1 Timotius 6:16 - Perjanjian Baru Bahasa Melayu Maluku Utara

¹⁶ Cuma Tuhan Allah saja yang tara perna mati. Dia hidup di dalam tarang. Tarang itu tarang skali, sampe orang me tara bole badekat pa Dia. Deng tarada orang yang perna lia pa Dia, deng memang butul tara orang bisa lia pa Dia. Samua hormat untuk Dia, deng samua kuasa ada pa Dia sampe slama-lamanya. Amin!

1 Timotius 6:16 ပူးပေါင်းရင်းမြစ်များ

Yohanes 1:18

Tarada satu orang yang perna lia pa Tuhan Allah, tapi Anak Allah yang cuma satu itu yang jadi satu deng Tuhan Allah, Dia itu suda yang kase tunju deng jelas pa torang sapa itu Tuhan Allah.

Yohanes 14:9

Yesus bilang pa dia, “Filipus, so lama skali Kita sama-sama deng ngoni, masa ngana tara kanal pa Kita? Sapa yang so lia pa Kita, dia itu so lia pa Kita pe Bapa. Jadi, bikiapa lagi ngana minta Kita kase tunju Kita pe Bapa pa ngoni?

Yohanes 6:46

Tapi itu bukang pe arti, ada orang yang so lia pa Bapa. Cuma Kita saja yang Dia so utus datang di dunia ini yang so lia pa Bapa.

Yohanes 8:58

Yesus jawab, “Dengar bae-bae yang Kita bilang pa ngoni ini. Waktu Abraham bolong lahir, Kita ini so kamuka ada.”

Efesus 3:21

Jadi, torang yang so jadi Dia pe jemaat, torang yang so satu hati deng Kristus Yesus, mari suda torang puji deng hormat pa Dia sampe slama-lamanya. Amin.

Filipi 4:20

Mari suda torang puji deng hormat pa Tuhan Allah, torang pe Bapa sampe slama-lamanya! Amin.

Kolose 1:15

Sudara-sudara, tara ada orang yang bisa lia pa Tuhan Allah, tapi waktu torang lia pa Yesus Kristus, itu sama saja deng torang so lia pa Tuhan Allah kong so tau Dia pe sifat deng kuasa. Waktu langit deng bumi bolong jadi, Yesus Kristus so lebe kamuka ada. Kong Yesus Kristus itu yang paling berkuasa dari samua yang Tuhan Allah so cipta.

1 Timotius 1:17

Mari torang hormati pa Tuhan Allah. Dia itu Raja sagala jaman. Tarada yang bisa lia Dia, Dia ada slama-lamanya, deng Dia cuma satu saja. Puji deng hormat pa Dia sampe slama-lamanya. Amin.

Ibrani 13:8

Yesus Kristus tetap sama, dari dulu, skarang deng sampe slama-lamanya.

Yakobus 1:17

Barang, samua yang bae deng sempurna yang torang dapa, itu datang dari Tuhan Allah yang di sorga. Dia itu torang pe Bapa yang biking matahari, bulan, deng bintang untuk kase tarang langit. Matahari, bulan, deng bintang itu basinar iko dia pe waktu untuk kase tarang dunia ini. Tapi Tuhan Allah tara bagitu, Dia tara beruba, Dia salalu bae.

1 Yohanes 1:5

Ini berita yang torang so dengar dari Yesus, kong torang kase tau pa ngoni bagini: Tuhan Allah itu tarang, jadi pa Dia sama skali tarada galap.

1 Yohanes 1:7

Tapi kalu torang hidup di tarang, sama deng Tuhan Allah ada di tarang, pasti torang so hidup satu hati satu deng yang laeng. Dia kase bersi pa torang dari torang pe dosa samua, karna Yesus, Dia pe Anak so mati di kayu salib.

1 Yohanes 4:12

Tarada satu orang yang perna lia langsung pa Tuhan Allah. Tapi kalu torang baku-baku sayang, Tuhan Allah tetap ada di torang pe hati, kong Dia pe sayang biking torang butul-butul sayang iko Dia pe mau.

Yudas 1:25

Jadi puji deng hormat suda pa Tuhan Allah, Dia itu cuma satu. Dia yang kase slamat pa torang dari torang pe dosa karna Yesus Kristus torang pe Tuhan. Tuhan Allah pe kuasa paling basar, tara ada yang bisa lawan, deng Dia yang berkuasa untuk ator samua-samua yang ada di dunia ini. Dia tetap bagitu, mulai dari dunia ini bolong ada, skarang deng sampe slama-lamanya. Amin.

Wahyu 1:6

Dia Raja, kong Dia pili pa torang jadi Dia pe rakyat. Dia me angka pa torang sama deng imam-imam yang pe tugas kusus untuk semba deng puji pa Tuhan Allah, Dia pe Bapa. Cuma pa Dia saja samua yang ada di dunia ini puji deng hormat, deng Dia yang berkuasa sampe slama-lamanya. Amin.

Wahyu 1:8

Tuhan Allah bilang bagini, “Kita ini, Alfa deng Omega, yang pe arti, mulai dari pertama dunia ini bolong ada, Kita so ada, kong Kita so ada skarang, deng sampe dunia abis, Kita tetap ada. Kita Yang Paling Berkuasa.”

Wahyu 21:3

Kong kita dengar suara yang kuat skali dari sekitar Tuhan Allah pe kursi raja itu bilang bagini, “Perhatikan bae-bae! Tuhan Allah pe tampa tinggal so ada di tenga-tenga manusia, deng Dia akan tinggal sama-sama deng manusia. Dorang akan jadi Dia pe umat, deng Dia sandiri akan ada sama-sama deng dorang jadi dorang pe Tuhan Allah.

Wahyu 22:5

Di kota itu, tarada malam. Jadi Tuhan Allah pe umat, dong so tara perlu lagi cahaya lampu atau sinar matahari, karna Tuhan Allah pe diri sandiri yang jadi sinar untuk kase tarang pa dorang. Kong dorang mo berkuasa sebagai raja sampe slama-lamanya.

Wahyu 4:11

“Ya Tuhan Allah torang pe Tuhan. Cuma Tuhan saja yang pantas mo dapa puji deng hormat, deng Tuhan yang punya kuasa. Barang, Tuhan so cipta samua-samua yang ada, kong samua itu ada karna Tuhan suka itu ada, Tuhan yang biking samua itu.”

Wahyu 7:12

Dorang bilang bagini, “Amin! Mari torang puji pa Tuhan Allah. Dia pe kuasa yang luar biasa deng Dia yang paling tau samua. Torang me bilang tarimakasi, deng hormati pa Dia. Dia itu torang pe Tuhan Allah yang berkuasa deng kuat sampe slama-lamanya! Amin.”