1 Tesalonika 4:4 - Perjanjian Baru Bahasa Melayu Maluku Utara

⁴ Ngoni laki-laki yang so kawing, ngoni musti tau bawa ngoni pe bini bae-bae, ngoni hidup deng hati bersi pa Tuhan Allah pe muka deng baku hormati satu deng yang laeng.

1 Tesalonika 4:4 ပူးပေါင်းရင်းမြစ်များ

Kisah Para Rasul 9:15

Tapi Tuhan bilang pa dia, “Ngana pigi suda! Barang, Kita so pili pa dia itu la mo kase tau Kabar Bae tentang Kita pa suku-suku bangsa yang bukang Yahudi, pa raja-raja, deng pa orang-orang Israel.

Roma 1:24

Karna dorang tara mau semba pa Tuhan Allah, Dia kase biar dorang iko dong pe mau sandiri, turus dorang iko dong pe napsu sampe biking hal-hal kotor deng dorang pe badan yang sebenarnya biking malu dong pe diri sandiri deng orang laeng.

Roma 12:1

Sudara-sudara, Tuhan Allah bagitu kasiang pa torang. Karna itu, kita minta butul-butul pa ngoni: serakan suda ngoni pe diri pa Tuhan Allah untuk iko Dia pe mau, itu sama deng ngoni pe hidup so jadi korban persembahan pa Dia. Ngoni kase ngoni pe hidup jadi Dia punya, deng ngoni hidup untuk biking Dia pe hati sanang. Itu baru bilang ngoni pe ibada itu butul.

Roma 6:19

Kita pake conto suru-suru, supaya ngoni bole capat mangarti yang kita bilang itu. Dulu, dosa so jadi ngoni pe tuang yang suru-suru pa ngoni. Ngoni so iko ngoni pe napsu sampe biking hal-hal kotor deng ngoni pe badan, deng ngoni malawang turus-turus Tuhan Allah pe parenta. Tapi skarang, ngoni musti serakan ngoni pe diri jadi Tuhan Allah pe suru-suru supaya ngoni biking turus yang butul pa Tuhan Allah pe muka. Deng bagitu, Tuhan Allah biking ngoni jadi Dia pe umat yang hidup cuma biking Dia pe mau.

1 Korintus 6:15

Ngoni tau ka tarada, waktu ngoni jadi percaya pa Yesus Kristus, ngoni so jadi satu deng Dia. Karna itu, ngoni tara bole pake ngoni pe badan untuk baseks sabarang. Kalu ngoni biking bagitu, itu sama deng ngoni pake Yesus Kristus pe badan untuk baseks sabarang. Ngoni tara bole bagitu!

1 Korintus 7:2

Tapi supaya tara tagoda untuk baseks sabarang, lebe bae tiap laki-laki kawing deng satu parampuang, deng tiap parampuang kawing deng satu laki-laki.

1 Korintus 7:9

Tapi kalu dorang tara mampo tahang napsu, lebe bae dong kawing suda. Karna, itu yang lebe bagus daripada tara kawing kong diri sengsara gara-gara tara mampo tahang napsu itu.

2 Korintus 4:7

Torang ini cuma manusia yang lema, sama deng pot dari tana liat. Tapi biar bagitu, Tuhan Allah kase percaya Dia pe Kabar Bae tentang Yesus Kristus itu pa torang. Kabar Bae itu hebat skali, bole kase sama deng harta yang berharga. Jadi, deng tong kase tau Kabar Bae itu, itu jadi jelas skali pa orang-orang, kuasa basar yang ada pa torang itu memang dari Tuhan Allah, bukang dari tong pe diri sandiri.

Filipi 4:8

Jadi sudara-sudara, ini kita pe nasehat terahir yang kita mo bilang pa ngoni. Ngoni musti pikir turus-turus samua yang ada guna macam bagini: samua yang butul, samua yang pantas orang hormati, samua yang adil, samua yang tara biking ngoni berdosa, samua yang bae, samua yang bagus yang orang suka mo kase carita, deng samua yang pantas untuk orang puji. Ngoni musti pikir turus samua itu.

Ibrani 13:4

Samua orang musti hargai dong pe perkawinan. Laki bini musti setia, tara bole baku suka deng orang laeng. Barang, Tuhan Allah akan hukum pa orang-orang yang baseks sabarang deng pa orang yang baku suka deng orang pe laki atau orang pe bini.

1 Petrus 3:7

Bagitu lagi deng ngoni laki-laki yang so kawing. Ngoni musti bawa bae-bae pa ngoni pe bini, dorang itu tara kuat sama deng ngoni. Ngoni musti hormati pa dorang karna pa dorang me, Tuhan Allah kase Dia pe bae, jadi dorang me akan sama-sama deng ngoni dapa hidup deng Tuhan Allah slama-lamanya. Kalu ngoni dua hidup bagitu, Tuhan akan tetap dengar ngoni pe doa.