2 Korintus 10:2 - Perjanjian Baru Bahasa Melayu Maluku Utara

² kita minta pa ngoni, jang biking sampe kita musti togor karas pa ngoni waktu torang sama-sama nanti, barang ada dari ngoni laeng yang tara dengar-dengaran pa torang. Dorang bilang kata, torang ini cuma iko manusia pe mau saja. Pa dorang-dorang itu suda yang kita mo togor karas.

2 Korintus 10:2 ပူးပေါင်းရင်းမြစ်များ

Roma 8:1

Jadi, skarang Tuhan Allah so tara hukum lagi pa torang karna torang so satu hati deng Kristus Yesus.

Roma 8:4

Tuhan Allah pe maksut biking bagitu, supaya torang bole jadi orang yang tara sala pa Tuhan Allah pe muka iko deng apa yang tatulis di lima kitab Musa. Kong torang lagi bole iko yang butul karna torang so iko Roh Kudus pe mau, bukang lagi iko torang manusia pe mau yang suka biking dosa.

Roma 8:5

Orang-orang yang hidup cuma iko manusia pe mau yang suka biking dosa, dorang itu cuma pikir barang yang tara bae yang biking sanang dong pe diri sandiri, tapi kalu orang-orang yang hidup iko Roh Kudus pe mau, dorang itu cuma pikir barang yang bae yang biking Roh Kudus itu sanang.

2 Korintus 1:17

Tapi biar kita bolong bisa biking kita pe rencana itu, jang ngoni anggap kita ini ragu-ragu. Kita ini tara biking rencana iko kita pe mau sandiri sama deng orang yang jaga iko dunia pe mau, di mulu bilang “iyo”, di hati bilang “tarada”.

2 Korintus 11:21

Jadi apa kita musti malu karna kita tara karas pa ngoni bagitu? Tarada! Tapi kalu utusan-utusan itu barani bapuji diri, kita me barani puji kita pe diri sama deng dorang! (Kita bicara ini sama deng orang bodo pe bicara.)

2 Korintus 13:10

Jadi kita tulis surat ini untuk ngoni waktu kita masi jao dari ngoni la ngoni bertobat, supaya nanti waktu kita so sama-sama deng ngoni kita tara usa ambe tindakan karas untuk togor pa ngoni karna memang Tuhan so kase kuasa pa kita deng maksut untuk kase kuat ngoni pe percaya, bukang mo kase ancor ngoni pe percaya.

2 Korintus 13:2

Waktu kita datang yang kedua kali pa ngoni, kita so perna togor pa orang-orang di situ yang biking dosa, supaya dorang berenti biking dosa. Skarang bagitu kita jao dari ngoni, kita kase inga lagi pa dorang, deng pa samua orang yang biking dosa. Ini yang kita kase inga: nanti waktu kita datang ulang, kita mo togor karas kong mo kase hukuman pa samua orang yang masi biking dosa.