1 Petrus 4:3 - Perjanjian Baru Bahasa Melayu Maluku Utara

³ Barang, dulu ngoni pake banya waktu untuk biking hal-hal jahat, sama deng orang-orang yang tara percaya pa Tuhan Allah jaga biking. Ini yang ngoni jaga biking dulu: iko napsu yang tara bae, iko keinginan-keinginan yang cafarune, jaga bamabo, jaga bapesta kong mabo-mabo sampe biking hal-hal sabarang, pesta minuman, deng jaga semba pa puji-puji yang sebenarnya tara bole semba.

1 Petrus 4:3 ပူးပေါင်းရင်းမြစ်များ

Markus 7:22

baku suka deng orang yang bukang dia pe laki atau dia pe bini, golojo orang pe barang, kalakuang jahat, putar bale, napsu tara bae, mangiri, kase tara bae orang pe nama, sombong deng suka malawang.

Kisah Para Rasul 17:30

Dulu, torang manusia bolong tau cara mo percaya pa Tuhan Allah sampe torang biking dosa banya skali. Tapi Tuhan Allah so tara rekeng samua dosa-dosa itu. Kong skarang Tuhan Allah parenta pa samua orang di mana saja, la dorang bertobat kong iko pa Dia.

Roma 13:13

Torang musti hidup deng kalakuang yang bae, kalakuang yang orang-orang jaga biking siang-siang. Jang babapesta kong mabo-mabo sampe biking hal sabarang, jang baseks sabarang, jang iko napsu sama deng binatang, jang suka bakalae deng jang suka mangiri.

1 Korintus 12:2

Ngoni tau, dulu waktu ngoni bolong kanal pa Tuhan Allah, ngoni dapa tipu deng tapengaru sampe ngoni semba pa puji-puji yang tara bisa bicara itu.

1 Korintus 6:11

Deng ada babarapa dari ngoni yang dulu pe kalakuang tara bae bagitu. Tapi skarang so tarada, karna Tuhan Allah so kase bersi pa ngoni dari dosa. Tuhan Allah so biking ngoni jadi Dia pe umat sandiri deng biking ngoni jadi orang yang tara sala pa Dia pe muka. Tuhan Allah biking samua itu karna Tuhan Yesus Kristus so mati untuk kase slamat pa torang, deng karna Roh dari torang pe Tuhan Allah bakarja di ngoni pe hati.

2 Korintus 12:21

Kita hawater, kalu kita datang itu, kita dapa ngoni masi biking dosa sama deng dulu, kong ngoni bolong bertobat. Kalu bagitu, kita jadi malu pa Tuhan Allah pe muka, kong kita mo manangis karna banya dari ngoni yang pe kalakuang masi cafarune, yang baseks sabarang, deng yang masi biking hal-hal yang tara pantas untuk mo biking.

Galatia 5:19

Orang-orang yang cuma iko manusia pe mau yang suka biking dosa itu dapa lia dari dorang pe kalakuang macam bagini: baseks sabarang, biking kalakuang yang cafarune, jaga iko napsu sama deng binatang,

Galatia 5:21

mangiri orang pe barang, pangmabo, babapesta kong mabo-mabo sampe biking hal sabarang, deng biking hal-hal laeng yang tara bagus lagi. Tentang samua hal yang tara bagus itu, hari ini kita kase inga ulang pa ngoni, sama deng yang kita so perna bilang pa ngoni dulu, bagini: orang yang hidup bagitu tara akan dapa bagian waktu Tuhan Allah Berkuasa sebagai Raja pa Dia pe umat.

Efesus 5:18

Jang ngoni bamabo, karna itu yang biking ngoni tara bisa kuasai ngoni pe diri, sampe ngoni biking banya macam barang yang tara bae. Tapi lebe bae ngoni kase ngoni pe diri untuk Roh Kudus kuasai.

1 Tesalonika 4:5

Jang ngoni hidup iko ngoni pe napsu yang tara bae. Cuma orang-orang yang tara kanal pa Tuhan Allah yang jaga biking bagitu.

Titus 3:3

Barang, dulu waktu torang bolong percaya pa Yesus, torang tara mangarti apa-apa. Jadi torang malawang pa Tuhan, torang me tapengaru deng hal-hal yang jahat. Napsu deng keinginan yang tara bae so kuasai di torang pe hati kong torang hidup baku mangiri deng orang laeng. Torang jahat pa orang deng torang salalu baku binci.

1 Petrus 1:14

Ngoni ini Tuhan Allah pe ana-ana, jadi ngoni dengar-dengaran suda pa Dia, deng jang ngoni iko keinginan yang tara bae yang kuasai ngoni pe hidup dulu waktu ngoni bolong percaya pa Tuhan.

Yudas 1:4

Barang, ada orang-orang yang bawa ajaran yang tara butul yang so maso pa ngoni pe jemaat, tapi ngoni tara sadar. Dorang itu tara iko Tuhan Allah pe mau. Dorang memang so tarima ajaran tentang torang pe Tuhan Allah pe bae, tapi dorang kase putar bale ajaran itu la orang bisa iko dorang pe napsu yang tara bae. Deng dorang me manyangkal, Yesus Kristus yang cuma satu itu saja torang pe Tuhan, yang berkuasa pa samua-samua. Orang-orang model bagini, dari dulu ada tatulis di Kitab Suci, dorang memang akan dapa hukuman.