1 Timotius 6:6 - Perjanjian Baru Bahasa Melayu Maluku Utara

⁶ Sebenarnya kalu orang butul-butul hidup iko Tuhan Allah pe mau, deng apa yang dia so dapa dari Tuhan dia rasa puas, dia so untung skali.

1 Timotius 6:6 ပူးပေါင်းရင်းမြစ်များ

Lukas 12:15

Kong Yesus bicara pa orang banya yang ada di situ, “Ati-ati deng jaga diri bae-bae, jang sampe ngoni tara puas deng apa yang ngoni punya. Karna manusia pe hidup itu bukang cuma dari harta saja biar dia kaya skali lagi.”

Lukas 3:14

Di situ, ada lagi tentara-tentara yang datang. Dorang tanya pa Yohanes, “Kalu torang, apa yang torang musti biking?” Kong Yohanes jawab pa dorang, “Jang ancam orang kong ambe dorang pe doi, deng jang tudu orang bilang dong sala la dong kase doi pa ngoni. Rasa puas suda deng ngoni pe gaji yang ngoni tarima.”

Roma 8:28

Torang tau ini: sapa saja yang sayang pa Tuhan Allah deng so dapa pangge la iko Dia pe mau, apa saja yang jadi pa dorang, mo bae ka, tara bae ka, torang tau, Tuhan Allah mo biking samua itu untuk dorang pe bae.

2 Korintus 4:17

Memang, sengsara yang tong dapa di dunia ini barát, tapi kalu tong pikir apa yang Tuhan Allah so sadia pa torang di sorga, sengsara itu bole torang bilang tara barát kong cuma sementara. Jadi kalu torang tetap batahang deng sengsara itu, torang so siap untuk tarima samua yang hebat itu di sorga.

Filipi 1:21

Barang, untuk kita, kita hidup cuma untuk Yesus Kristus supaya Dia dapa puji, kong kalu kita mati, itu lagi untuk kita pe bae, karna kita bole mo sama-sama deng Yesus Kristus di sorga.

1 Timotius 4:8

Ambe conto, kalu torang lati torang pe badan supaya kuat, itu bagus, tapi dia pe guna cuma sadiki. Tapi kalu torang lati torang pe diri untuk biking Tuhan Allah pe mau, dia pe guna banya skali. Kalu lati torang pe diri bagitu, pasti ada berkat untuk torang pe hidup skarang di dunia ini deng nanti waktu torang hidup ulang.

1 Timotius 6:8

Jadi, kalu torang so ada makanang deng baju, torang musti puas deng apa yang so ada pa torang.

Ibrani 13:5

Jang ngoni gila doi, tapi lebe bae ngoni puas suda deng apa yang ada pa ngoni. Barang, Tuhan Allah so perna bilang bagini, “Kita tara akan perna kase biar pa ngana, deng Kita tara akan perna kase tinggal pa ngana sandiri.”