1 Yohanes 4:1 - Perjanjian Baru Bahasa Melayu Maluku Utara

¹ Sudara-sudara yang kita sayang, jang ngoni percaya pa samua orang yang bilang, pa dorang ada Tuhan Allah pe Roh. Lebe bae ngoni lia dulu bae-bae kalu dorang butul dari Tuhan ka bukang, karna banya orang yang datang skarang bilang kata, dong kase turus Tuhan Allah pe pasáng, padahal bafoya. Dorang cuma nabi palsu.

1 Yohanes 4:1 ပူးပေါင်းရင်းမြစ်များ

Markus 13:21

Waktu itu, kalu ada orang bilang pa ngoni, ‘Coba lia! Mesias ada di sini!’ Atau dorang bilang, ‘Coba lia! Mesias ada di sana!’ Jang ngoni percaya apa yang dorang bilang itu.

Lukas 12:57

Yesus bilang lagi, “Kalu ngoni ada masala, ngoni sandiri yang musti ambe keputusan yang butul.

Lukas 21:8

Yesus bilang pa dorang, “Ngoni ati-ati e, jang sampe ngoni dapa tipu. Barang, banya orang akan datang pake Kita pe nama, deng dorang bilang bagini, ‘Kita ini Dia suda, Raja yang Tuhan Allah janji mo kase slamat pa manusia!’ Dorang me akan bilang, hari kiamat so dekat. Tapi jang ngoni iko pa dorang itu.

Kisah Para Rasul 17:11

Orang-orang Yahudi di kota Berea tara sama deng orang-orang Yahudi di kota Tesalonika. Dorang lebe siap tarima ajaran dari Paulus. Karna itu, dorang suka skali badengar deng tarima Kabar Bae tentang Yesus. Tiap hari dorang cari tau dari Kitab Suci, yang Paulus kase ajar itu butul ka tarada.

Kisah Para Rasul 20:29

Kita tau kalu kita so kase tinggal pa ngoni nanti, ada orang-orang yang dong pe sifat sama deng anjing utang yang jahat mo maso pa ngoni pe tenga-tenga, kong dorang berusaha mo kase ancor jemaat yang ngoni jaga itu.

1 Korintus 12:10

Pa yang laeng, Roh Kudus kase karunia untuk biking mujizat, deng pa yang laeng, Roh Kudus kase karunia untuk kase turus pasáng yang Tuhan Allah kase pa dia, kong pa yang laeng, Roh Kudus kase karunia untuk tau mana pasáng dari Tuhan Allah deng mana yang bukang. Kong pa yang laeng, Roh Kudus kase karunia untuk bicara pake bahasa roh, deng pa yang laeng lagi, Roh Kudus kase karunia untuk bisa kase arti bahasa roh itu.

1 Korintus 14:29

Bagitu lagi deng orang yang ada karunia untuk kase turus pasáng dari Tuhan Allah, lebe bae cuma dua atau tiga orang saja yang kase turus pasáng itu pa jemaat. Kong yang laeng, pikir bae-bae apa yang dorang bilang itu.

1 Tesalonika 5:20

Kalu Tuhan kase tau Dia pe pasáng pa orang kong orang itu kase tau pasáng itu pa ngoni, jang ngoni pandang enteng pasáng itu.

1 Tesalonika 5:21

Cuma, ngoni musti cari tau bae-bae pasáng itu la tau kalu itu butul-butul dari Tuhan ka tarada. Kalu memang itu butul dari Tuhan, ngoni musti iko itu sunggu-sunggu.

2 Tesalonika 2:2

supaya jang ngoni capat bingung atau hawater kalu kage-kage ngoni dengar kata, Tuhan Yesus so datang ulang. Biar ada yang bilang kata, Roh Kudus yang kase tau, atau ada kabar bilang bagitu, atau dorang bilang kata, torang yang bilang lewat surat, jang dulu percaya, karna kabar itu tara butul.

1 Timotius 4:1

Roh Kudus so bilang deng jelas, nanti dekat-dekat hari kiamat, ada orang percaya yang akan kase tinggal lagi dorang pe percaya pa Tuhan Allah, kong taiko pa setang-setang yang jaga kase sesat pa manusia. Dorang itu cuma mo iko setang-setang pe ajaran.

2 Timotius 3:13

Tapi orang yang jahat deng yang tukang tipu, dorang itu lebe hari lebe tamba jahat. Dorang tipu pa orang-orang kong orang laeng me tipu pa dorang.

2 Petrus 2:1

Dulu, ada orang-orang yang muncul di orang Israel pe tenga-tenga, yang bilang kata, dorang itu Tuhan Allah pe nabi yang kase turus Tuhan Allah pe pasáng, padahal dong foya. Kong sama deng itu, skarang ini akan ada lagi di ngoni pe tenga-tenga guru-guru agama palsu. Guru-guru palsu itu mo kase ajar ajaran yang orang kira butul, padahal tarada, kong ajaran itu biking rusak orang pe hidup. Kong bukang cuma itu, orang yang iko ajaran itu me mo manyangkal Tuhan Yesus yang so tebus pa dorang. Jadi, apa yang guru-guru palsu biking itu cuma mo biking dong sandiri capat mati kong tapisa deng Tuhan Allah slama-lamanya.

1 Yohanes 2:18

Ngoni yang kita sayang sama deng kita pe ana-ana, hari kiamat so dekat, kong ngoni so dengar to, satu orang yang musu pa Yesus Kristus akan datang. Mala skarang dorang itu so banya yang datang. Itu dia pe tanda torang bole tau, hari kiamat so dekat.

1 Yohanes 2:7

Sudara-sudara yang kita sayang, parenta yang kita tulis ini, bukang parenta yang baru tapi parenta yang so ada pa ngoni dari dulu. Parenta itu bagini: ngoni musti baku sayang satu deng yang laeng. Itu firman yang ngoni so perna dengar.

2 Yohanes 1:7

Kita tulis surat ini pa ngoni karna ada banya orang skarang pigi bakuliling di seluru dunia untuk kase sesat orang. Dorang itu tara percaya, Yesus Kristus itu datang di dunia sebagai manusia. Dorang itu pangbafoya deng dong musu pa Yesus Kristus.

3 Yohanes 1:11

Gayus, kita pe sudara yang kita sayang, jang iko barang yang jahat, tapi iko barang yang bae. Sapa yang biking barang bae, dia itu Tuhan Allah pe umat. Tapi sapa yang biking barang yang jahat, dia itu bolong kanal pa Tuhan Allah.

Wahyu 2:2

Kita tau samua yang ngoni jaga biking: ngoni so karja karas biking Tuhan Allah pe mau, deng ngoni me tahang mangada siksa. Kita me tau ngoni tara tapengaru deng orang jahat yang tinggal di sekitar ngoni. Ngoni me so cari tau bae-bae pa orang-orang yang bilang kata, dong itu Kita pe utusan yang orang sebut rasul. Padahal dorang itu bukang rasul, kong ngoni dapa tau dong itu memang pangbafoya.