji dong biking bagitu, kong dorang cuma pikir dunia pe mau saja.

Kolose 2:18

Jadi jang ngoni dengar pa orang-orang yang bilang kata, Tuhan Allah mo hukum pa ngoni karna ngoni tara iko dorang pe aturan agama. Dorang bapuasa banya-banya supaya orang lia kata, dorang hebat kong suru ngoni iko. Deng dorang suru pa ngoni semba pa malaekat-malaekat. Dorang suka bicara sombong tentang dong pe penglihatan-penglihatan yang dong dapa dari Tuhan. Dorang jaga kase sombong deng dong pe diri, itu karna yang dorang biking itu cuma iko manusia pe pikiran.

Kolose 2:8

Sudara-sudara, ngoni musti ati-ati, jang sampe ada orang yang pengaru pa ngoni untuk iko deng dong pe ajaran-ajaran agama yang tara butul. Dorang pe ajaran itu tara ada dia pe guna, karna bukang ajaran tentang Yesus Kristus. Tapi dorang pe ajaran itu dari dong pe orang tua dulu-dulu deng dari roh-roh yang berkuasa di dunia ini.

1 Timotius 5:8

Karna kalu ada orang yang tara mau urus orang-orang yang ada hubungan keluarga deng dia, apalagi dia pe keluarga yang satu ruma deng dia, itu sama saja dia so manyangkal pa Tuhan Yesus. Orang itu lebe soe dari orang yang tara percaya pa Tuhan.

2 Timotius 4:3

Ngana musti rajin biking itu karna akan ada dia pe waktu, orang-orang tara mau dengar lagi ajaran yang butul. Mala dorang cuma mo pangge guru-guru agama yang dorang suka. Guru-guru itu mo bilang pa dorang hal-hal yang dorang suka dengar saja supaya cuma iko dorang pe mau.

Titus 1:11

Orang-orang yang bagitu, ngana musti larang pa dorang supaya jang dong ajar lagi ajaran yang tara butul itu. Barang, dorang so biking kaco banya keluarga deng dong pe ajaran itu. Padahal dorang itu mangajar cuma karna mau dapa doi.

Titus 3:10

Kalu ada orang yang biking sampe jemaat so tara satu hati, ngana togor pa dia la dia berenti. Kalu ngana so togor pa dia sampe dua kali kong dia tara dengar, jang ngana badekat lagi pa dia.

Ibrani 10:29

Orang yang tara iko lima kitab Musa saja dapa hukuman barát bagitu, apalagi orang yang so pandang enteng pa Anak Allah, dia pasti dapa hukuman yang lebe barát lagi karna dia so tolak pa Yesus Kristus. Dia sama deng so injang-injang pa Anak Allah, deng anggap Yesus Kristus pe dara tara arti apa-apa. Padahal, Yesus Kristus pe dara so tatumpa untuk biking janji yang baru antara manusia deng Tuhan Allah, kong dara itu lagi yang biking orang itu jadi Tuhan Allah pe umat yang bersi dari dosa. Jadi orang yang pandang enteng itu so hina pa Roh Kudus, padahal Roh Kudus itu yang Tuhan Allah kase pa torang cuma karna Dia pe bae pa torang.

1 Petrus 1:8

Biar ngoni bolong perna lia pa Yesus Kristus, tapi ngoni sayang pa Dia. Deng biar lagi skarang ngoni tara lia pa Dia, tapi ngoni percaya pa Dia. Ngoni sanang skali, sampe tara bisa bilang pake kata-kata lagi tentang ngoni pe sanang itu.

2 Petrus 2:3

Guru-guru palsu itu gila doi, jadi dorang karang-karang carita la tipu pa ngoni samua, supaya dong dapa doi. Tapi dari dulu, Tuhan Allah so rencana untuk hukum pa dorang. Dorang itu pasti mo mati tapisa dari Tuhan Allah slama-lamanya.

1 Yohanes 2:26

Samua yang kita tulis pa ngoni ini, mo kase tau pa ngoni tentang orang-orang yang berusaha mo tipu pa ngoni deng ajaran yang tara butul.

1 Yohanes 4:1

Sudara-sudara yang kita sayang, jang ngoni percaya pa samua orang yang bilang, pa dorang ada Tuhan Allah pe Roh. Lebe bae ngoni lia dulu bae-bae kalu dorang butul dari Tuhan ka bukang, karna banya orang yang datang skarang bilang kata, dong kase turus Tuhan Allah pe pasáng, padahal bafoya. Dorang cuma nabi palsu.

Yudas 1:18

Dorang bilang, nanti waktu so mo kiamat, akan datang orang-orang yang suka bahina torang pe percaya. Dorang itu akan hidup iko dong pe napsu yang baku lawan deng Tuhan Allah pe mau.

Yudas 1:4

Barang, ada orang-orang yang bawa ajaran yang tara butul yang so maso pa ngoni pe jemaat, tapi ngoni tara sadar. Dorang itu tara iko Tuhan Allah pe mau. Dorang memang so tarima ajaran tentang torang pe Tuhan Allah pe bae, tapi dorang kase putar bale ajaran itu la orang bisa iko dorang pe napsu yang tara bae. Deng dorang me manyangkal, Yesus Kristus yang cuma satu itu saja torang pe Tuhan, yang berkuasa pa samua-samua. Orang-orang model bagini, dari dulu ada tatulis di Kitab Suci, dorang memang akan dapa hukuman.

Wahyu 13:14

Dia biking tanda-tanda itu di binatang pertama pe muka, sampe dia kase sesat orang-orang di bumi. Dia me suru dorang biking patong satu sama deng binatang yang pertama, binatang yang ada luka barát tapi so sembu itu.

Wahyu 2:13

Kita tau ngoni pe tampa tinggal. Ngoni tinggal di kota Pergamus, memang kota yang Iblis, setang-setang pe raja pe tampa berkuasa. Tapi biar bagitu, ngoni percaya turus pa Kita. Tempo hari, ada orang yang dia pe nama Antipas, Kita pe saksi yang setia, dia kase tau Tuhan Allah pe pasáng, kong dong bunu pa dia. Tapi biar dorang bunu pa dia di ngoni pe tenga-tenga, ngoni percaya turus pa Kita, ngoni tara manyangkal pa Kita.

Wahyu 2:9

Kita tau ngoni so dapa siksa, baru ngoni miskin lagi. Tapi Tuhan lia ngoni kaya karna ngoni percaya butul-butul pa Tuhan. Kita tau lagi tentang orang-orang Yahudi yang bilang kata, dorang Tuhan Allah pe umat yang Dia pili, padahal dorang pe kalakuang tara iko Tuhan Allah pe mau. Dorang bicara tara bae tentang ngoni. Dorang itu sama deng jemaat yang semba pa Iblis, setang-setang pe raja.

Wahyu 3:8

Kita tau samua yang ngoni jaga biking: Kita tau ngoni pe pengaru cuma sadiki. Tapi biar bagitu me, ngoni so iko Kita pe parenta deng ngoni me tara perna manyangkal pa Kita. Jadi dengar bae-bae! Kita so buka pintu untuk ngoni, pintu yang tara ada orang bisa tutu.

Wahyu 5:9

Kong dorang manyanyi puji pa Anak Domba itu deng lagu baru bagini: “Anak Domba ini yang pantas tarima kitab tagulung itu, deng yang pantas buka tuju segel yang talém di kitab itu. Barang, Anak Domba ini so perna dapa bunu, kong Dia pe dara so tatumpa untuk hapus orang-orang pe dosa dari tiap fam, suku, bahasa deng bangsa supaya dorang jadi Dia pe umat.

Wahyu 6:10

Kong jiwa-jiwa itu bicara kuat-kuat bagini, “Tuhan, Tuhan itu yang suci deng yang butul! Barapa lama lagi baru Tuhan adili pa orang-orang di dunia deng mo hukum pa orang-orang yang bunu pa torang?”