2 Korintus 7:3 - Perjanjian Baru Bahasa Melayu Maluku Utara

³ Kita bilang bagitu, kita tara maksut mo kase sala pa ngoni, karna tadi kita so bilang to, torang sayang pa ngoni. Ngoni ada di torang pe hati selama torang hidup atau mati.

2 Korintus 7:3 ပူးပေါင်းရင်းမြစ်များ

2 Korintus 11:11

Tapi biar kita tara minta apa-apa pa ngoni, jang kira kata, kita tara sayang pa ngoni. Tuhan Allah tau, kita sayang skali pa ngoni!

2 Korintus 12:15

Kita suka pake samua yang ada pa kita untuk bantu pa ngoni, mala kita pe hidup sandiri me kita kase korban supaya bisa bantu pa ngoni. Kita sayang skali pa ngoni macam deng bagitu, kong ngoni pe sayang pa kita cuma stenga-stenga tu!

2 Korintus 13:10

Jadi kita tulis surat ini untuk ngoni waktu kita masi jao dari ngoni la ngoni bertobat, supaya nanti waktu kita so sama-sama deng ngoni kita tara usa ambe tindakan karas untuk togor pa ngoni karna memang Tuhan so kase kuasa pa kita deng maksut untuk kase kuat ngoni pe percaya, bukang mo kase ancor ngoni pe percaya.

2 Korintus 3:2

Ngoni itu sama deng surat yang tatulis pa tong pe hati, barang samua orang bisa lia ngoni pe hidup yang bagus deng dong bole tau, itu torang pe hasil karja. Waktu orang-orang lia itu, itu sama deng dong bisa baca tong dua pe surat pujian.

2 Korintus 7:12

Jadi waktu kita tulis surat itu, kita pe tujuan bukang cuma untuk orang yang sala, deng bukang lagi cuma untuk orang yang menderita karna orang laeng pe sala itu. Tapi kita pe tujuan supaya ngoni sandiri bole tau ngoni memang butul-butul sayang pa torang, kong Tuhan Allah tau itu butul.

Filipi 1:7

Memang tara sala kalu kita pe perasaan sanang macam bagitu pa ngoni samua, karna ngoni samua salalu ada di kita pe hati. Barang, ngoni samua so ambe bagian untuk biking tugas yang Tuhan kase pa kita waktu kita ada di dalam penjara ini, deng waktu kita di luar penjara. Ngoni bantu pa kita, waktu kita bela Kabar Bae tentang Yesus Kristus dari orang-orang yang tantang Kabar Bae itu, deng waktu kita berusaha kase yakin pa orang-orang, Kabar Bae tentang Yesus Kristus itu butul. Tugas itu Tuhan kase pa kita karna Dia pe bae.

1 Tesalonika 2:8

Torang sayang skali pa ngoni. Jadi torang bukang cuma sanang kase tau pa ngoni Kabar Bae dari Tuhan Allah, tapi torang lagi serakan tong pe hidup untuk ngoni, karna torang memang sayang skali pa ngoni.