1 Korintus 4:7 - Perjanjian Baru Bahasa Melayu Maluku Utara

⁷ Barang, kalu ngoni nilai pemimpin bagitu, itu sama deng ngoni anggap ngoni pe diri lebe penting dari orang laeng. Samua yang ngoni punya, itu dari Tuhan. Jadi bikiapa kong ngoni basombong, sama deng ngoni anggap apa yang ngoni tarima itu dari ngoni pe kemampuan sandiri, bukang dari Tuhan?

1 Korintus 4:7 ပူးပေါင်းရင်းမြစ်များ

Lukas 19:13

Waktu dia mo pigi, dia pangge dia pe orang karja spulu orang kong kase doi mas pa dorang satu-satu, kong dia bilang bagini, ‘Ngoni pake ini untuk badagang sampe kita bale kamari.’

Yohanes 1:16

Dia pe sayang pa torang tara perna abis-abis. Kong karna Dia pe sayang itu, Dia tara berenti-berenti kase Dia pe bae pa torang samua.

Yohanes 3:27

Yohanes jawab pa dorang, “Biar suda, tara apa-apa. Manusia cuma mampo biking apa yang Tuhan Allah kase pa dorang.

Roma 1:5

Kong karna Yesus Kristus itu, Tuhan Allah kase Dia pe bae pa kita sampe Dia pili pa kita jadi rasul untuk kase tau Kabar Bae tentang Yesus Kristus pa samua suku bangsa, supaya samua orang bole percaya, deng bole iko Yesus Kristus pe mau.

Roma 12:3

Tuhan Allah kase Dia pe bae pa kita, sampe Dia so pili pa kita. Karna itu, kita kase nasehat pa ngoni bagini: jang ngoni pikir tinggi-tinggi tentang ngoni pe diri. Tapi lebe bae ngoni pikir yang pas tentang ngoni pe diri, iko ngoni pe percaya yang Tuhan Allah so kase pa ngoni satu-satu.

Roma 12:6

Tuhan Allah so kase pa torang karunia baku beda-beda karna Dia pe bae pa torang. Jadi torang musti pake karunia-karunia itu untuk biking bagini: kalu Tuhan Allah kase pa torang karunia untuk kase turus Tuhan Allah pe pasáng, torang musti kase turus pasáng itu pa orang-orang, iko torang pe percaya pa Tuhan Allah.

1 Korintus 15:10

Tapi kita jadi rasul skarang, cuma karna Tuhan Allah pe bae pa kita. Deng Dia pe bae itu tara parcuma. Mala dari samua rasul, yang karja karas itu kita. Tapi samua karja itu kita mampo biking bukang karna kita pe kemampuan sandiri, tapi karna Tuhan Allah pe bae pa kita.

1 Korintus 3:5

Jang ngoni anggap kita deng Apolos orang penting. Torang dua ini cuma orang-orang yang jaga biking apa yang Tuhan suru. Torang kase tau Kabar Bae tentang Yesus Kristus pa ngoni sampe ngoni jadi percaya. Torang cuma biking tugas yang Tuhan kase pa torang masing-masing.

1 Korintus 5:6

Tara bagus ngoni basombong macam bagitu. Jang sampe ngoni tara sadar, kalu satu orang dari ngoni biking sala, bisa pengaru orang laeng dalam ngoni pe jemaat biking sala lagi. Itu sama deng ragi yang sadiki saja, bisa kase nae adonan.

1 Korintus 7:7

Sebenarnya, kita lebe suka kalu samua orang yang bolong kawing jang kawing, sama deng kita. Tapi masing-masing orang yang percaya so dapa karunia kusus dari Tuhan Allah. Yang satu dapa karunia ini, yang laeng dapa karunia itu. Ada yang Tuhan kase karunia untuk tara kawing, deng ada yang Tuhan kase karunia untuk kawing.

Yakobus 1:17

Barang, samua yang bae deng sempurna yang torang dapa, itu datang dari Tuhan Allah yang di sorga. Dia itu torang pe Bapa yang biking matahari, bulan, deng bintang untuk kase tarang langit. Matahari, bulan, deng bintang itu basinar iko dia pe waktu untuk kase tarang dunia ini. Tapi Tuhan Allah tara bagitu, Dia tara beruba, Dia salalu bae.

1 Petrus 4:10

Tiap orang dari ngoni so tarima karunia dari Tuhan Allah untuk layani satu deng yang laeng. Tuhan Allah kase karunia itu karna Dia pe bae, jadi tiap orang musti pake macam-macam karunia itu bae-bae.