1 Petrus 2:16 - Perjanjian Baru Bahasa Melayu Maluku Utara

¹⁶ Ngoni ini Tuhan Allah so kase bebas pa ngoni dari kuasa dosa, tapi jang ngoni pake hak itu jadi alasan untuk biking barang yang jahat lagi. Tapi lebe bae ngoni hidup untuk biking apa yang Tuhan Allah suru.

1 Petrus 2:16 ပူးပေါင်းရင်းမြစ်များ

Matius 23:13

Yesus bilang lagi, “Cilaka suda ngoni guru-guru agama Yahudi yang ahli lima kitab Musa deng orang-orang Yahudi dari aliran Farisi! Ngoni munafik samua. Barang, ngoni sandiri tara kase ngoni pe diri jadi Tuhan Allah pe umat la Dia Berkuasa sebagai Raja pa ngoni pe hidup, deng ngoni sandiri me pele pa orang-orang yang berusaha mo jadi Dia pe umat. Itu sama deng ngoni so tutu pintu pa dorang. [

Yohanes 15:22

Kalu Kita tara datang di dunia ini untuk kase tau Tuhan Allah pe ajaran pa dorang, pasti Tuhan Allah tara bilang dorang itu berdosa, barang dorang tara tau dorang pe sala. Tapi skarang Kita so datang di dunia ini kong so kase tau ajaran itu, jadi dorang so tarada alasan mo bilang dorang itu tara berdosa, barang dorang so tau.

Roma 6:18

Jadi, skarang ngoni so bebas dari dosa pe kuasa yang jaga suru-suru pa ngoni itu. Kong ngoni so serakan ngoni pe diri jadi Tuhan Allah pe suru-suru, supaya ngoni biking turus yang butul.

Roma 6:22

Tapi skarang Tuhan Allah so kase bebas pa ngoni dari dosa, jadi dosa so tara jadi ngoni pe tuang lagi. Deng ngoni so serakan ngoni pe diri jadi Tuhan Allah pe suru-suru. Dia pe untung, Tuhan Allah so biking ngoni jadi Dia pe umat yang hidup cuma biking Dia pe mau. Kong dia pe ahir kabawa, ngoni mo hidup deng Tuhan Allah slama-lamanya.

1 Korintus 7:22

Barang, orang karja yang Tuhan so pangge untuk iko pa Tuhan, dia itu so jadi orang bebas karna Tuhan Allah so kase bebas pa dia dari dosa-dosa. Bagitu lagi deng orang bebas yang bukang orang karja tapi dia so percaya pa Yesus Kristus, dia itu so jadi Yesus Kristus pe orang karja.

Galatia 5:1

Sudara-sudara, torang skarang so bebas, karna Yesus Kristus so kase bebas pa torang dari aturan-aturan di lima kitab Musa la torang dapa slamat. Karna itu, torang musti tetap kuat percaya, jang kase biar torang pe diri taika deng aturan-aturan itu lagi, barang itu sama deng torang jadi aturan itu pe suru-suru.

Galatia 5:13

Sudara-sudara, Tuhan Allah so pangge pa ngoni iko pa Dia, deng bagitu ngoni bisa bebas dari aturan-aturan di lima kitab Musa untuk dapa slamat. Cuma jang ngoni pikir ngoni so bebas, turus ngoni bole biking kalakuang yang tara bagus iko apa saja yang ngoni suka. Bukang bagitu. Tapi yang butul yang musti biking itu, ngoni musti baku-baku layani karna ngoni baku sayang.

Efesus 6:6

Jang ngoni dengar-dengaran cuma waktu ngoni pe tuang ada lia-lia saja, la ngoni dapa puji. Tapi ngoni musti dengar-dengaran pa dorang, karna ngoni itu so kase ngoni pe diri jadi Yesus Kristus pe orang-orang karja, kong ngoni musti biking apa yang Tuhan Allah mau deng hati yang sunggu-sunggu.

Kolose 3:24

Inga, ngoni ada karja untuk Yesus Kristus, sama deng Dia itu ngoni pe tuang. Deng Dia akan kase pa ngoni samua yang bae yang Dia so janji pa Dia pe ana-ana.

1 Tesalonika 2:5

Ngoni sandiri me tau, torang tara perna kase kaluar kata-kata yang cuma biking orang pe hati sanang, atau bafoya pa ngoni la mo cari untung dari ngoni. Tuhan Allah tau butul torang pe isi hati.

Yakobus 1:25

Tapi kalu orang cari tau deng perhatikan bae-bae kong biking firman itu, bukang cuma dengar kong lupa, pasti Tuhan Allah akan biking dia jadi orang yang paling sanang. Tuhan Allah pe firman itu, aturan yang sempurna, deng yang bole kase lapas orang dari dosa-dosa.

Yakobus 2:12

Jadi kalu torang bicara atau biking satu barang, torang musti ati-ati, karna torang tau nanti Tuhan Allah mo adili pa orang-orang pake aturan yang kase lapas pa manusia dari dosa-dosa.

2 Petrus 2:19

Dorang ajar pa orang-orang yang baru percaya itu, deng bilang, “Kalu ngoni iko torang pe ajaran, ngoni akan bebas dari samua aturan. Jadi ngoni bole biking apa saja yang ngoni suka.” Padahal, guru-guru palsu itu sandiri tara bebas karna dong pe keinginan tara bae yang banya so kuasai pa dorang, kong itu yang biking dong berdosa. Barang, apa saja yang kuasai pa orang, itu yang biking dia berdosa.

Yudas 1:4

Barang, ada orang-orang yang bawa ajaran yang tara butul yang so maso pa ngoni pe jemaat, tapi ngoni tara sadar. Dorang itu tara iko Tuhan Allah pe mau. Dorang memang so tarima ajaran tentang torang pe Tuhan Allah pe bae, tapi dorang kase putar bale ajaran itu la orang bisa iko dorang pe napsu yang tara bae. Deng dorang me manyangkal, Yesus Kristus yang cuma satu itu saja torang pe Tuhan, yang berkuasa pa samua-samua. Orang-orang model bagini, dari dulu ada tatulis di Kitab Suci, dorang memang akan dapa hukuman.