1 Petrus 1:3 - Perjanjian Baru Bahasa Melayu Maluku Utara

³ Puji suda pa Tuhan Allah, Dia itu torang pe Tuhan Yesus Kristus pe Bapa. Dia pe rasa kasiang pa torang basar skali, sampe Dia kase pa torang hidup yang baru waktu Dia so kase hidup ulang pa Yesus Kristus. Kong karna itu, torang bole baharap deng percaya sunggu-sunggu pa Dia.

1 Petrus 1:3 ပူးပေါင်းရင်းမြစ်များ

Yohanes 1:13

Dorang jadi Tuhan Allah pe ana-ana bukang karna dorang lahir dari dorang pe papa deng mama, bukang lagi karna hubungan laki bini, kong bukang lagi karna manusia pe rencana yang ingin dapa ana, tapi dorang jadi Tuhan Allah pe ana-ana karna Tuhan Allah sandiri yang biking dorang jadi Dia pe ana-ana.

Roma 12:12

Ngoni musti sanang suda, karna torang bole baharap deng yakin pa Tuhan. Ngoni musti sabar biar dapa siksa, deng ngoni lagi musti rajin berdoa!

Roma 15:13

Tuhan Allah itu yang biking torang bole baharap deng yakin, apa yang Dia janji Dia akan biking. Karna itu, kita minta pa Tuhan Allah supaya Dia biking ngoni pe hati sanang deng hati tenang, karna ngoni so percaya pa Dia. Kita minta itu supaya Roh Kudus pe kuasa bakarja di ngoni pe hati untuk biking ngoni tatamba baharap deng yakin turus pa Tuhan Allah.

Roma 4:25

Yesus itu yang so serakan Dia pe diri mati untuk torang samua karna torang pe dosa. Tapi Tuhan Allah kase hidup ulang pa Dia supaya Tuhan Allah biking torang jadi orang yang tara sala pa Dia pe muka.

Roma 5:10

Karna dulu, waktu torang masi pangmalawang pa Tuhan Allah, Tuhan Allah sandiri yang kase bae-bae ulang torang pe hubungan deng Dia, deng cara Dia kase Dia pe Anak supaya mati untuk torang. Kong karna torang deng Dia pe hubungan so bae-bae ulang skarang, torang tau, torang pasti akan dapa slamat dari dosa-dosa karna Dia pe Anak so hidup ulang.

Roma 8:11

Tuhan Allah pe Roh so kase hidup ulang pa Kristus Yesus, kong Roh itu suda yang ada di ngoni pe hati. Jadi biar ngoni pe badan mo mati, tapi Tuhan Allah nanti mo kase hidup ulang pa ngoni pake kuasa dari Dia pe Roh yang ada pa ngoni itu.

Roma 8:24

Karna waktu torang jadi percaya, kong Tuhan kase slamat pa torang, mulai waktu itu, torang yakin torang mo dapa apa yang Tuhan Allah janji. Tapi, kalu umpama torang so dapa apa yang torang tunggu-tunggu, itu berarti, torang so tara usa baharap lagi. Karna tara mungkin orang masi baharap, kalu yang dia harap itu dia so dapa.

1 Korintus 13:13

Jadi, skarang tinggal tiga hal yang penting yang torang musti biking turus-turus: percaya pa Tuhan, baharap pa Dia, deng sayang pa orang laeng. Kong dari tiga ini, yang paling penting, itu sayang pa orang laeng.

1 Korintus 15:20

Tapi yang butul itu bagini: Yesus Kristus mati kong Tuhan Allah so kase hidup ulang pa Dia. Dia itu yang pertama hidup ulang, kong nanti orang-orang percaya yang so mati me, dorang lagi akan hidup ulang.

2 Korintus 1:3

Mari suda torang puji pa Tuhan Allah, torang pe Tuhan Yesus Kristus pe Bapa! Dia itu Bapa yang salalu kasiang pa torang, deng Dia itu Tuhan Allah yang salalu kase kuat torang pe hati.

Galatia 6:16

Turus ngoni yang hidup iko apa yang kita bilang ini, kita minta supaya Tuhan Allah salalu biking ngoni pe hati tetap tenang deng supaya Dia kase Dia pe rasa kasiang pa ngoni. Ngoni yang hidup bagitu, ngoni itu suda Tuhan Allah pe umat.

Efesus 1:17

Kita berdoa pa Tuhan Allah, torang pe Tuhan Yesus Kristus pe Bapa yang hebat. Kita minta supaya Dia pe Roh pe kuasa buka ngoni pe pikiran deng biking ngoni lebe mangarti tentang Tuhan Allah, sampe ngoni kanal pa Dia lebe dalam lagi.

Efesus 1:3

Mari suda torang puji pa Tuhan Allah, torang pe Tuhan Yesus Kristus pe Bapa! Dia so kase sagala berkat rohani dari sorga pa torang, karna torang so percaya pa Yesus Kristus.

Efesus 1:7

Barang, deng Yesus Kristus mati kong Dia pe dara tatumpa untuk tebus pa torang, torang bole dapa ampun dari torang pe dosa-dosa. Samua itu torang dapa, karna Tuhan Allah pe bae yang basar skali pa torang.

Efesus 2:4

Tapi Tuhan Allah pe rasa kasiang pa torang itu basar skali. Karna itu, Dia sayang skali pa torang.

Efesus 3:20

Tuhan Allah pe kuasa yang bakarja pa torang pe hidup itu paling basar skali, kong deng Dia pe kuasa itu Dia bisa biking lebe dari apa yang torang minta, deng lebe dari apa yang torang pikir.

Kolose 1:23

Yang penting, ngoni tetap percaya pa Yesus Kristus deng jang ragu. Percaya turus Kabar Bae tentang Yesus Kristus yang ngoni so dengar itu. Kabar Bae itu suda yang biking torang yakin, torang mo dapa apa yang Tuhan Allah so janji pa Dia pe umat. Kabar Bae itu so tasiar di seluru dunia, kong kita ini, Paulus yang Tuhan Allah so pili untuk kase tau Kabar Bae itu.

Kolose 1:27

Yang Tuhan Allah kase mangarti pa dorang itu, Dia pe rencana yang paling hebat deng luar biasa pa ngoni orang-orang bukang Yahudi. Dia pe rencana itu bagini: Yesus Kristus tinggal di ngoni pe hati, jadi ngoni bole baharap deng yakin, nanti ngoni me sama-sama deng Dia di Dia pe tampa yang luar biasa.

1 Tesalonika 1:3

Tiap kali torang berdoa pa Tuhan Allah torang pe Bapa, torang inga pa ngoni jemaat di kota Tesalonika. Torang inga samua yang ngoni biking karna ngoni pe percaya. Torang inga ngoni pe bae pa orang-orang karna ngoni sayang pa dorang. Torang inga lagi bagimana ngoni tetap biking barang yang bae biar ngoni dapa susa, karna ngoni salalu batahang percaya deng yakin pa Yesus Kristus, torang pe Tuhan.

1 Tesalonika 4:13

Sudara-sudara, kalu ada orang yang mati, torang tara mau ngoni sedi skali sama deng orang-orang yang tara ada harapan. Jadi torang mo kase tau pa ngoni apa sebenarnya yang jadi pa orang-orang yang so mati.

2 Tesalonika 2:16

Yesus Kristus, torang pe Tuhan, deng Tuhan Allah, torang pe Bapa, sayang skali pa torang deng salalu kase kuat torang pe hati sampe torang bole baharap deng yakin torang dapa hidup deng Dia slama-lamanya. Torang bole yakin bagitu, karna torang tau, Yesus Kristus pe bae pa torang.

1 Timotius 1:14

Mala, torang pe Tuhan kase Dia pe bae pa kita talebe-lebe, sampe kita jadi percaya pa Dia, deng jadi sayang pa orang laeng. Samua itu karna kita so hidup satu hati deng Kristus Yesus.

Titus 2:13

Sementara torang biking samua itu, torang batunggu hari yang nanti biking torang paling sanang waktu Tuhan Yesus Kristus datang lagi deng Dia pe kuasa yang luar biasa. Dia itu suda torang pe Tuhan Allah Yang Paling Berkuasa, deng yang kase slamat pa torang. Torang pe harapan cuma pa Dia.

Ibrani 3:6

Tapi Yesus Kristus lebe berkuasa dari nabi Musa. Barang, Yesus Kristus itu Anak Allah yang setia pa Tuhan Allah pe umat, sama deng ana satu yang berkuasa pa samua dia pe papa pe ruma. Kong torang ini sama deng Tuhan Allah pe ruma sandiri, asal torang bapegang kuat deng tong pe percaya, deng torang yakin torang akan dapa apa yang Tuhan Allah so janji mo kase pa torang. Itu yang biking torang pe hati sanang.

Yakobus 1:18

Tuhan Allah biking torang jadi Dia pe ana-ana itu iko Dia pe mau sandiri, karna torang percaya Dia pe ajaran yang butul. Dia biking torang jadi Dia pe ana-ana supaya torang jadi yang paling penting dari samua yang Dia cipta.

1 Petrus 1:13

Jadi karna ngoni so tau Kabar Bae itu, ngoni musti siap biking hal-hal yang bae, ngoni musti kuasai ngoni pe diri, deng ngoni musti baharap deng yakin Tuhan akan kase Dia pe bae pa ngoni waktu Yesus Kristus datang ulang.

1 Petrus 1:21

Karna Yesus Kristus so kase slamat pa ngoni, ngoni bole percaya pa Tuhan Allah. Tuhan Allah itu yang so kase hidup ulang pa Yesus Kristus waktu Dia mati, deng yang biking Yesus Kristus dapa puji deng hormat. Deng bagitu, ngoni bole percaya deng baharap pa Tuhan Allah.

1 Petrus 1:23

barang ngoni ini so dapa hidup yang baru. Ngoni dapa itu bukang dari manusia yang memang mo mati, tapi dari Tuhan Allah yang tetap ada sampe slama-lamanya. Ngoni dapa hidup yang baru itu karna ngoni percaya Tuhan Allah pe firman. Firman itu akan tetap ada turus, kong biking orang bole hidup deng Tuhan Allah slama-lamanya.

1 Petrus 2:2

Ngoni musti suka skali Tuhan pe Firman, sama deng bayi yang baru lahir yang suka skali minum dia pe mama pe aer susu. Deng bagitu, ngoni pe percaya pa Tuhan mo lebe tatamba kuat kong ngoni akan dapa slamat dari dosa-dosa.

1 Petrus 3:15

Tapi ngoni musti hormati pa Kristus kong biking Dia jadi Raja di ngoni pe hati. Kalu ada orang yang batanya tentang ngoni pe harapan pa Tuhan Yesus, ngoni musti salalu siap bajawab pa dorang. Kong waktu ngoni bajawab, ngoni musti bajawab pa dorang itu deng bae-bae deng kase tunju ngoni pe rasa hormat,

1 Petrus 3:21

Banjir basar itu, kalu skarang bole kase sama deng baptisan. Baptisan itu pe tujuan bukang untuk kase bersi ngoni pe badan dari yang kotor, tapi untuk minta pa Tuhan Allah supaya kase bersi ngoni pe hati dari dosa. Baptisan itu jadi tanda, Tuhan Allah so kase slamat pa torang karna Yesus Kristus so mati kong hidup ulang.

1 Petrus 3:5

Karna parampuang-parampuang dulu-dulu yang hidup bersi pa Tuhan Allah pe muka me, dorang pe hidup macam bagitu. Dorang itu cuma baharap pa Tuhan Allah, deng dorang dengar-dengaran pa dong pe laki.

1 Yohanes 2:29

Ngoni tau Dia itu butul, jadi ngoni me musti tau, tiap orang yang jaga biking barang yang butul, orang itu so jadi Tuhan Allah pe ana.

1 Yohanes 3:3

Samua orang yang baharap pa Tuhan sama deng itu, orang itu musti salalu hidup deng hati bersi sama deng Yesus Kristus yang suci itu.

1 Yohanes 3:9

Tiap orang yang Tuhan Allah so biking jadi Tuhan Allah pe ana, dia itu pe hidup so beruba jadi baru, deng dia me so tara biking dosa lagi, barang Tuhan Allah hidup pa orang itu pe diri, sama deng Tuhan Allah ada tanam bibit pa orang itu pe hati kong batumbu. Tuhan Allah so biking dia jadi Dia pe ana, jadi dia so tara biking dosa lagi.

1 Yohanes 4:7

Sudara-sudara yang kita sayang, mari suda torang baku sayang satu deng yang laeng, karna sayang itu dari Tuhan Allah. Jadi sapa saja yang sayang orang, dia itu kanal pa Tuhan Allah kong so jadi Tuhan Allah pe ana.

1 Yohanes 5:1

Tiap orang yang percaya Yesus itu Kristus, Raja yang Tuhan Allah pili, orang itu Tuhan Allah pe ana. Deng sapa saja yang sayang pa Tuhan Allah, orang itu pasti sayang pa Tuhan Allah pe ana-ana.

1 Yohanes 5:18

Torang tau, samua orang yang so jadi Tuhan Allah pe ana-ana, dorang so tara biking dosa lagi. Barang, Anak Allah jaga pa dorang, sampe Iblis, setang-setang pe raja tara mampo mo kase kala pa dorang.

1 Yohanes 5:4

Barang, tiap orang yang so jadi Tuhan Allah pe ana-ana mampo kase kala kuasa jahat di dunia ini. Kong torang bole kase kala kuasa yang jahat itu, karna torang pe percaya.