1 Timotius 1:16 - Perjanjian Baru Bahasa Melayu Maluku Utara

¹⁶ Tapi biar bagitu, Kristus Yesus kase tunju Dia pe rasa kasiang pa kita deng Dia tara hukum pa kita. Apalagi, karna kita ini orang yang paling berdosa, Yesus Kristus kase tunju Dia pe sabar pa kita. Deng bagitu kita jadi conto untuk orang laeng yang berdosa, supaya dorang me bole percaya pa Yesus Kristus la hidup deng Tuhan Allah slama-lamanya.

1 Timotius 1:16 ပူးပေါင်းရင်းမြစ်များ

Lukas 15:10

Kita bilang pa ngoni, di sorga me bagitu, Tuhan Allah pe malaekat-malaekat sanang skali kalu ada satu orang yang berdosa kong dia bertobat.”

Lukas 23:43

Kong Yesus bilang pa dia, “Kita bilang pa ngana, hari ini suda ngana akan ada sama-sama deng Kita di Firdaus.”

Lukas 7:47

Karna itu, dengar bae-bae e, parampuang ini pe dosa yang banya itu so dapa ampun. Kong karna dia so dapa ampun, dia kase tunju dia pe sayang yang basar pa Kita. Tapi kalu orang yang pe dosa cuma sadiki, cuma sadiki lagi dia kase tunju dia pe sayang, karna cuma sadiki dia pe dosa yang dapa ampun.”

Yohanes 20:31

Tapi samua yang so tatulis di kitab ini, itu ada tulis supaya ngoni percaya Yesus itu Mesias, Raja yang Tuhan Allah janji mo kase slamat pa manusia, deng Dia itu Anak Allah. Kalu ngoni so percaya pa Dia, ngoni mo dapa hidup deng Dia slama-lamanya.

Yohanes 3:36

Jadi, sapa yang percaya pa Dia pe Anak itu, dia mo dapa hidup deng Tuhan Allah slama-lamanya, kong sapa yang tara iko Anak itu pe mau, dia tara mo dapa hidup deng Tuhan Allah slama-lamanya, tapi Tuhan Allah pe hukuman ada pa dia slama-lamanya.

Yohanes 5:24

Inga bae-bae yang Kita bilang ini. Sapa saja yang dengar apa yang Kita bilang deng percaya pa Tuhan Allah yang utus pa Kita, dia itu akan dapa hidup deng Tuhan Allah slama-lamanya. Dia so tara dapa hukuman tapisa deng Tuhan Allah tapi dia so talapas dari hukuman itu, kong so dapa hidup deng Tuhan Allah slama-lamanya.

Yohanes 6:37

Samua orang yang Kita pe Bapa kase percaya pa Kita, dorang itu mo datang pa Kita. Kong sapa saja yang datang pa Kita, Kita tara akan tolak pa dia.

Yohanes 6:40

Barang, ini yang Kita pe Bapa mau: Dia mau supaya tiap orang yang lia pa Dia pe Anak kong percaya pa Anak itu, dorang itu mo dapa hidup deng Tuhan Allah slama-lamanya, deng nanti di hari kiamat, Kita mo kase hidup ulang pa dorang.”

Yohanes 6:54

Sapa saja yang makang Kita pe badan deng minum Kita pe dara, dia mo dapa hidup deng Tuhan Allah slama-lamanya, kong Kita mo kase hidup ulang pa dia di hari kiamat.

Kisah Para Rasul 13:39

Jadi sapa yang percaya pa Yesus, orang itu so jadi tara sala pa Tuhan Allah pe muka. Tapi kalu torang cuma iko aturan-aturan di lima kitab Musa, torang tara bisa jadi orang yang butul pa Tuhan Allah pe muka.

Roma 15:4

Samua yang tatulis dari dulu di Kitab Suci, ada tulis untuk kase ajar pa torang, supaya torang bole tetap percaya biar dapa siksa, deng supaya kase smangat pa torang untuk percaya deng yakin pa Tuhan Allah.

Roma 6:23

Karna orang yang jaga biking dosa, dia pe akibat dia mo mati kong tapisa deng Tuhan Allah slama-lamanya. Tapi Tuhan Allah kase deng cuma-cuma hidup deng Dia slama-lamanya karna torang so satu hati deng Kristus Yesus, torang pe Tuhan.

1 Korintus 7:25

Skarang, tentang orang-orang yang bolong kawing, kita tara dapa parenta dari Tuhan, tapi kita mo kase nasehat pa dorang. Yang kita mo bilang ini, ngoni bole percaya karna Tuhan so pili pa kita jadi Dia pe utusan, itu Dia pe rasa kasiang pa kita.

2 Korintus 4:1

Karna Tuhan Allah pe sayang pa torang, Dia pili pa torang untuk kase tau Kabar Bae tentang Yesus Kristus pa orang-orang. Kong karna itu, torang tara ilang smangat waktu biking tugas ini.

Efesus 1:12

Jadi torang orang Yahudi yang so kamuka baharap pa Yesus Kristus, torang bole puji deng hormat pa Tuhan Allah yang hebat.

Efesus 1:6

Jadi mari suda, torang puji pa Tuhan Allah karna Dia so kase Dia pe bae yang hebat itu pa torang. Dia kase Dia pe bae itu karna torang so percaya pa Yesus Kristus yang Dia sayang.

Efesus 2:7

Tuhan Allah biking bagitu, supaya mulai dari sini ka sana orang-orang bole dapa tau Tuhan Allah pe bae deng pe sayang yang talebe-lebe, yang Dia kase pa torang karna torang so satu hati deng Kristus Yesus.

2 Tesalonika 1:10

Samua itu akan jadi waktu Tuhan Yesus datang ulang. Dia datang itu, orang-orang yang so jadi Tuhan Allah pe umat akan puji deng hormat pa Dia. Samua orang percaya itu akan herang. Ngoni me nanti sama-sama deng dorang, karna ngoni so percaya samua yang torang kase tau pa ngoni.

1 Timotius 1:13

Dulu kita yang kase tara bae Dia pe nama. Waktu itu, kita siksa deng hina pa orang-orang yang percaya pa Dia. Tapi biar bagitu me, Dia kase tunju Dia pe rasa kasiang pa kita, karna kita bolong percaya pa Dia, deng tara mangarti apa yang kita biking itu sala.

Ibrani 7:25

Kong karna Dia Imam slama-lamanya, Dia ada kuasa kase slamat pa orang-orang yang mau datang pa Tuhan Allah, dari skarang sampe slama-lamanya. Dia kase slamat pa torang, barang Dia hidup slama-lamanya untuk kase berdoa pa torang pa Tuhan Allah.

1 Petrus 3:20

Roh-roh itu, orang-orang mati pe roh yang waktu jaman Nuh dong tara dengar-dengaran pa Tuhan Allah. Waktu itu Nuh ada biking kapal basar. Sementara itu, Tuhan Allah tunggu deng sabar la manusia jaman itu mo ruba dong pe kalakuang yang tara bae, tapi dorang tara mau. Karna itu, waktu banjir basar datang, cuma delapan orang yang maso di kapal itu kong slamat.

2 Petrus 3:15

Inga ajaran ini bae-bae: Tuhan Yesus bolong datang karna Tuhan Allah sabar deng torang. Dia sabar itu karna Dia mau supaya banya orang dapa slamat. Torang pe sudara Paulus yang torang sayang itu so perna tulis tentang ini karna Tuhan Allah so biking dia pande.

2 Petrus 3:9

Tapi ada orang yang anggap Tuhan Allah talalu lama mo biking Dia pe janji tentang Yesus Kristus mo datang ulang, padahal tara bagitu. Yesus Kristus bolong datang itu, karna Tuhan Allah sabar deng ngoni, Dia suka samua orang ada waktu untuk bertobat. Dia tara mau ada orang yang mati tapisa slama-lamanya dari Dia, biar lagi cuma satu orang.