1 Korintus 7:2 - Perjanjian Baru Bahasa Melayu Maluku Utara

² Tapi supaya tara tagoda untuk baseks sabarang, lebe bae tiap laki-laki kawing deng satu parampuang, deng tiap parampuang kawing deng satu laki-laki.

1 Korintus 7:2 ပူးပေါင်းရင်းမြစ်များ

Matius 5:32

Tapi Kita mo bilang pa ngoni e, laki bole cere dia pe bini kalu dia pe bini so baku suka deng orang laeng. Tapi kalu tarada, kong laki itu cere dia pe bini, dia so biking dia pe bini itu jadi sala pa Tuhan Allah pe muka. Barang, kalu parampuang yang so dapa cere itu kawing ulang deng orang laeng, itu sama deng parampuang itu so baku suka deng orang yang bukang dia pe laki, kong orang yang kawing deng dia me so sala pa Tuhan Allah pe muka, karna orang itu me sama deng so baku suka deng orang yang bukang dia pe bini.”

1 Korintus 6:18

Jadi, ngoni inga e, jang coba-coba ngoni baseks sabarang! Barang, dosa laeng yang orang jaga biking, itu tara ada dia pe akibat pa dia pe badan. Tapi kalu baseks sabarang, dosa itu biking rusak dia pe diri sandiri.

1 Korintus 7:1

Sudara-sudara, ngoni perna tanya pa kita di ngoni pe surat, “Bagus ka tarada, kalu laki-laki tara kawing?” Menurut kita, itu bagus kalu laki-laki tara kawing.

1 Korintus 7:3

Laki jang tolak kalu dia pe bini mau tidor deng dia. Itu dia pe hak. Bagitu lagi deng bini, jang tolak kalu dia pe laki mau tidor deng dia. Itu me dia pe hak.

1 Korintus 7:9

Tapi kalu dorang tara mampo tahang napsu, lebe bae dong kawing suda. Karna, itu yang lebe bagus daripada tara kawing kong diri sengsara gara-gara tara mampo tahang napsu itu.

Efesus 5:28

Bagitu lagi deng ngoni laki-laki yang so kawing, ngoni musti sayang ngoni pe bini sama deng ngoni sayang ngoni pe diri sandiri. Sapa yang sayang dia pe bini, itu sama saja deng dia sayang pa dia pe diri sandiri.

Efesus 5:33

Jadi bagini: laki musti sayang dia pe bini sama deng dia sayang pa dia pe diri sandiri. Bagitu lagi deng bini, bini musti hormati dia pe laki.

1 Tesalonika 4:4

Ngoni laki-laki yang so kawing, ngoni musti tau bawa ngoni pe bini bae-bae, ngoni hidup deng hati bersi pa Tuhan Allah pe muka deng baku hormati satu deng yang laeng.

1 Timotius 4:3

Dorang kase ajar kata, orang tara bole kawing, deng tara bole makang makanang yang dorang bilang haram. Padahal, Tuhan Allah so biking samua makanang la torang makang. Jadi kalu torang yang percaya yang iko ajaran yang butul itu mo makang, bole, asal makang deng bilang tarimakasi pa Tuhan Allah.