1 Petrus 2:1 - Perjanjian Baru Bahasa Melayu Maluku Utara

¹ Karna ngoni so dapa hidup yang baru itu, berenti suda biking samua yang jahat. Jang bicara foya, jang pura-pura bae, jang mangiri, deng jang biking busu orang laeng pe nama.

1 Petrus 2:1 ပူးပေါင်းရင်းမြစ်များ

Matius 15:7

Ee, ngoni orang-orang munafik! Apa yang Tuhan Allah bilang dulu pa nabi Yesaya tentang ngoni itu so jadi, bagini,

Matius 23:28

Itu sama deng ngoni, dari luar dapa lia ngoni sama deng orang yang jaga biking yang butul pa Tuhan Allah pe muka, padahal dari dalam ngoni pe hati, ngoni paling munafik deng jahat.

Matius 24:51

Turus dia pe tuang mo hukum pa dia deng hukuman yang barát. Dia dapa hukuman mati. Kong dia pe nasib sama deng orang-orang munafik. Di situ, dorang mo manangis turus-turus sampe dong pe gigi bababunyi karna menderita skali.”

Matius 7:5

Ee, ngoni orang munafik, kase kaluar dulu balak spanggal dari ngoni pe mata, baru ngoni bisa lia bae-bae, supaya ngoni bisa kase kaluar ampas kayu dari ngoni pe sudara pe mata.

Markus 12:15

Tapi Yesus tau dorang pe hati tara butul, jadi Dia bilang pa dorang bagini, “Bikiapa kong ngoni mo cari-cari Kita pe sala? Coba kase tunju pa Kita doi yang ngoni jaga pake babayar pajak.”

Lukas 11:44

Cilaka suda ngoni! Barang, ngoni pe kalakuang dari luar dapa lia bagus tapi dari dalam ngoni pe hati busu. Ngoni itu so sama deng kubur yang tarada tanda apa-apa pa dia pe di atas, jadi orang yang bajalang di situ, dorang tara tau ada barang busu di dalam.”

Lukas 12:1

Waktu itu, ada orang deng ribu yang datang bakumpul pa Yesus. Dorang datang baku-baku gepe sampe dorang baku-baku injang. Kong waktu itu suda, Yesus mulai mangajar. Pertama Dia mangajar pa Dia pe murit-murit, Dia bilang, “Ngoni ati-ati deng orang-orang dari aliran Farisi, jang sampe ngoni iko dorang pe kalakuang. Dorang kase tunju pa orang, dorang itu jaga iko pa Tuhan Allah, tapi sebenarnya dorang munafik. Dorang orang Farisi pe hidup kase pengaru basar pa orang, itu sama deng ragi sadiki yang torang campur di adonan la adonan itu nae.

Lukas 6:42

Jadi bagimana kong ngoni bisa bilang pa ngoni pe sudara, ‘Sudara e, mari kita kase kaluar ampas kayu dari ngana pe mata,’ padahal balak spanggal di ngoni pe mata sandiri, ngoni kase biar. Ee, ngoni orang munafik, kase kaluar dulu balak spanggal dari ngoni pe mata, baru ngoni bisa lia bae-bae, supaya ngoni bisa kase kaluar ampas kayu dari ngoni pe sudara pe mata.”

Yohanes 1:47

Turus dorang dua pigi pa Yesus. Pe lia Natanael datang pa Dia, Yesus bilang, “Coba ngoni lia, dia yang kamari ini butul-butul orang Israel, dia tara putar bale.”

Roma 1:29

Dorang pe hati ponong deng barang yang tara butul deng barang yang jahat. Dorang golojo samua-samua, cuma pikir yang jahat, mangiri, deng jadi tukang bunu. Kong dorang me jaga baku mara, deng tukang bafoya. Dorang suka orang laeng dapa cilaka deng suka bacarita tara bae tentang orang laeng.

1 Korintus 14:20

Sudara-sudara, mangarti bae-bae yang kita bilang tentang karunia-karunia itu, deng jang ngoni pe pikiran sama deng ana-ana. Tapi tentang barang yang jahat, ngoni pe pikiran musti sama deng ana-ana supaya ngoni tara bapikir untuk biking yang jahat.

1 Korintus 5:8

Jadi, mari suda torang buang tong pe kalakuang yang jahat deng tong pe dosa-dosa, itu sama deng tong buang ragi yang lama di torang pe hari raya Paska. Kong torang jadi orang yang biking barang yang butul deng hati yang bersi, itu sama deng torang biking torang pe hari raya Roti Tara Pake Ragi.

2 Korintus 12:20

Kita hawater, kalu kita so datang pa ngoni nanti, ngoni bolong biking sama deng yang kita mau. Bagitu lagi deng ngoni, ngoni lia kita biking tara sama deng yang ngoni mau. Kita hawater, jang sampe kita dapa ada dari ngoni yang baku-baku malawang, baku mangiri, mara-mara, cuma pikir diri sandiri, carita busu orang pe nama, bamulu, basombong deng biking kaco.

Efesus 4:31

Ngoni musti buang suda samua ngoni pe hati saki, simpang hati, deng mara-mara. Ngoni berenti suda mara-mara sampe marontak. Berenti suda kase tara bae orang pe nama, deng berenti lagi biking samua yang jahat.

1 Tesalonika 2:3

Torang kase tau Kabar Bae itu, supaya ngoni percaya pa Tuhan Yesus, kong yang torang kase tau itu, bukang ajaran yang tara butul. Torang tara maksut jahat deng tara mau kase foya orang.

1 Timotius 3:11

Bagitu lagi deng dorang pe bini. Dorang pe kalakuang me musti bae yang biking orang hormati pa dorang, deng dorang me tara jaga kase busu orang laeng pe nama. Dorang musti mampo batahang diri, deng orang bisa percaya pa dorang dalam hal apa saja.

Titus 2:3

Bagitu lagi deng parampuang-parampuang yang so tua, ngana kase ajar pa dorang supaya dorang pe cara hidup iko Tuhan Allah pe mau. Dorang tara bole biking busu orang pe nama, deng tara bole jadi pangmabo. Dorang musti kase ajar yang bae pa orang-orang.

Ibrani 12:1

Sudara-sudara, biar orang-orang percaya dulu-dulu yang kita so bilang tadi itu so mati, dorang pe percaya waktu dong hidup di dunia itu jadi conto la torang iko, sama deng dorang masi hidup kong ada kuliling pa torang. Jadi, mari suda torang berusaha untuk buang samua beban deng lapas suda dosa-dosa yang masi malakat pa tong pe diri, supaya torang tara ada alangan apa-apa, la torang bole percaya butul-butul pa Tuhan Allah. Mari torang berusaha iko pa Dia sama deng torang ada iko lomba lari, torang tara berenti tapi lari turus sampe di garis finis.

Yakobus 1:21

Jadi ngoni musti berenti biking samua hal yang tara bae deng yang jahat. Ngoni musti tarima Tuhan Allah pe firman deng hati yang tara sombong. Firman itu so ada di ngoni pe hati, kong punya kuasa untuk kase slamat pa ngoni.

Yakobus 3:14

Tapi kalu ngoni masi suka mangiri deng cuma pikir diri sandiri, jang ngoni basombong bilang ngoni itu pande skali. Kalu ngoni bagitu, ngoni so kase putar bale ajaran yang butul.

Yakobus 4:11

Sudara-sudara, jang ngoni baku biking busu ngoni pe sudara pe nama. Sapa yang biking busu dia pe sudara pe nama atau tudu dia pe sudara itu sala, itu sama deng dia so biking busu deng kase sala Tuhan Allah pe aturan. Kong kalu ngoni kase sala Tuhan Allah pe aturan, ngoni itu tara iko aturan itu, tapi ngoni biking ngoni pe diri jadi hakim untuk kase sala aturan itu.

Yakobus 4:5

Jang ngoni kira kata tarada arti deng apa yang tatulis di Kitab Suci ini, “Tuhan Allah pe Roh yang Dia taru di torang pe hati, Roh itu mau torang pe sayang cuma untuk Tuhan Allah saja. Dia cemburu kalu torang iko dunia pe mau.”

Yakobus 5:9

Sudara-sudara, jang ngoni mengelu deng baku tudu, supaya ngoni tara dapa hukum. Inga e, Tuhan so mo datang ulang. Dia sama deng hakim yang mo adili pa samua orang.

1 Petrus 2:16

Ngoni ini Tuhan Allah so kase bebas pa ngoni dari kuasa dosa, tapi jang ngoni pake hak itu jadi alasan untuk biking barang yang jahat lagi. Tapi lebe bae ngoni hidup untuk biking apa yang Tuhan Allah suru.

1 Petrus 2:22

Sama deng yang so tatulis di Kitab Suci bagini, “Dia tara perna biking dosa, deng tara perna bicara putar bale.”

1 Petrus 3:10

Barang, di Kitab Suci ada tatulis bagini, “Sapa yang mau hidup sanang, deng mau dapa hidup yang bae, dia musti jaga dia pe mulu la jang bicara yang tara bae, deng jaga dia pe bicara supaya jang bicara putar bale.

1 Petrus 4:2

Jadi selama ngoni masi hidup di dunia, ngoni pake waktu yang ada untuk iko Tuhan Allah pe mau, jang iko manusia pe keinginan.

1 Petrus 4:4

Tapi skarang, dorang yang jaga biking hal-hal jahat itu jadi herang pa ngoni, karna ngoni so tara iko biking barang yang jahat sampe tarada dia pe batas, sama deng dorang. Jadi dorang kase tara bae ngoni pe nama.

Wahyu 14:5

Dorang itu tara perna bicara putar bale, deng tarada orang yang bisa kase sala pa dorang.