2 Petrus 1:7 - Perjanjian Baru Bahasa Melayu Maluku Utara

⁷ kong kalu ngoni so hidup iko Dia pe mau, ngoni me musti sayang pa ngoni pe sudara-sudara yang percaya, deng ngoni me musti sayang pa samua orang.

2 Petrus 1:7 ပူးပေါင်းရင်းမြစ်များ

Roma 12:10

Ngoni so sama deng basudara, jadi ngoni musti baku-baku sayang. Kong tiap orang musti lebe kamuka hormati turus-turus pa orang laeng lebe dari yang orang laeng biking.

Galatia 6:10

Jadi selama torang masi hidup, mari suda torang biking barang yang bae pa samua orang, lebe-lebe lagi pa torang pe sudara-sudara yang sama-sama percaya.

Kolose 3:14

Kong yang paling penting dari samua itu, ngoni musti baku-baku sayang satu deng yang laeng. Barang, deng ngoni baku-baku sayang bagitu, ngoni taika jadi satu, deng sempurna.

1 Tesalonika 3:12

Torang minta la Tuhan Allah biking ngoni lebe tamba baku sayang, deng ngoni pe sayang pa orang laeng lebe tatamba, sama deng torang pe sayang pa ngoni.

1 Tesalonika 5:15

Perhatikan bae-bae, jang sampe ada orang yang balas orang pe jahat deng yang jahat. Tapi ngoni musti salalu berusaha biking yang bae di antara ngoni sandiri deng samua orang.

Ibrani 13:1

Ngoni musti tetap baku-baku sayang turus e, karna ngoni orang yang sama-sama percaya pa Tuhan!

1 Petrus 1:22

Jadi karna ngoni so iko ajaran yang butul tentang Yesus Kristus, ngoni pe hati so jadi bersi. Deng bagitu, ngoni bisa baku sayang deng hati yang tulus di antara ngoni sudara-sudara yang sama-sama percaya. Karna itu, ngoni musti sunggu-sunggu baku sayang satu deng yang laeng deng hati yang tulus,

1 Petrus 2:17

Ngoni musti hormati pa samua orang deng sayang pa ngoni pe sudara-sudara yang sama-sama percaya. Ngoni me musti tako pa Tuhan Allah, deng hormati pa raja basar Roma.

1 Petrus 3:8

Jadi skarang, kita minta pa ngoni la ngoni samua hidup satu hati. Kalu ada dari ngoni yang rasa susa ka sanang, ngoni yang laeng me musti rasa sama deng yang dia rasa. Ngoni me musti sayang pa ngoni pe sudara-sudara yang percaya, kase tunju ngoni pe rasa kasiang pa samua orang, deng jang basombong.

1 Yohanes 3:14

Kalu torang sayang torang pe sudara yang percaya, torang tau torang so tara hidup tapisa dari Tuhan Allah lagi, torang so hidup deng Tuhan Allah slama-lamanya. Tapi sapa yang tara sayang dia pe sudara yang percaya, dia pe hidup tetap tapisa deng Tuhan Allah slama-lamanya, macam deng orang yang so mati.

1 Yohanes 3:16

Torang tau sayang yang butul-butul itu sama deng Yesus Kristus pe sayang. Dia so kase Dia pe diri sampe mati untuk torang supaya torang dapa slamat. Jadi torang me musti siap kase tong pe diri sampe mati untuk torang pe sudara-sudara yang percaya.

1 Yohanes 4:21

Ini parenta yang torang tarima dari Tuhan Allah: sapa saja yang sayang pa Tuhan Allah, dia me musti sayang pa dia pe sudara yang percaya.