1 Yohanes 5:4 - Perjanjian Baru Bahasa Melayu Maluku Utara

⁴ Barang, tiap orang yang so jadi Tuhan Allah pe ana-ana mampo kase kala kuasa jahat di dunia ini. Kong torang bole kase kala kuasa yang jahat itu, karna torang pe percaya.

1 Yohanes 5:4 ပူးပေါင်းရင်းမြစ်များ

Yohanes 1:13

Dorang jadi Tuhan Allah pe ana-ana bukang karna dorang lahir dari dorang pe papa deng mama, bukang lagi karna hubungan laki bini, kong bukang lagi karna manusia pe rencana yang ingin dapa ana, tapi dorang jadi Tuhan Allah pe ana-ana karna Tuhan Allah sandiri yang biking dorang jadi Dia pe ana-ana.

Yohanes 16:33

Kita kase tau samua yang mo jadi itu, supaya ngoni bole hidup deng hati tenang, karna ngoni so percaya pa Kita. Di dunia ini ngoni mo rasa menderita karna mo dapa siksa, tapi kase kuat suda ngoni pe hati! Barang, Kita so kase kala samua kuasa di dunia ini.”

Yohanes 3:3

Yesus bilang pa dia, “Inga bae-bae yang Kita mo bilang ini. Cuma orang yang lahir ulang, yang bisa jadi Tuhan Allah pe umat yang Dia Berkuasa sebagai Raja pa orang itu pe hidup.”

1 Korintus 15:57

Tapi torang bilang tarimakasi banya pa Tuhan Allah karna Dia so kase bebas pa torang dari dosa-dosa, itu sama deng Dia so kase menang pa torang. Dia kase menang pa torang karna apa yang Yesus Kristus, torang pe Tuhan so biking di kayu salib.

1 Yohanes 2:29

Ngoni tau Dia itu butul, jadi ngoni me musti tau, tiap orang yang jaga biking barang yang butul, orang itu so jadi Tuhan Allah pe ana.

1 Yohanes 3:9

Tiap orang yang Tuhan Allah so biking jadi Tuhan Allah pe ana, dia itu pe hidup so beruba jadi baru, deng dia me so tara biking dosa lagi, barang Tuhan Allah hidup pa orang itu pe diri, sama deng Tuhan Allah ada tanam bibit pa orang itu pe hati kong batumbu. Tuhan Allah so biking dia jadi Dia pe ana, jadi dia so tara biking dosa lagi.

1 Yohanes 4:4

Tapi, ngoni yang kita so sayang sama deng kita pe ana-ana, ngoni ini dari Tuhan Allah. Jadi ngoni so kase kala pa nabi-nabi palsu, karna Roh yang ada pa ngoni Dia pe kuasa lebe basar dari roh yang ada di dunia ini.

1 Yohanes 5:1

Tiap orang yang percaya Yesus itu Kristus, Raja yang Tuhan Allah pili, orang itu Tuhan Allah pe ana. Deng sapa saja yang sayang pa Tuhan Allah, orang itu pasti sayang pa Tuhan Allah pe ana-ana.

1 Yohanes 5:18

Torang tau, samua orang yang so jadi Tuhan Allah pe ana-ana, dorang so tara biking dosa lagi. Barang, Anak Allah jaga pa dorang, sampe Iblis, setang-setang pe raja tara mampo mo kase kala pa dorang.

1 Yohanes 5:5

Cuma orang-orang yang percaya Yesus itu Anak Allah saja, yang bisa kase kala yang jahat di dunia ini. Tarada yang laeng!

Wahyu 12:11

Torang pe sudara-sudara yang percaya so menang, dorang so kase kala pa Iblis. Dorang so kase kala pa dia, karna Anak Domba pe dara so tatumpa untuk tebus dorang pe dosa-dosa. Dorang me kase kala pa dia, karna dong tara berenti mangaku tentang Anak Domba yang jadi dong pe Tuhan. Biar pa dorang pe hidup dorang dapa siksa atau dapa bunu, dong tara mundur, dong tetap kase tau itu turus.

Wahyu 15:2

Turus, kita lia ada satu barang yang luas sama deng laut, dia pe jerni sama deng kaca yang kanal deng cahaya api. Kong ada banya orang yang badiri di dia pe pinggir. Dorang yang badiri itu orang-orang yang so kase kala pa binatang jahat, karna dorang tara semba dia pe patong deng tara tarima nomor dari binatang jahat itu. Dorang samua itu ada pegang Tuhan Allah pe alat musik kecapi.

Wahyu 2:11

Jadi dengar bae-bae apa yang Tuhan Allah pe Roh kase tau pa Dia pe jemaat-jemaat, bagini, ‘Sapa yang menang dari pengaru jahat, dia itu pasti tara tarima hukuman yang dia pe nama kematian yang kedua.’ ”

Wahyu 2:17

Jadi dengar bae-bae apa yang Tuhan Allah pe Roh kase tau pa Dia pe jemaat-jemaat, bagini, ‘Sapa yang menang dari pengaru jahat, nanti Kita kase pa dia makanang dari sorga yang orang sebut manna yang tasambunyi. Nanti Kita mo kase lagi pa dia batu puti satu yang ada tatulis dia pe nama baru. Nama baru itu, cuma orang yang tarima batu itu saja yang tau, orang laeng tara tau.’ ”

Wahyu 2:26

Sapa yang menang dari pengaru jahat, deng tetap biking apa yang Kita suru sampe dunia kiamat, Kita mo kase pa dia kuasa untuk berkuasa pa suku-suku bangsa.

Wahyu 2:7

Jadi dengar bae-bae apa yang Tuhan Allah pe Roh kase tau pa Dia pe jemaat-jemaat, bagini, ‘Sapa yang menang dari pengaru jahat, Kita mo kase pa dorang hak untuk makang bua dari pohong kehidupan yang ada di Tuhan Allah pe taman Firdaus.’ ”

Wahyu 3:12

Sapa yang menang dari pengaru jahat, Kita akan biking dong tinggal di Tuhan Allah pe Ruma di sorga slama-lamanya. Sama deng satu tiang yang kuat skali di ruma yang biking ruma tetap kuat, tarada satu yang bisa kase kaluar pa dorang lagi. Pa dorang pe badan, Kita akan tulis Tuhan Allah pe nama. Kong Kita mo tulis pa dong lagi Tuhan Allah pe kota pe nama, kota Yerusalem Baru. Kota itu Tuhan Allah akan kase turung dari sorga. Turus Kita mo tulis lagi pa dorang itu Kita pe nama baru.

Wahyu 3:21

Sapa yang menang dari pengaru jahat, Kita mo kase dudu dia pa Kita pe pinggir sama-sama deng Kita di kursi raja. Barang, orang itu so menang sama deng Kita yang so menang dari setang-setang pe pengaru, kong Kita dudu baku pinggir sama-sama deng Kita pe Bapa di Dia pe kursi raja.

Wahyu 3:5

Orang yang menang dari pengaru jahat, dorang akan pake baju puti itu. Kita tara mo hapus dorang itu pe nama dari buku kehidupan. Buku itu yang ada tulis nama-nama orang yang hidup deng Kita slama-lamanya. Nanti waktu Kita badiri di Kita pe Bapa deng Dia pe malaekat-malaekat pe muka, Kita mo bilang dorang ini memang iko pa Kita.